Jeheskel 5 - সান্তালী বাইবেল

¹ “E Manwa hopon, ńitokʼ am do amakʼ bohokʼ reakʼ upʼ ar goco hoyo saphae lạgitʼ mitʼṭecʼ laser holatʼ hataome ar nạpitakʼ khur leka beoharme. Ona tayom onako do tulạte pe ṭhen hạṭińme.

² Ar tinre nagraha reakʼ gherao dinko cabakʼa unre ona upʼ reakʼ pe hạṭiń reakʼ mitʼ hạṭiń do nagraha talare seṅgelrem atar giḍikakʼa. Ar pe hạṭiń reakʼ mitʼ hạṭiń upʼ do tarwaṛete nagraha beṛhaetem samakʼ kuṭrạya, ar pe hạṭiń reakʼ mitʼ hạṭiń upʼ do hoerem uḍiạu gotʼkakʼa. Ar ona tayom tayomte iń do tarwaṛeń kola.

³ Menkhan thoṛa upʼ dohokate amem horokʼ akatʼ kicricʼrem rebetʼ dohokakʼa.

⁴ Ona tayom do arhõ thoṛa upʼ hataokate seṅgelrem atar giḍikakʼa. Ar seṅgel do onḍe khon goṭa Israel jạtrenko talare pasnaokʼa.

⁵ “Iń Probhu Isorgeń meneda, noa do Jerusalem kana. Iń do jạt jạtrenko talare onań dohoakada; ar ona beṛhaete do aema disạmko menakʼa.

⁶ Menkhan onakoren do ińakʼ ạnko upạrte bebạṛicʼko ṭhok akada, boṅgan hoṛ jạtrenko khon bạ̃ṛtige dusṭạmiko kạmi akatʼte, ar ińakʼ ạriko upạrte beṛhaeteakʼ disạmkorenko khon bạ̃ṛtige; ente ińakʼ ạnkoko phesṛao giḍi akada ar ińakʼ ạrikore hõ bako taṛamakada.

⁷ “Onate iń Probhu Isoriń meneda, E Jerusalem, am beṛhaeteakʼ disạmko khon hõ bạ̃ṛtim bạṛicʼ akana. Am do ińakʼ niạm bam ańjomakada ar ińakʼ ạn ạriko hõ manao tińme. Am beṛhaeten jạtrenko hõ niạm lekate bako calao akana.

⁸ Ona iạte ińge am upạrte, ar boṅgan hoṛ jạtrenkoakʼ mẽtʼ samaṅreń sạjạimea.

⁹ Amren hirkhạwan sanam boṅgako iạte am cetanre okań cekae ona do tishõ bạń onka akada ar tishõ bạń onkaea.

¹⁰ Ona iạte am talaren apatko do akoren gidrạkoakʼ jelko joma ar gidrạko do akoren apatkoakʼ jelko joma. Iń do amiń sạjạimea ar amre sarecʼ jiwetʼ tahen hoṛ do beṛhaeteń chirchạturkoa.

¹¹ Ona iạte iń Probhu Isor do ińre kiriạkateń meneda, amren sanam hirkhạwan boṅga murtiko ar hirkhạwakʼ kạmikote ińakʼ oṛakʼem besapha akatʼte iń do ińakʼ dayań ocogtińạ; ar am secʼ do bạń beṅgeda ar mãyã hõ bạń mãyãwama.

¹² Amren pe hạṭiń reakʼ mitʼ hạṭiń hoṛ do am talare mahamạrite ar baṅkhan akalteko gujukʼa ar pe hạṭiń reakʼ mitʼ hạṭiń do pạcri bhit bahrere lạṛhạiteko gujukʼa ar pe hạtiń reakʼ mitʼ hạṭiń do beṛhaeteń chirchạturkoa ar tarwaṛe do onkoe khudạu baṛakoa.

¹³ “Niạko tayom ińakʼ heṛan edre do cabakʼa; onko cetanre ińakʼ edre purạteń upʼako tayom iń doń hapekʼa. Ar unreko baḍae daṛeakʼ, ińakʼ ontor reakʼ jaljalao iạte iń Probhu Isor do noa kathań meneda.

¹⁴ “E Jerusalem, am beṛhaeten jạtrenko modre okoe do am aṛeteko parom calakʼ onkoakʼ mẽtʼ samaṅre dhaṅdhasericʼ ar landa-dhutʼicʼ iń hoyocomea.

¹⁵ Iń do tinre heṛan edre, ar raṅgao ar heṛan eger hotete amiń sạjạimea unre am beṛhaeten jạtrenko do am ńelteko tharbasaokʼa; onko ṭhen am do nihạ̃t ar landa-dhutʼicʼgem hoyokʼa ar mitʼṭecʼ sontoricʼ lekage.

¹⁶ Am maraome lạgitʼge am cetanre akal reakʼ botoranakʼ sariń aṛaga. Iń do am cetanre ona akal arhõń ḍher ocoya ar amakʼ jomakʼ reakʼ jogaṛ hõń bond ocoya.

¹⁷ Am upạrte iń do akal ar jojom janwarkoń kolkoa; onko do amren hoponkoko jomkoa. Mahamạri ar mãyãm do amre ạtukʼa ar iń do am upạrte lạṛhạiyiń ạguiya. Iń Probhu Isorge noa katha doń meneda.”