Jeheskel 47 - সান্তালী বাইবেল

Mundil oṛakʼ khon oḍok hecʼakan gaḍa

¹ Ona tayom uni do mundil oṛakʼte bolokʼ hor ṭhene ruạṛ ạgukedińa, ariń ńelkeda mundil oṛakʼte bolokʼ hor reakʼ kandha khon dakʼ do purub secʼ ạtu oḍokokʼ kana. Mundil oṛakʼ do purub secʼ samaṅ akan tahẽkana. Ona dakʼ do mundil oṛakʼ reakʼ dạkhin aṛe reakʼ kandha khon pinḍ reakʼ dạkhin aṛete ạtu calakʼkan tahẽkana.

² Tayomte uni do utạr phaṭok duạr talateye oḍok ạgukedińa ar bahre horteye ạcur idikedeńte purub secʼ samaṅ akan phaṭok duạr ṭhene idikedeńạ; ona phaṭok reakʼ dạkhin aṛete thoṛa dakʼko atu calakʼkan tahẽkana.

³ Jokha baber hataokate uni do jokha jokhate mitʼ hajar moka purub secʼe sen idiyena. Onḍe uni do sebecʼ sebecʼ dakʼ talateye idikedińa.

⁴ Ona tayom mitʼ hajar mokae jokhaketʼ khan gunṭhi soman dakʼ talateye idikedińa. Ona tayom uni do ar mitʼ hajar mokae jokhaketʼte ḍanḍa soman dakʼ talateye idikedińa.

⁵ Ona tayom uni do ar mitʼ hajar mokae jokhakeda, menkhan dakʼ do unre gaḍa leka hoyena ar iń do bạń parom daṛeada, ente dakʼ do perecʼ idikʼkan tahẽkana ar paerakʼ leka khạndri tahẽkana. Ar nonkan gaḍa hoyena one ona do celege bako taṛam parom daṛekea.

⁶ Uni do ińe metadińạ, “E manwa hopon, noa do cetʼem ńeleda?” Ona tayom uni do gaḍa aṛeteye ruạṛ idikedińa.

⁷ Onḍe seṭerkate iń do gaḍa banarsa aṛerege aema darekoń ńelkeda.

⁸ Uni do ińe metadińa, “Noa dakʼ do purub secʼ ạtu calakʼ kana ar Araba talate doreãore senkate dulokʼ kana. Ar tinre ona do doreãore ńurokʼkana unre onḍenakʼ dakʼ do heṛemokʼ kana.

⁹ Oka secʼ lekate noa gaḍa ạtu calakʼa onḍe do joto lekan jhake jhak jiwetʼ jiwiyanko ar hakoko tahena. Ar noa dakʼ oka secʼte calakʼa onḍenakʼ dakʼ doe heṛem ocoya; onatege oka secʼte gaḍa ạtu calakʼa onḍenakʼ jotowakʼge jiwedokʼa.

¹⁰ Jạilạko do gaḍa aṛereko teṅgona; En gedi khon En Eglayim hạbicʼ do jhạli tase reakʼ jaega hoyokʼa. Ar onḍehõ jalapuri leka aema lekan hakoko ńamokʼa.

¹¹ Menkhan dalahe ar bil reakʼ dakʼ do baṅ heṛemokʼa; onako do buluṅ lạgitʼ tahena.

¹² Gaḍa reakʼ banar aṛetege sanam lekanakʼ jo reakʼ dare janamokʼa. Onako reakʼ sakam do baṅ tolmojokʼa, ar jo hõ baṅ cabakʼa. Jao candoge onare do jokʼa, ente mundil oṛakʼ khon onḍe do dakʼ ạtu hijukʼa. Onako reakʼ jo jom lạgitʼ ar sakamko do bogekʼ lạgitʼ beoharokʼa.”

Israel disạm reakʼ simạna

^13-14 Ona tayom Probhu Isore menkeda, “Ape do sompotti lekate Israelren gelbar gusṭiko talare disạm do nonkage hạṭińakope. Ape sanamkoge somantepe hạṭińa menkhan Joseph do bar hạṭińe ńam daṛeakʼ. Noa disạm do aperen hapṛamko emako lạgitʼgeń kiriạlena ar noa disạm do apeakʼ sompottige hoyokʼa.

¹⁵ “Disạm reakʼ simạna do hoyokʼa nonka: utạr secʼakʼ simạna do hoyokʼ maraṅ doreão khon Hethlon secʼte Sedad hạbicʼ;

¹⁶ onḍe khon Damesek ar Hamat reakʼ simạna talare menakʼ Berothat ar Sibrayem hạbicʼ; ar onḍe khon Haoran simạna aṛe reakʼ Haser-enon hạbicʼ.

¹⁷ Noa simạna do calakʼa maraṅ doreão khon Damesek reakʼ utạr simạna aṛete Haser-enon hạbicʼ, metakʼme Hamat simạ hạbicʼge. Ar noage hoyokʼa utạr senakʼ simạna do.

¹⁸ Purub secʼ reakʼ simạna Haoran ar Damesek talate Gilead ar Israel disạm tala reakʼ jordan gaḍa secʼte senkate doreão hạbicʼ. Ar noage hoyokʼa purub secʼ reakʼ simạna do.

¹⁹ Dạkhin secʼ reakʼ simạna do doreão reakʼ Tamar khon Kadesh reakʼ Meribath dakʼko hạbicʼ senkate Misor reakʼ rohoṛ gaḍa secʼte maraṅ jalapuri hạbicʼ. Ar noage hoyokʼa dạkhin reakʼ simạna do.

²⁰ Pạchim secʼ reakʼ simạna do maraṅ jalapuri secʼte Hamat reakʼ botolo mũhạ̃ mũhĩ hoyokʼa. Ar noage hoyokʼa pạchim reakʼ simạna do.

²¹ “Israelren gusṭiko lekate disạm do ape talare hạṭiń joṅpe.

²² Okoe bidisiạko akoren hopon ar hoponerakoante ape talareko girobasokʼ kan onko lạgitʼ ar ape lạgitʼ disạm do sompotti lekatepe hạṭińjoṅa. Onko do disạmreko janam akan Israel menteko lekhakʼa. Ape sãote onko hõ Israel gusṭiko talare sompotti lekate jumi reakʼ hạṭińko ńama.

²³ Okoe gusṭiko talare onko bidisiạko girobasokʼ kan onḍege onko do jumi reakʼ ạidạri emakope. Iń Probhu Isorge noa katha doń meneda.”