Jeheskel 45 - সান্তালী বাইবেল

Disạm hạṭiń reakʼ

¹ “ ‘Ape do sompotti lekate disạm reakʼ jumi tinrepe hạṭińa unre bargel mõṛẽ hajar ḍaṅ jeleń ar bargel hajar ḍaṅ osar disạm reakʼ mitʼ hĩs jumi do Probhu Isorpe emaea; ona purạ elakage sonotakʼ ṭhạ̃i hoyokʼa.

² Ona tala khon mõṛẽ sae ḍaṅ jeleń ar mõṛẽ sae ḍaṅ osar mitʼṭecʼ hĩs do mundil oṛakʼ lạgitʼ tahena; ar ona beṛhaete do mõṛẽgel moka phaelao jaega hõ tahena.

³ Ona sonot ṭhạ̃i reakʼ tala khon bargel mõṛẽ hajar ḍaṅ jeleń ar gel hajar ḍaṅ osar mitʼṭecʼ hĩsem jokha dohokakʼa. Noa hĩsrege mundil oṛakʼ, metakʼme sonot utạrakʼ ṭhạ̃i do tahena.

⁴ Noa hĩs do naeke lạgitʼ kana; ona do sonotgea. Naekeko do mundil oṛakʼre sapʼsor kạmikate ar Probhu Isorakʼ sekʼwae lạgitʼ uni samaṅreko laha idikʼa. Ar ona ṭhạ̃ige hoyokʼa onkoakʼ oṛakʼ-duạr ar mundil oṛakʼ lạgitʼ sonotakʼ ṭhạ̃i.

⁵ Sarecʼ bargel mõṛẽ hajar ḍaṅ jeleń ar gel hajar ḍaṅ osar ṭhạ̃i do onko Liwikoakʼ ạidạrire tahena one okoe do mundil oṛakʼ reakʼ kạmiko kạmi idi. Onko do onḍegeko girobasokʼa.

⁶ “ ‘Sonot ṭhạ̃i aṛere mõṛẽ hajar ḍaṅ osar ar bargel mõṛẽ hajar ḍaṅ jeleń mitʼṭecʼ hĩs do nagraha lạgitʼ dohoy hoyokʼa. Ona nagraha do goṭa Israel jạtrenko lạgitʼge tahena.

⁷ “ ‘Sonot ṭoṭha ar nagraha simạna reakʼ purub ar pạchim aṛe reakʼ jumi do disạm cakʼlaokoakʼ hoyokʼa. Disạm cakʼlaoyicʼakʼ noa banar ṭhạ̃i do disạm reakʼ pạchim ar purub simạna hạbicʼ hoyokʼtaea. Ar noa ṭhạ̃i reakʼ utạr ar dạkhin reakʼ jokha do sonot ṭoṭha ar nagraha reakʼ utạr dạkhin reakʼ jokha somange hoyokʼa.

⁸ Niạ ṭhạ̃ire Israel disạmren disạm cakʼlaoko do ińren hoṛko ar bako santaokoa, bickom Israel jạtrenko do akoakʼ gusṭirenko lekate jumiko hạṭińakoa.

⁹ “ ‘E Israelren disạm cakʼlaoko, iń Probhu Isorgeń menetʼkana, ḍherge hoyakana. Ńitokʼ do jor julum ar santao bạgikate dhorom ar bhage reakʼ kạmipe. Ińren hoṛkoakʼ jaega apeakʼ dokholre ạgui do bạgipe.

¹⁰ Ape do tulạ ar eṭakʼ sosoṅakʼ jinisko ṭhik leka tahentape ma.

¹¹ Epha ar bath do mitʼ somange hoyokʼma; mitʼ bath do homer reakʼ gel hạṭiń reakʼ mitʼ hạṭiń hoyokʼma; noa banar sosoṅakʼge hoyokʼa homer leka.

¹² Mitʼ sekelre do bargel gira tahena. Ar mitʼ manehre turui gel sekel tahena.

Sandes ar sonotakʼ din

¹³ “ ‘Ar dan lekate okape em ona do hoyokʼkana: apeakʼ sanam guhum reakʼ turui gel hạṭiń reakʼ mitʼ hạṭiń, ar sanam jao reakʼ turui gel hạṭiń reakʼ mitʼ hạṭiń,

¹⁴ sanam jạitun sunum reakʼ mitʼsae hạṭiń reakʼ mitʼ hạṭiń. Sunum soṅ lạgitʼ do bath beohar hoyokʼa. Gel bath soman do mitʼ homer ar mitʼ homer soman do mitʼ kor.

¹⁵ Israel disạm talare bhage jumireko ạtiń nonkan mimitʼ barsae bhiḍi-merom khon mitʼṭen hopon emokʼ hoyokʼtapea. Hoṛkoakʼ kại puruchun lạgitʼ noako do anaj samaṅokʼakʼ, jeredokʼ samaṅokʼakʼ ar sulukren samaṅokʼ lạgitʼko beoharokʼa.

¹⁶ Disạmren sanam hoṛ do Israelren disạm cakʼlaoyicʼ noa sandesko emaea.

¹⁷ Ar disạm cakʼlaoyicʼ do sanamakʼ porobko, molokʼ candoko reakʼ ar jirạukʼ mãhã lạgitʼ, metakʼme Israel jạtrenkoakʼ niṭ akatʼ sanamakʼ porobko lạgitʼ jeredokʼ samaṅokʼakʼ lạgitʼ, anaj samaṅokʼakʼ lạgitʼ, coḍor samaṅokʼakʼ lạgitʼ jiniskoe kulạu juṛạua. Uni do Israelkoakʼ kại ńutumte puruchunokʼ lạgitʼ samaṅokʼakʼ, anaj samaṅokʼakʼ, jeredokʼ samaṅokʼakʼ ar sulukren samaṅokʼakʼ lạgitʼ jiniskoe kulạu juṛạua.

¹⁸ “ ‘Iń Probhu Isor do arhõń menetʼkana, am do pạhil cando reakʼ pạhil hilokʼ mitʼṭen niphuṭ damkomem hataoea ar mundil oṛakʼem saphaea.

¹⁹ Naeke do kại samaṅokʼ reakʼ thoṛa mãyãm hataokate mundil oṛakʼ reakʼ banar khunṭire, pinḍ reakʼ ponon konare ar bhitri raca reakʼ phaṭok duạr reakʼ banar khunṭire ona mãyãmem joda.

²⁰ Okoe do bhulte se begor baḍaete mundil oṛakʼ upạrte jãhãnakʼko kại onko lạgitʼ do cando reakʼ eae hilokʼ onkagem kạmiya. Nonkate ape do kại ńutumte samaṅokʼ reakʼ porob hoyocokate mundil oṛakʼpe saphaea.

²¹ “ ‘Pạhil cando reakʼ gelponakʼ tạrikre bańcaokʼ porobpe hoeocoya. Niạ porob do eae din reakʼ hoyokʼa; unre ape do bin khạmiyanakʼ piṭhạ jojom hoyokʼtapea.

²² Enhilokʼ disạm cakʼlaoyicʼ do acʼ ar disạmren sanam hoṛko lạgitʼ kại ńutumte samaṅokʼ lekate mitʼṭen ḍaṅgra emokʼ hoyokʼtaea.

²³ Porob reakʼ eae din dinạmge uni do Probhu Isor ńutumte jeredokʼ samaṅokʼ lạgitʼ niphuṭ utạr eae goṭen ḍaṅgra ar eae goṭen bheḍa emokʼ hoyokʼtaea ar kại ńutumte samaṅokʼ lạgitʼ mitʼṭen merom boda hõ emokʼ hoyokʼtaea.

²⁴ Anaj samaṅokʼakʼ lekate uni do mimitʼ ḍaṅgra ar bheḍa lạgitʼ gel irạl keji holoṅ ar pe liṭar eae sae mõṛẽgel gram sunum emokʼ hoyokʼtaea.

²⁵ “ ‘Eae cando reakʼ eae din hilokʼ oka eae din reakʼ porob hoyokʼ onare samaṅokʼ lạgitʼ disạm cakʼlaoyicʼ do kại ńutumte samaṅokʼakʼ lạgitʼ, jeredokʼ samaṅokʼakʼ lạgitʼ ar anaj samaṅokʼakʼ lạgitʼ jinisko ar sunumko emokʼ hoyokʼtaea.