Jesaea 12 - সান্তালী বাইবেল

Gun manao reakʼ sereń

¹ Enhilokʼ am dom mena, “E Probhu Isor, iń do amiń sarhaomea, ente iń cetanre edrem sodorleda; menkhan ńitokʼ amakʼ edre do caba akana ar jiwi raṛecʼem emạń kana.

² Sạriyakʼren, Isorge ińren babańcaoicʼ do; iń do uniregeń bhorsakʼkana, ar bạń botorokʼa. Probhu Isorge, ińakʼ daṛe ar ińakʼ sereń; ińren babańcaoicʼ doe uni kangea.”

³ Ona iạte ape do hulạsate bańcao reakʼ kũń khon dakʼpe loya.

⁴ Ape do enhilokʼpe mena, “Probhu Isor sarhaoepe, ar uniyakʼ gun reakʼ katha lại pasnaope; uni okae ceka akatʼ ona do sanam jạtrenko baḍae ocokope ar lại pasnaope, uni doe maraṅ utạricʼ kana.

⁵ Probhu Isor ńutumte sereńpe, ente uni do ṭhonok reakʼe kạmi akada; ar goṭa dhạrtire niạ katha do baḍae ocoype.

⁶ E Sionren hoṛko, ape do andoṛpe ar rạskạte sereńpe, ente Israelren uni sonoticʼ do maraṅgeae ape talare.”