Jeheskel 46 - সান্তালী বাইবেল

¹ “ ‘Iń Probhu Isorgeń menetʼkana, bhitri raca reakʼ purub duạr do kạmi reakʼ turui dinge siń tahena, menkhan jirạukʼmãhãre ar molokʼ candore ona do jhijokʼa.

² Unre disạm cakʼlaoyicʼ do bahre khon phaṭok duạr bolokʼ kandhate bolokate phaṭok duạr reakʼ khunṭikin aṛere teṅgokʼ hoyokʼtaea. Ar naekeko do uniyakʼ jeredokʼ samaṅokʼakʼ ar sulukren samaṅokʼakʼ porobko hoeocoya. Phaṭok duạrte bolokʼ horre uni do sekʼwa baṛakateye oḍokokʼa, menkhan ńindạ hạbicʼ phaṭok do jhicʼge tahena.

³ Hoṛko hõ jirạukʼ mãhãre ar molokʼ candore ona phaṭok duạr bahrere Probhu Isorko sewawaea.

⁴ Jirạukʼmãhã hilokʼ disạm cakʼlaoyicʼ do Probhu Isor ńutumte jeredokʼ samaṅokʼakʼ lạgitʼ turui goṭen bheḍa hopon ar mitʼṭen bheḍa ạguiye hoyokʼtaea; onko do jemon niphuṭ utạrko hoyokʼ.

⁵ Bheḍa sãote anaj samaṅokʼakʼ lạgitʼ gel irạl keji holoṅ emokʼ hoyokʼtaea ar bheḍa hoponko sãote do kusiyakʼ bhor holoṅe emokʼa; mimitʼ gel irạl keji holoṅ lạgitʼ pe liṭar eae sae mõṛẽgel gram sunum emokʼ hoyokʼtaea.

⁶ Molokʼ cando hilokʼ uni do mitʼṭen ḍaṅgra ar turui goṭen bheḍa hopon ar mitʼṭen bheḍa samaṅko hoyokʼtaea; onko do niphuṭ utạrko hoyokʼ jạruṛa.

⁷ Ar ḍaṅgra sãote uni do gel irạl keji holoṅ ar bheḍa sãote gel irạl keji holoṅ ar bheḍa hoponko sãote do kusiyakʼ bhor holoṅ anaj samaṅokʼakʼ lekate emokʼ hoyokʼtaea; mimitʼ gel irạl keji holoṅ lạgitʼ pe liṭar eae sae mõṛẽgel gram sunum emokʼ hoyokʼa.

⁸ Disạm cakʼlaoyicʼ do phaṭok duạrte bolokʼ kandha talate bhitrite bolokʼ hoyokʼtaea ar inạ hortege onḍe khon oḍok hijukʼ hoyokʼtaea.

⁹ “ ‘Niṭ akatʼ sanam porob jokhecʼ disạmren hoṛko do tinre sekʼwae lạgitʼ Probhu Isor samaṅreko hijukʼa unre jãhãege utạr phaṭok duạrteye bolokʼ uni do dạkhin phaṭok duạrteye oḍokokʼa ar okoe dạkhin phaṭok duạrteye bolokʼ uni do utạr phaṭok duạrte oḍokokʼ hoyokʼtaea. Hoṛko oka phaṭok duạrteko bolokʼ ona phaṭok duạrte do bako oḍokokʼa, menkhan mitʼke mitʼ hoṛ do bolokʼ phaṭok duạr reakʼ ulṭạ secʼakʼ phaṭok duạrte oḍok calakʼ hoyokʼtakoa.

¹⁰ Bhitrite bolokʼ jokhecʼ disạm cakʼlaoyicʼ do hoṛko sãote bhitrite bolokʼ hoyokʼtaea ar bahrete oḍokokʼ jokhecʼ hõ hoṛko sãotege oḍok hijukʼ hoyokʼtaea.

¹¹ “ ‘Porob ar niṭ akatʼ bhoj jokhecʼ mitʼṭen ḍaṅgra lạgitʼ gel irạl keji holoṅ, bheḍa lạgitʼ gel irạl keji holoṅ ar bheḍa hoponko lạgitʼ kusiyakʼ bhor holoṅe emokʼa; mimitʼ gel irạl keji holoṅ sãote pe liṭar eae sae mõṛẽgel gram sunum emokʼ hoyokʼa.

¹² Disạm cakʼlaoyicʼ do tinre Probhu Isor ńutumte acʼakʼ kusite jãhãnakʼ samaṅokʼakʼe samaṅa, baṅ do jeredokʼ samaṅokʼakʼ ar baṅ do sulukren samaṅokʼakʼ, unre uni lạgitʼ purub secʼ samaṅ akan phaṭok duạrko jhicʼaea. Uni do jirạukʼmãhã lekage acʼakʼ jeredokʼ samaṅokʼakʼ se sulukren samaṅokʼakʼe samaṅa. Ona tayom bahreteye oḍoklen khan phaṭok duạr do sińokʼa.

¹³ “ ‘Probhu Isor ńutumte jeredokʼ samaṅokʼ lạgitʼ ape do din hilokʼ mitʼṭenkate mitʼ bochorren niphuṭ utạr bheḍa hopon samaṅe hoyokʼtapea; din hilokʼ setakʼ jokhecʼ ona do kạmi hoyokʼtapea.

¹⁴ Ona chaḍa niạ sãote din hilokʼ setakʼre apeakʼ anaj samaṅokʼakʼ jinis hõ emokʼ hoyokʼtapea; onare tahena pe keji holoṅ ar onare sipiy lạgitʼ mitʼ liṭar barsae mõṛẽgel gram sunum. Noa do Probhu Isor ńutumte anaj samaṅokʼakʼ reakʼ porob reakʼ mitʼṭecʼ niạm kana.

¹⁵ Nonkage jao hilokʼ jeredokʼ samaṅokʼakʼ lạgitʼ setakʼre bheḍa hopon ar anaj samaṅokʼakʼ lạgitʼ holoṅ ar sunum hõ emokʼ hoyokʼa.

¹⁶ “ ‘Iń Probhu Isor do arhõń menetʼkana, jodi disạm cakʼlaoyicʼ acʼakʼ sompotti khon acʼren jãhãe hopon jãhãṭakʼ jaegae danae enḍekhan uniren bõsko hõ ạidạri tahentakoa. Onko do ona sompottiren ạidạrikoko hoyokʼa.

¹⁷ Menkhan uni do acʼakʼ sompotti khon acʼren jãhãe guti jãhãn ṭhạ̃iye danae enḍekhan uni guti do chuṭạ bochor hạbicʼ ona doe doho daṛeakʼa; ona tayom arhõ ona do disạm cakʼlaoyicʼakʼ dokholre ruạṛ hijukʼa. Disạm cakʼlaoyicʼakʼ sompotti do eken uniren hopongeko ńama; ar ona do onkoakʼge hoyokʼtakoa.

¹⁸ Disạm cakʼlaoyicʼ do onko hoṛkoe laga ńir lekorehõ onkoakʼ jãhãn sompotti do bae dokhol daṛeatakoa. Uni do eken acʼakʼ sompotti khonge acʼren hoponkoe em daṛeakoa jemon ińren hoṛko mod khon celege uniyakʼ sompottiren mạlikana aloko adtako.’ ”

¹⁹ Ona tayom uni manwa do phaṭok duạr aṛe reakʼ bolokʼ horte naekekoakʼ utạr secʼ samaṅ akan sonot dolan samaṅreye ạgukedińa. Uni do dolan reakʼ pạchim secʼ reakʼ ses simạnare mitʼṭecʼ ṭhạ̃iye udukʼạdińa.

²⁰ Uni do ińe metadińạ, “Noa do ona ṭhạ̃i kana one okare naekeko do dos ńutumte samaṅokʼakʼ ar kại ńutumte samaṅokʼakʼ jelko teke isin ar anaj samaṅokʼakʼ jinisko sekao isin jemon ona sonot jinisko bahre racare ạgu baṅ lagaoako, ente jãhãe hoṛge onae joṭed uni do Probhu Isor ńutumteye begar utạrokʼa.”

²¹ Ona tayom uni do bahre racareye ạgukedeńte ona reakʼ ponon kona secʼteye ạcur idikedińa, iń do mimitʼ konare ar mitʼṭecʼkate huḍiń racań ńelkeda.

²² Pạcrite esetʼ ona huḍiń racako reakʼ jokha do pongel moka jeleń ar pegel moka osar tahẽkana. Mimitʼ racako do mitʼ leka jokhage tahẽkana.

²³ Ona ponea raca reakʼ mimitʼ goṭecʼ bhitri reakʼ beṛhaeteakʼ bhit sãote lagao akatʼ dhiri reakʼ tak tahẽkana ar ona tak latarre beṛhaete culhạ tahẽkana.

²⁴ Uni do ińe metadińạ, “Noako do culhạ kana; okoe mundil oṛakʼ reakʼ sekʼwa kạmiko kạmi onko do onḍe hoṛkoakʼ samaṅokʼakʼ jinisko isina.”