Jesaea 15 - সান্তালী বাইবেল

Moab reaṅ Probhu Isorakʼ katha

¹ Moab babotre Probhu Isorakʼ katha do nonka kana: Moab reakʼ Ar ńutumanakʼ nagraha ar Kir nagraha do mitʼ ńindạtege jarkharena.

² Moabren hoṛko do rakʼjoṅ lạgitʼ Dibonakʼ mundilre ar than boṭkocʼkoreko rakapʼ akana. Onko do Nebo ar Medeba ńutumteko homor halaṅeda. Onko do jotoge bohokʼko hoyo munḍrạ akana ar goco hõko kaṭopʼ akatʼtakoa.

³ Ar kulhikore gõṛẽ kicricʼko horokʼ baṛayeda. Onko sanamkoge chat cetanre ar nagraha reakʼ dobạṭiạkoreko jare jarekʼkana. Ar ạḍitetʼko rakʼeda.

⁴ Hesbon ar Eleale dokin rakʼeda; unkinakʼ aṛaṅ do Jahas hạbicʼ ańjom calakʼ kana. Ona iạte Moabren lạṛhại phạdko hõko rakʼeda ar onkoakʼ ontor do botorte thar tharaokʼ kantakoa.

⁵ Moab lạgitʼ ińakʼ ontor doe rakʼeda; uniren hoṛko do Soar secʼ Eglath-selesia hạbicʼko dạṛetʼ kana. Onko do rakʼ rakʼte Luhit buru reakʼ horteko rakapʼ calakʼkana; onkoakʼ ṭhạ̃i do dhaṅdhaser akantakote rakʼ homorate Horonạiyim reakʼ horteko calakʼ kana.

⁶ Nimrim reakʼ sanam dakʼ do nosṭo ocoakana ar ghãs hõ rohoṛ kạrcupʼ akana; dareko hõ bạnukʼa, legecʼ hạṛiạṛ mente ar cetʼge sarecʼ do bạnukʼa.

⁷ Ona iạte onkoakʼ arjawakʼ dhon do sũṛũkucʼ soḍokʼ hanasa hạbicʼko gokʼ idiyeda.

⁸ Moab simạ reakʼ beṛhaete onkoakʼ rakʼ do ańjomokʼ kana; Eglayim ar Ber-Elim hạbicʼ onkoakʼ rakʼ do seṭer akana.

⁹ Dimon reakʼ dakʼko do mãyãmte perecʼ akana, enhõ iń do ona cetanre arhõ dukiń ạguiya; Moab khonko dạṛ akatʼ hoṛko cetanre ar okoe do disạmre jiwetʼko tahen onko cetanre dhạcri kulkoń ạgukoa.