Jeheskel 7 - সান্তালী বাইবেল

Israel lạgitʼ sesokʼ do sorakana

¹ Probhu Isor do arhõe metadińa,

² “E manwa hopon, Israel disạm ṭhen iń Probhu Isor do noa kathań menetʼkana, ‘ńelme, sesokʼ reakʼ okte! Sesokʼ do disạm beṛhae khon daraekana!

³ Ńitge ona okte do am cetanre hecʼpaṛao akana ar am upạrte ińakʼ edre doń dula. Amakʼ colon lekań bicạrmea ar sanam hirkhạwakʼ kạmiko iạte amiń sạjạimea.

⁴ Iń do mãyãte hõ bạń beṅgetʼama ar aṛakʼ hõ bạń aṛakʼmea; amakʼ colon ar am bhitri reakʼ hirkhạwakʼ kạmiko iạte iń do khạṭigeń sạjạimea. Ar unrem baḍae daṛeakʼa, ińkangeạń Probhu Isor do. ’ ”

⁵ Probhu Isor do nonkae meneda, “Muhin! Mitʼṭecʼ maraṅ muhinge hijukʼ kana!

⁶ Ses okte do seṭer akana! Ape upạrte ona do rakapʼ akana, ar hecʼ seṭerakana!

⁷ Disạmre okoepe girobasokʼ kan ape cetanre sorbonas do hecʼ seṭerakana. Okte do hoyena, din hõ sorena; unre buru boṭkocʼko cetanre rạskạ reakʼ andoṛ bodolte botor reakʼ aṛaṅge ańjomokʼa.

⁸ Iń do usạrage ape cetanre ińakʼ edreń dula. Apeakʼ colon lekategeń bicạrpea ar apeakʼ sanam hirkhạwakʼ kạmiko khạtirtegeń sạjạipea.

⁹ Iń do mãyãte bạń beṅgetʼapea ar aṛakʼ hõ bạń aṛakʼpea; apeakʼ colon ar ape tala reakʼ hirkhạwakʼ kạmiko reakʼ kuṛạiyiń emapea. Ar unrepe baḍae daṛeakʼa, iń Probhu Isorgeń hạhạna mente.

¹⁰ “Ńelpe, din do hecʼena! Ona do seṭerakana! Sorbonas do oḍokʼ hecʼakana, ṭheṅgare baha bhoṭokʼ akana, bạḍại reakʼ baha do saṛ akana.

¹¹ Santao reakʼ ṭheṅgatege bedhoromkoakʼ sạjại do emogokʼa. Onkoakʼ lekha do ḍhergere hõ celege bako tahena, onkoakʼ dhon-durib se ṭhonok cetʼge baṅ tahentakoa.

¹² Okte do hoyena, din hõ seṭerena. Onate jumi kirińetʼkan hoṛ do aloko rạskạkʼma ar ạkhrińetʼko hõ aloko dukokʼ ma, ente onko sanamko cetanre edre do seṭerakana.

¹³ Kiriń ar ạkhriń kin bana hoṛ jiwetʼkin tahẽlenre hõ okoeye ạkhriń akatʼ uni do jumi bae ńam ruạṛa, ente noa dorson do sanam hoṛko lạgitʼ kana, ona do hoyokʼte hõ hoyokʼgea. Dusṭạmi hoṛko modre mitʼ hoṛ hõ acʼakʼ jiwi do bae rukhiyạ daṛeataea.

¹⁴ Hoṛko do sakwa oroṅkate sanamakʼko sapṛao dohoakada, menkhan lạṛhại lạgitʼ do celege bako oḍok calakʼkana, ente ińakʼ jaljalao edre do disạmren sanam hoṛko cetanre menakʼa.

¹⁵ “Nagraha bahrere do lạṛhại ar bhitrire do mahamạri ar akal menakʼa; ar okoe bahrereko tahen onko do lạṛhạiteko gujukʼa, ar okoe nagraha bhitrireko tahen onko do akal ar mahamạriteko jom ocokʼa.

¹⁶ Ar okoe jiwetʼko tahen arko ńir bańcaokʼ onko do jotoge buru boṭkocʼkoreko tahena ar mimitʼko do akoakʼ kại lạgitʼ buru nalaren potam lekako homor halaṅa.

¹⁷ Mimitʼkoakʼ ti do lạbṛujokʼtakoa ar mitʼke mitʼ gunṭhi do nijorokʼa.

¹⁸ Onko do gõṛẽ kicricʼko paṭhejoṅa ar botorteko thartharaokʼa. Onko do lajaoteko perejokʼa ar bohokʼ doko hoyo munḍrạ ocokʼa.

¹⁹ Akoakʼ rupạ do kulhikoreko giḍikakʼa ar akoakʼ sona do besaphawakʼ jinisge hoyokʼa. Probhu Isorakʼ edre hilokʼ onkoakʼ sona ar rupạ do bae rukhiyạ daṛeakoa. Onate onkoakʼ lacʼ do baṅ bikʼa se reṅgecʼ hõ baṅ cabakʼtakoa. Onko do onakoge kạireye paṛao ocoakatʼkoa.

²⁰ Onko do mońj mońj gohna iạteko gorbokʼkan tahẽkana ar onate akoren hirkhạwan boṅga muṭhạnko benaojoṅ kan tahẽkana. Onate iń do onako hirkhạwakʼ jinisgeń hoyoco akatʼtakoa.

²¹ Ar onako jinis do bidisiạkoakʼ tire ar luṭ reakʼ jinis lekate dhạrtiren dusṭạmikoakʼ tireń soprota; onko do onako besonota.

²² Ḍạkuko do ińakʼ sonot jaegare bolokate onako besonota, ar onko secʼ khon ińakʼ mẽtʼãhã doń ạcurtińạ.

²³ “Sikṛi do ṭhik akaege menakʼa, ente disạmre mãyãm joro ocoete ar nagraha do santaote perecʼakana.

²⁴ Onkoakʼ oṛakʼ-duạr dokhol lạgitʼ iń do jạt jạtrenko tala khon dusṭạmi jạtrenkoń ạgukoa. Iń do daṛeankoakʼ bạḍạiyiń rạpudtakoa, ar onkoakʼ sonot ṭhạ̃ikoń besapha ocoytakoa.

²⁵ Heṛan botor hecʼlen khan onko do suluk reakʼko ńam baṛaya menkhan bako ńama.

²⁶ Muhin cetan muhin hijukʼa, unạn cetan unạn ańjomokʼa. Onko do nạbiko ṭhen khon dorson reakʼ katha ańjom lạgitʼko kurumuṭuiya; naekekoakʼ ạn-ạri reakʼ cecetʼakʼ ar murubbikoakʼ sopolha do baṅ tahena.

²⁷ Raj doe homor halaṅa, rajkumar doe andesalekʼa, ar disạmren hoṛkoakʼ ti do thar tharaokʼtakoa. Iń do onkoakʼ colon lekage onko sãoteń beohara ar onkoakʼ kuṛại lekageń sạjạikoa. Unre onkoko baḍae daṛeakʼa, ińkangeạń Probhu Isor do.”