Jeheskel 9 - সান্তালী বাইবেল

Jerusalem sạjạiyokʼ kana

¹ Ona tayom Isor do ãṭ aṛaṅte hohoate roroṛiń ańjomkedea, “E nagrahako jarkhar reakʼ kạmire bahal akan hoṛko, ape do maraokʼ reakʼ khanḍa bhanḍako nonḍe ạguiytape.”

² Unre utạr secʼ reakʼ cetan ṭhạ̃i reakʼ phaṭok duạr secʼ khon turui hoṛ hijukʼkan iń ńelketʼkoa; onko mimitʼkoakʼ tire do maraokʼ reakʼ khanḍa bhanḍako tahẽkana. Onko sãote mĩhĩ musnạ kicricʼ horokʼ akatʼ mitʼṭen hoṛe tahẽkana ar uniyakʼ ḍanḍare do olokʼicʼakʼ doat kạli hõ tahẽkana. Onko do bhitrite bolokate pitạl reakʼ pinḍ ṭhenko teṅgoyena.

³ Unre Israelren Isorakʼ oka ṭhonok do Kerubkin cetanre tahẽkan ona do onḍe khon rakapʼente mundil reakʼ duạr ganaḍe ṭhene senena. Ar Probhu Isor do mĩhĩ musnạ kicricʼ horokʼ akatʼ uni hoṛe hohowadea.

⁴ Uni doe metadea, “Am do Jerusalem nagraha talate parom calakʼme ar ona talare okako bạṛicʼakʼ kạmi hoyakan ar ona iạte okoeko kũhrạuetʼkan onkoakʼ moloṅre mitʼṭecʼ cinhạ emakom.”

⁵ Ona tayomiń ańjomkeda uni do onko turui hoṛe metakokana, “Ape do nagraha talate uni pańja idiyepe ar jãhãn daya mãyã baṅkate hoṛpe gocʼkoa, ar okoege alope aṛakʼkoa.

⁶ Haṛamko, juạnko, juạniko, maejiuko, ar kạṭicʼ gidrạko jotope gocʼkoa, menkhan okoekoakʼ moloṅre cinhạ menakʼ onko do alope joṭetʼkoa. Mundil khonge ona do ehobpe.” Onate onko do mundil samaṅre okoe murubbiko tahẽkan onko hoteteko ehopʼkeda.

⁷ Ona tayom Isor do onkoe metatʼkoa, “Gocʼ hoṛkote bakher raca perejpe ar mundil do bhonḍpe. Do calakʼpe, ar kạmipe.” Onate onko doko oḍokente nagrahate senkate hoṛ gogocʼko ehopʼena.

⁸ Unre iń do mundilre eskargeń tahẽkana. Ar ona jokhecʼ iń do ombakʼkateń menkeda, “Hae, Probhu Isor! Jerusalem cetanre amakʼ edrem dulte cetʼ Israelren sarecʼ sanam hoṛkom marao giḍikoa?”

⁹ Uni doe roṛ ruạṛadińa, “Israel ar Jihudạren hoṛkoakʼ ghạṭ do ḍhergetakoa; disạm do mãyãmte perecʼ akana ar nagraha do bedhorom kạmire unumakana. Onkoko meneda, ‘Probhu Isor do noa disạme bạgi akawada: onate uni do noako bae ńeletʼkana.’

¹⁰ Ona iạte onko do mãyãte bạń beṅgetʼakoa, ar aṛakʼ hõ bạń aṛakʼkoa; ar okako cekayetʼ ona reakʼ kuṛại do onkoreń dula.”

¹¹ Tayomte mĩhĩ musnạ kicricʼ horokʼ akatʼ uni hoṛ do ruạṛ hecʼkate noa khobore emena, “Iń do amakʼ hukum lekageń kạmi akada.”