Jesaea 16 - সান্তালী বাইবেল

Moabrenkoakʼ beas dosa

¹ E Moabrenko, ape do hahaṅkar ṭoṭha reakʼ Sela ar Sion buru disạmren disạm cakʼlaoko ṭhen dan sandes lekate bheḍa hoponko kolkope.

² Cẽṛẽ do tukạ khon oḍok kate cetʼleka hantenateye uḍạu baṛae onkage Moabren hoṛko do Arnon gaḍa taṛam paromokʼ jaega ṭhenko ạcur baṛaea.

³ Onko doko mena, “Solha emalepe; ar lạiyalepe cetʼle cekaea. Ape do tikin reakʼ umul do ńindạ reakʼ ńut leka hoeocoype- ar okoeko dạṛetʼkan onko do okore dohokakope, ar rukhiyạ ńam lạgitʼ asray lạgitʼko khojkan hoṛ do alope soprotkoa.

⁴ Moabren dạdạṛkan hoṛko do ape sãote tahẽ ocoakope; ar jarkharkoakʼ ti khon rukhiyạkope.” Jihudạren sasantaoko doko marao utạrokʼa; onkoakʼ jarkharokʼ reakʼ kạmi do thirokʼtakoa. Disạmre sasantaoko do ar bako ńelokʼa.

⁵ Asambheṛ dulạṛte Dạudakʼ raj oṛakʼre mitʼṭecʼ siṅghạson do beredokʼa; mitʼṭen pạtiạrạnicʼ hoṛ do onareye duṛupʼa. Uni do dhoromteye bicạra ar usạrage dhorom kạmiye purạua.

⁶ Ale do Moabakʼ bạḍại reakʼ kathale ańjom akada; uni do ạḍitetʼ bạḍại menakʼtaea. Uniyakʼ gorbo reakʼ katha, ar acʼ apnarte maraṅokʼ reakʼ katha ar sanam lekan bạḍại reakʼ kathale ańjomakada, menkhan joto bạḍại do ạuṛiyakʼgetaea.

⁷ Onatege Moabrenko do akoakʼ disạm lạgitʼ mitʼ domte ãṭ aṛaṅteko rakʼjoṅa, ar Kir-hareseth reakʼ kismis piṭhạ lạgitʼ ape do ãṭ aṛaṅtepe raga arpe dukokʼa.

⁸ Hesbon reakʼ khetko ar Sibmạ reakʼ darkha nạ̃ṛĩko do tolmocʼ akana. Jạtkoren disạm cakʼlaoko do bhage bhage darkha nạ̃ṛĩko lebetʼ gasmanḍao akada; ar mitʼdin onako do Jaser hạbicʼ haralente hahaṅkar hạbicʼ pasnao idilena. Onako reakʼ nạ̃ṛĩ do arhõ pasnao idiyente jalapuri hõe parom idileda.

⁹ Ona iạte iń do Jaser lekage Sibmạ reakʼ darkha nạ̃ṛĩ lạgitʼ iń rakʼeda. E Hesbon, E Eleale, aben do mẽtʼ dakʼteń jehe jobe bena. Ente abenakʼ jo ar irokʼ phosolrege lạṛhại reakʼ andoṛ do paṛao akana.

¹⁰ Joanakʼ bagwan khon hulạs ar rạskạ do sạṅgiń ocoakana. Darkha bagwanre do celege bako sereńa ar bako andoṛa, ar darkha lelen kunḍrehõ celege darkha rasa do bako lebetʼ roḍoja, ente ona reakʼ andoṛ do mokoń ocoakana.

¹¹ Ińakʼ jiwi do Moab lạgitʼ, ińakʼ bhitri do Kir-Heres lạgitʼ peṛesaṅ leka ṭiṛiṅ ṭuṛuṅokʼ kana.

¹² Moab do tinreye bujhạu daṛeakʼa, than boṭkocʼkore senkate jãhãn lab bạnukʼa unre uni do koejoṅ lạgitʼ acʼakʼ mundilteye bolokʼa; menkhan onate hõ jãhãn lab do baṅ hoyokʼtaea.

¹³ Probhu Isor do Moab reaṅ niạ katha laharegeye roṛ akada.

¹⁴ Menkhan ńitokʼ Probhu Isor doe meneda, “Mitʼṭen din mujuri hoṛ cetʼleka bochore lekhae onkage pe bochor bhitrite Moabakʼ ṭhonok ar uniren ḍher hoṛ doko nihạ̃t ocokʼa ar jiwetʼ tahen hoṛ do lekhare thoṛa ar nijorko hoyokʼa.”