Jeheskel 48 - সান্তালী বাইবেল

Jumi hạṭińokʼ reaṅ

¹ Ona tayom Probhu Isore menkeda, “Gusṭirenko lekate disạm reakʼ jumi hạṭiń do nonka leka hoyokʼa. Disạm reakʼ utạr simạnare Dan do mitʼṭecʼ hĩse ńama; ona do maraṅ jalapuri khon Hethlon reakʼ hor samaṅ secʼte Hamat hạbicʼ; ar onḍe khon purub secʼ Damesek reakʼ utạr simạ aṛe Hasar-enan hạbicʼ, metakʼme Hamat simạna hạbicʼge.

² Aser hõ mitʼṭecʼ hĩse ńama; ona do hoyokʼa purub khon pạchim Dan simạna reakʼ dạkhin hạbicʼ.

³ Naphtali hõ mitʼṭecʼ hĩse ńama; ona do hoyokʼa purub khon pạchim Aser simạ reakʼ dạkhin hạbicʼ.

⁴ Manase hõ mitʼṭecʼ hĩse ńama; ona do hoyokʼa purub khon pạchim Napthali simạ reakʼ dạkhin hạbicʼ.

⁵ Ephrayim hõ mitʼṭecʼ hĩse ńama; ona do hoyokʼa purub khon pạchim Manase simạna reakʼ dạkhin hạbicʼ.

⁶ Ruben hõ mitʼṭecʼ hĩse ńama; ona do hoyokʼa purub khon pạchim Ephrayim simạna reakʼ dạkhin hạbicʼ.

⁷ Jihudạ hõ mitʼṭecʼ hĩse ńama; ona do hoyokʼa purub khon pạchim Ruben simạna reakʼ dạkhin hạbicʼ.

⁸ “Jihudạ simạna dạkhinre purub khon pạchim hạbicʼ oka jaega tahen ona do bises kạmi lạgitʼpe begar dohokakʼ. Ona do osarte hoyokʼa bargel mõṛẽ hajar ḍaṅ ar jeleń do eṭakʼ gusṭirenkoakʼ hĩs leka disạm reakʼ purub simạna khon pạchim simạna hạbicʼ; ar ona jaega talare do mundil oṛakʼ tahena.

⁹ Ona begar dohokakʼ jaega khon mitʼṭecʼ bises hĩs do Probhu Isorpe emaea; ona do bargel mõṛẽ hajar ḍaṅ jeleń ar osar do gel hajar ḍaṅ hoyokʼa.

¹⁰ Noa do hoyokʼa naekeko lạgitʼ mitʼṭecʼ sonot hĩs. Utạr ar dạkhin secʼ noa do bargel mõṛẽ hajar ḍaṅ jeleń ar pạchim ar purub secʼ do gel hajar ḍaṅ osar. Ona talare do Probhu Isorakʼ oṛakʼ tahena.

¹¹ Noa bises hĩs do hoyokʼa iń ńutumte begar dohoakatʼ Sadok bõsren naekeko lạgitʼ. Onko do iń sewawạńre pạtiạranko tahẽkana ar Israelko sãote bạṛicʼ horteko senlen Liwiko leka bạṛicʼ horte do bako senlena.

¹² Noa do hoyokʼa disạm reakʼ sonot hĩs khon onko lạgitʼ mitʼṭecʼ bises hĩs; noa hĩs do Liwikoakʼ hĩs reakʼ simạna aṛerege tahena, ar noa do sonot utạrakʼ ṭhạ̃ige hoyokʼa.

¹³ “Naekekoakʼ simạna aṛere Liwiko do bargel mõṛẽ hajar ḍaṅ jeleń ar gel hajar ḍaṅ osar mitʼṭecʼ ṭhạ̃iko ńama.

¹⁴ Liwiko ona jumi do bako ạkhriń daṛeakʼa se akoakʼ hĩs hõ bako bodol daṛeakʼa. Ona do joto khon bhageakʼ jumi kana ar eṭakʼkoakʼ tire ona emako do baṅ ganokʼa, ente Probhu Isor ńutumte ona do sonot akana.

¹⁵ “Sarecʼ mõṛẽ hajar ḍaṅ osar ar bargel mõṛẽ hajar ḍaṅ jeleń ṭhạ̃i do nagraharen hoṛko lạgitʼ hoyokʼa, metakʼme oṛakʼ-duạr ar janwar ạtińko lạgitʼ beoharokʼa. Nagraha do ona talare tahena;

¹⁶ ar ona nagraha beṛhaeteakʼ jokha do pon hajar mõṛẽsae ḍaṅ hoyokʼa.

¹⁷ Nagraha beṛhaete janwar ạtińko reakʼ ṭhạ̃i do barsae mõṛẽgel ḍaṅ tahena.

¹⁸ Noa nagraha reakʼ purub aṛe reakʼ gel hajar ḍaṅ ar pạchim aṛe reakʼ gel hajar ḍaṅ ṭhạ̃ire oka phosol hoyokʼ ona do nagraharen kạmiyạkoakʼ jomakʼ hoyokʼa.

¹⁹ Israelren sanam gusṭiko khon okoe do noa nagrahareko kạmi onkoge noa jumiko casa.

²⁰ Ona begar dohoakatʼ purạ ṭhạ̃i do bargel mõṛẽ hajar ḍaṅkate mitʼṭecʼ dokhol jaega tahena. Noa jaega talare tahena ona sonot hĩs ar nagraha ar ona aḍepase reakʼ jaega.

^21-22 Ona begar dohoakatʼ jaega reakʼ purub ar pạchim aṛe reakʼ jaega do disạm cakʼlaoyicʼ lạgitʼ tahena. Niạ banar jaega utạr ar dạkhin reakʼ jokha do begar dohoakatʼ jaega leka bargel mõṛẽ hajar ḍaṅ tahena. Noa banar jaega do disạm reakʼ purub ar pạchim simạna hạbicʼ calakʼa. Ar nonkate disạm cakʼlaoyicʼakʼ jaega reakʼ talare mundil oṛakʼ sudhạ naekekoakʼ jaega, Liwikoakʼ jaega ar nagraha reakʼ jaega hoyokʼa. Disạm cakʼlaoyicʼakʼ niạ jaega do utạrre Jihudạ ar dạkhinre Benjạminakʼ jaega reakʼ simạna talare tahena.

²³ “Sarecʼ gusṭiko talare Benjạmin do mitʼṭecʼ hĩse ńama; ona do hoyokʼa purub khon pạchimre begar dohoakatʼ jaega reakʼ dạkhinre.

²⁴ Simeon hõ mitʼṭecʼ hĩse ńama; ona do hoyokʼa purub khon pạchimre Benjạmin simạna reakʼ dạkhinre.

²⁵ Isakar mitʼṭecʼ hĩse ńama; ona do hoyokʼa purub khon pạchimre Simeon simạna reakʼ dạkhinre.

²⁶ Sebulon hõ mitʼṭecʼ hĩse ńama; ona do hoyokʼa purub khon pạchimre Isakar simạna reakʼ dạkhinre.

²⁷ Gad hõ mitʼṭecʼ hĩse ńama; ona do hoyokʼa purub khon pạchimre Sebulon simạna reakʼ dạkhinre.

²⁸ Gad reakʼ dạkhin simạna do hoyena disạm reakʼ dạkhin simạna hạbicʼ. Ona do Tamar khon Kades Meribath dakʼ hạbicʼ senkate Misor reakʼ rohoṛ gaḍa samaṅ secʼte maraṅ jalapuri hạbicʼ.

²⁹ Noa disạm do Israelren gusṭiko sompotti lekatepe hạṭińakoa, ar noakoge hoyokʼa onkoakʼ hĩs do. Iń Probhu Isorge noa katha doń menetʼkana.

Nagraha reakʼ phaṭok duạrko

^30-31 “Nagraha khon bahrete calakʼ reakʼ adomakʼ phaṭok duạrko tahena. Israelren gusṭikoakʼ ńutum lekate ona phaṭok duạrko reakʼ ńutum do emogokʼa. Pon hajar mõṛẽsae ḍaṅ utạr secʼakʼ bhitre do pea duạr tahena. Onako reakʼ ńutum do hoyokʼa Ruben-duạr, Jihudạ-duạr ar Liwi-duạr.

³² Pon hajar mõṛẽsae ḍaṅ purub secʼakʼ bhit reakʼ pea duạr reakʼ ńutum do hoyokʼa Joseph-duạr, Benjạmin-duạr ar Dan-duạr.

³³ Pon hajar mõṛẽsae ḍaṅ dạkhin secʼ bhit reakʼ pea duạr reakʼ ńutum do hoyokʼa Simeon-duạr, Isakhar-duạr ar Sebulon-duạr.

³⁴ Pon hajar mõṛẽsae ḍaṅ pạchim secʼ bhit reakʼ pea duạr reakʼ ńutum do hoyokʼa Gad-duạr, Aser-duạr ar Napthali-duạr.

³⁵ Nagraha beṛhaete bhit reakʼ jokha do hoyokʼa gel irạl hajar ḍaṅ. Ar un khon nagraha reakʼ ńutum do hoyokʼa, ‘Probhu Isor do nonḍege menaea.’ ”