Jeheskel 8 - সান্তালী বাইবেল

Jeheskelakʼ dosar dorson (8.1—10.22) Mundil oṛakʼre boṅga sewa

¹ Bondi dosare tahen turuiyakʼ bochor reakʼ turuiyakʼ cando reakʼ mõṛẽyakʼ dinre iń do tinre ińakʼ oṛakʼreń duṛupʼ akan tahẽkana ar Jihudạren murubbiko do iń samaṅre duṛupʼ akanko tahẽkana unre Probhu Isorakʼ ti do ona ṭhạ̃ire iń cetanre hecʼena.

² Iń doń beṅgetʼketʼ khan manwa leka mitʼ hoṛiń ńelkedea. Uniyakʼ ḍanḍa khon latar hạbicʼ do seṅgel leka, ar ḍanḍa khon cetan hạbicʼ do jhak jhakaokʼkan pitạl leka.

³ Uni do ti tiạrkate ińakʼ bohokʼ upʼe jhuṭiạuketʼtińạ. Ar Isorren Jiu do ot ar serma talareye rakapʼ idikedeńạ ar Isor emakʼ dorsonkote Jerusalem reakʼ koejoṅ oṛakʼ reakʼ bhitri raca reakʼ utạr secʼakʼ phaṭok duạr reakʼ bolokʼ horteye idikedińa. Onḍe do mitʼṭen boṅga muṭhạn tahẽkana ona iạte Isor do edrete pit caṛhaoade tahẽkana,

⁴ onḍe iń samaṅre Israelren Isorakʼ ṭhonok tahẽkana, okaṭakʼ do bilạn ṭạnḍire dorson hoteteń ńelletʼ.

⁵ Uni do ińe metadińạ, “E manwa hopon, utạr secʼ beṅgedme.” Onate iń do onteń beṅgetʼ rakapʼkeda ar pinḍ reakʼ duạrre, metakʼme utạr secʼ reakʼ phaṭok duạrte bolokʼ horre boṅga muṭhạniń ńelkeda.

⁶ Uni doe metadińạ, “E manwa hopon, onko cetʼko kạmikan ona do cetʼem ńeletʼkangea? Israelko do onḍe napṛakʼ napṛakʼ hirkhạwakʼko kạmikana ar ona iạte iń do ińakʼ sonot ṭhạ̃i khoniń pharakokʼ kana. Menkhan am do niạ khon hõ artetʼ bạṛicʼakʼ kạmikom ńela.”

⁷ Ona tayom uni do bakher racate bolokʼ horreye idikedińa. Iń do bhitre mitʼṭecʼ bhugạkʼ iń ńel ńamkeda.

⁸ Uni doe metadińạ, “E manwa hopon, bhit reakʼ ona bhugạkʼ do lạṭuime.” Ona iạte iń do ona bhugạkʼ iń lạṭukeda ar onḍe do mitʼṭecʼ duạriń ńel ńamkeda.

⁹ Uni do ińe metadińạ, “Am do bhitrite senkate onḍe oka bạṛicʼakʼ ar hirkhạwakʼko kạmikan ona ńelme.”

¹⁰ Onate iń do bhitrite bolokateń beṅgetʼ ạcurkeda ar bhit reakʼ sanam ṭhạ̃ire leńokʼkan jiwiyanko ar besapha janwarko ar Israelren sanam boṅga muṭhạnko ol caṛhao akan iń ńelkeda.

¹¹ Onako samaṅre Israelren gel eae murubbiko teṅgo akan ar onko talare Saphan hopon Jasaniạ teṅgo akaniń ńelkedea. Ar onko mimitʼkoakʼ tire do mitʼṭecʼkate dhup dạni tahẽkana ar ona khon dhũạ do rimil cetan secʼ rakabokʼkan tahẽkana.

¹² Uni do ińe metadińạ, “E manwa hopon, Israelkoren murubbiko ńutre apan ạpin oṛakʼren boṅgako ṭhen cetʼko cekayetʼkan dom bujhạu daṛeakʼ kangea? Onkoko meneda, ‘Probhu Isor do ale secʼ bae beṅgetʼeda, ente uni do disạm bạgikateye calao akana.’ ”

¹³ Uni do arhõe metadińạ, “Noa khon hõ onkoakʼ bạ̃ṛti hirkhạwanakʼ kạmikom ńela.”

¹⁴ Ona tayom uni do Probhu Isorakʼ oṛakʼ reakʼ utạr secʼakʼ phaṭok duạrte bolokʼ horreye ạgukedińa, ar ińiń ńelkeda onḍe maejiuko do duṛupʼkate Tamus debota lạgitʼko rakʼeda.

¹⁵ Uni do ińe metadińa, “E manwa hopon, am do cetʼ onam ńeletʼgea? Am do noa khon hõ ḍher hirkhạwakʼ jiniskom ńela.”

¹⁶ Ona tayom uni do Probhu Isorakʼ oṛakʼ bhitri reakʼ racareye idikedińa ar onḍe koejoṅ oṛakʼte bolokʼ hor reakʼ pinḍạre ar pinḍ talare bargel mõṛẽ hoṛko tahẽkana. Onko do Probhu Isorakʼ mundil secʼ deakate siń candoko sewawae kan tahẽkana.

¹⁷ Uni do ińe metadińạ, “E manwa hopon, am do cetʼ noam ńelkeda? Onḍe Jihudạren hoṛko oka bạṛicʼakʼko kạmiakatʼ onako do cetat reakʼ hõ baṅkana? Onko do santao iạte disạmko perecʼ akada ar ińakʼ pitko caṛhao ocoakatʼtińạ. Ńelme, onko do cetʼ lekako henosta akadińạ.

¹⁸ Onatege iń do edre seṅgelte onko sãoteń beohara; ar mãyãte do bạń beṅgetʼakoa ar aṛakʼ hõ bạń aṛakʼkoa. Ar ińakʼ lutur ṭhen ãṭ aṛaṅteko ragrehõ bạń ańjomtakoa.”