Jesaea 17 - সান্তালী বাইবেল

Damesek upạrte nạbi katha

¹ Damesek reakʼ nạbi katha do nonka leka: Probhu Isore meneda, “Ńelpe, Damesek nagraha do ar baṅ tahena, ona do mitʼṭecʼ dhaṅdhaserakʼ ḍạṅge hoyokʼa.

² Aroye reakʼ atoko do jaejug lạgitʼ ńir bạgiyakʼge hoyokʼa. Onako do janwarko lạgitʼge hoyokʼa. Onko do onḍegeko aḍakʼa; ar celege bako botor ocokoa.

³ Ephrayimre do jãhãn gaṛge baṅ tahena ar Damesekre hõ rajosṭige baṅ tahena; Aramren sarecʼ jiwetʼ hoṛ do Israelko leka ṭhonok hoyokʼtakoa.” Noa do phạdkoren Probhu Isorakʼ katha kana.

⁴ “Enhilokʼ Jakobakʼ ṭhonok do cabakʼa; ar uniyakʼ itilanakʼ hoṛmo do osogokʼtaea.

⁵ Irokʼicʼ cetʼleka teṅgowakʼ phosole samṭao ar gele geleye ir jarwae, onkage Israelkoakʼ dosa do hoyokʼa. Rephayim buru nalare hoṛko cetʼleka hulạkʼko halaṅ jarwae onkage onkoakʼ dosa do hoyokʼtakoa.

⁶ Enhõ thoṛa hulạkʼ do ńurakan tahena. Jạitun dare joko rukui tayom cetʼleka cetan ḍạrkore mitʼ bar jo tahen, onkage onkoakʼ dosa hõ hoyokʼtakoa.” Israelkoren Probhu Isorge niạ katha doe meneda.

⁷ Enhilokʼ hoṛko do akoren sisirjạuicʼ secʼko beṅgeda, Israelren uni sonoticʼ secʼ mẽtʼko ạcurtakoa.

⁸ Onko do akoakʼ tite benaoakʼ pinḍ secʼ bako beṅgeda, ar akoakʼ kạṭupʼte benaoicʼ Asera muṭhạn ar dhudhup pinḍko secʼ hõ bako moneyakʼa.

⁹ Enhilokʼ onkoakʼ kajak nagrahako do bir gajaṛ leka hoyokʼtakoa. Cetʼleka hoṛko do Israelko iạte nagraha bạgikateko dạṛletʼ onkage onkoakʼ dosa hõ hoyokʼtakoa. Onkoakʼ disạm do jarkharakʼge hoyokʼtakoa.

¹⁰ Am do amren babańcaoicʼ Isorrem hiṛiń akadea; ar ona asrayokʼ buru hõm hiṛińakada. Ar am do mońj mońj cara ar eṭakʼ disạm khon ạguwakʼ darkha nạ̃ṛĩkom rohoejoṅ kana,

¹¹ ar enhilokʼge ona dom hara ocowakʼ kana ar setakʼ do onare bhoṭokʼem hoyocoyeda, enhõ haron kosṭo ar ruạ hasokʼ dinre irokʼ lạgitʼ jãhãn phosol do baṅ tahena.

Bạirikoko bhagaokʼ kana

¹² Hae, hae, jạt jạtrenkoakʼ hud hudạukʼ do ańjomokʼ kana! Ona do jalapuri reakʼ hud hudạukʼ lekage. Disạmrenkoakʼ hud hudạukʼge ańjomokʼ kana. Onko do ḍubạ dakʼ reakʼ hud hud saḍe lekageko andoṛeda.

¹³ Disạm disạmrenko do aema dakʼ lekako hud hudạukʼkanre hõ, enhõ uniye dhomkao lekore onko do sạṅgińteko ńirjoṅa. Onko do oṭaṅokʼkan bhusạ leka, ar hoete gurlạu baṛaekan dhuṛi lekae oṭaṅ cabakoa.

¹⁴ Ar ạyupʼ jokhecʼ doko torasokʼa ar ạuri setagokʼrege onko doko caba utạrokʼa. Abo luluṭkoakʼ do noage menakʼa, ar noage onkoakʼ bakhra do.