Jeheskel 6 - সান্তালী বাইবেল

Israelakʼ buru-boṭkocʼ upạrte nạbi katha

^1-3 Probhu Isorakʼ noa katha iń ṭhen sodorena, “E manwa hopon, am do Israelakʼ buru boṭkocʼ secʼ samaṅkate roṛme, Probhu Isor do onko upạrte noa kathae roṛeda, ‘E Israel reakʼ buru boṭkocʼko, ińakʼ katha ańjompe. Iń Probhu Isorge buru boṭkocʼko ar khạndṛuń ar nalakoń metapekana, iń do ape upạrte lạṛhại hotete apeakʼ pujạ reakʼ than boṭkocʼkoń marao giḍikakʼa.

⁴ Apeakʼ sanam pinḍko do maraokʼtapea ar apeakʼ dhudhup pinḍko hõ rạputʼ giḍikʼa. Aperen boṅga murhutʼko samaṅrege ‘aperen hoṛkoń gocʼkoa.

⁵ Israel hoponko reakʼ mạ̃ṛĩko do onkoren boṅga murhutʼko samaṅregeń dohoya ar pinḍ beṛhaete do apeakʼ jaṅkoń giḍikakʼa.

⁶ Ar jãhãregepe girobasokʼ onḍenakʼ nagrahako do jarkharokʼtapea ar than boṭkocʼko do ujạṛokʼa; onate apeakʼ pinḍko do marao utạrokʼtapea, aperen boṅga murhutʼko doko rạputʼ gejer ocokʼa, apeakʼ dhudhup pinḍko do makʼ lạnduṛokʼa ar apeakʼ benaoakʼ sanamakʼ do maraokʼtapea,

⁷ ar ape talarege aperen hoṛ doko gocʼ ocokʼa. Ar noako hoylen khanpe baḍae daṛeakʼa, iń kangeạń Probhu Isor do.

⁸ “ ‘Tobe thoṛa hoṛ do jiwetʼ iń dohokoa; aperen paskaokʼko do tinre eṭakʼ eṭakʼ disạm ar jạtrenko talareko chirchạturokʼa unre onko hoṛ do gujukʼ reakʼ ti khon rukhiyạko ńama.

⁹ Onko do boṅgan hoṛ jạtrenko talare iń reaṅ noa kathako disạya, onkoakʼ bepạtiạr ontor ar mẽtʼte cetʼ lekako duk ocoakadińạ mente; onkoakʼ ontor do iń khon ghańjeṛ akantakoa ar onkoakʼ mẽtʼ do boṅga murhutʼko ńamko lạgitʼ ahkaokʼ kantakoa. Onkoakʼ sanam bạṛicʼ ar hirkhạwakʼ kạmi lạgitʼ onko do apnartetʼko hirkhạjoṅa.

¹⁰ Unre onkoko baḍae daṛeakʼa, ińkangeạń Probhu Isor do; onko cetanre niạ muhin paṛao ocoy reakʼ katha ạuṛiyakʼ do bạń roṛakada.’ ”

¹¹ Ona tayom Probhu Isor do ińe metadińạ, “Am do ti thayoeme ar jaṅga do dhap dhapme ar menme, hae hae, Israel jạtrenkoakʼ sanam bạṛicʼakʼ ar hirkhạwakʼko ńutumte, ente onko do lạṛhạite, akalte ar mahamạriteko gujukʼa.

¹² Okoe sạṅgińre menakʼko onko do mahamạriteko gujukʼa ar okoe sorre menakʼko onko do lạṛhạiteko gujukʼa, ar okoe sarecʼko tahena onko do gherao esetʼ akan talare akal iạteko gujukʼa.

¹³ Israelko do akoakʼ pinḍ beṛhaeten boṅga murhutʼko talare, maraṅ maraṅ buru cetankore, darebuṭạkore ar hạṛiạṛ sakam darekore, debdạru buṭạkore, metakʼme okako ṭhạ̃ikore onkoren boṅga murhutʼko ńutumte jut mosola reakʼ dhupko jeretʼetʼ tahẽkan onako ṭhạ̃ire onko do gocʼ akanko tahena. Unre sarecʼ jiwetʼ tahen hoṛko baḍae daṛeakʼa iń kangeạń Probhu Isor do.

¹⁴ Israelko do jãhãregeko girobasokʼ iń do onko upạrte ińakʼ tiń calaoa ar hahaṅkar ṭoṭha khon Dibala hạbicʼ goṭa disạmge ujạṛakʼ ar dhaṅ dhaserakʼ iń hoeocoya. Unre onkoko baḍae daṛeakʼa, ińkangeạń Probhu Isor do.”