Jeheskel 44 - সান্তালী বাইবেল

Disạm cakʼlaoko, Liwiko ar Naekeko

¹ Ona tayom uni hoṛ do mundil oṛakʼ reakʼ purub secʼ samaṅ akan bahre duạr ṭhene ruạṛ idikedińa; duạr do siń akatʼ tahẽkana.

² Probhu Isor do ińe metadińạ, “Noa duạr do sińge tahena, noa do baṅge jhijokʼa jemon celege noa bhitrite aloko bolo daṛeakʼ. Noa do bond akaege tahena, ente Israelren Probhu Isor do noategeye bolo akana.

³ Eken disạm cakʼlaokoge phaṭok duạr ṭhen duṛupʼkate Probhu Isor samaṅreko jom daṛeakʼa. Ar mucạtʼ kandha talate duạrteko bolokʼa ar inạ hortegeko oḍok calakʼa.”

⁴ Ona tayom uni manwa do utạr duạr reakʼ horte mundil oṛakʼ samaṅreye ạgukedińa. Ińiń ńelkeda Probhu Isorakʼ oṛakʼ do uniyakʼ ṭhonokte perecʼ akana; ar unre iń doń taberena.

⁵ Unre Probhu Isor do ińe metadińạ, “E manwa hopon, mońjte ńelme ar luturte ańjomme ar ińakʼ oṛakʼ reaṅ okako niạm ar ạn-ạriko reaṅ iń lạiyam ona mitʼke mitʼ moneyakʼme. Mundil oṛakʼre okoeko bolo daṛeakʼa ar okoe do bako bolo daṛeakʼ ona reaṅ moneyakʼme.

⁶ Am do huhulkan jạtren Israelkom metakoa, Probhu Isore menetʼkana, ‘E Israelko, apeakʼ bạṛicʼ colon do ḍher akantapea.

⁷ Apeakʼ eṭakʼ bạṛicʼakʼ colonko sãote ape do iń ṭhen jomakʼ, itil ar mãyãm samaṅokʼakʼpe samaṅ jokhecʼ ontor ar hoṛmore bin khatna akan bidisiạko ińakʼ oṛakʼrepe ader akatʼkote ińakʼ oṛakʼpe besonot akada ar onkoakʼ kạmi hotete ińakʼ bondobospe bạtil akada.

⁸ Ińakʼ sonot jinisko cetanre okaṭakʼ dạyik tahẽkan ona baṅkate ińakʼ oṛakʼ reakʼ bhar do eṭakʼkoakʼ tirepe jimạ akada.

⁹ Okoe bidisiạkoakʼ ontor ar hoṛmo hõ baṅ khatna akantako onko do ińakʼ oṛakʼte bako bolo daṛeakʼa; ar Israelko talareko girobasokʼ kan bidisiạko hõ bako bolo daṛeakʼa.

¹⁰ “ ‘Israelko tinre bạṛicʼ horteko senlena unre iń bạgikate okoeko Liwi do boṅga secʼko ạcurlente iń khon sạṅgińko senlen onko do akoakʼ kại reakʼ kuṛại asen baṛae hoyokʼtakoa.

¹¹ Enhõ mundil oṛakʼ duạr horhoe reakʼ bharko ńamakatʼte onko do ińakʼ oṛakʼ reakʼ sekʼwa kạmiko kạmi daṛeakʼa. Onko do jeredokʼ samaṅokʼren janwarko gur daṛeakoa ar hoṛko lạgitʼ samaṅokʼakʼ porob hõko ạyur daṛeakʼa ar hoṛko sapʼsorako lạgitʼ onko samaṅreko teṅgo daṛeakʼa.

¹² Menkhan onko do boṅgako samaṅre hoṛkoko sapʼsor akawatʼkoa ar Israel jạtrenko kại ocoakatʼkoa, ona iạte iń Probhu Isor doń kiriạ akana, onkoakʼ kại reakʼ kuṛại do onkoge asen baṛae lagaoakoa.

¹³ Onko do naeke lekate iń sewawạń lạgitʼ iń ṭhen do aloko hijukʼma ar ińakʼ jãhãn sonot se sonot utạrakʼ jinis ṭhen hõ bako hecʼdaṛeakʼa; onkoakʼ hirkhạwakʼ lajaotetʼ do asen baṛae hoyokʼtakoa.

¹⁴ Enhõ mundil oṛakʼ cetanre dạyik ar onḍenakʼ sanamakʼ kạmi cetanre bhar do onko cetanregeń dohoya.

¹⁵ “Menkhan Israelko do tinre iń ṭhen khon bạṛicʼ horteko senlena unre Sadok bõsren okoe Liwi do naekeko lekate ińakʼ oṛakʼre pạtiạr salakʼ akoakʼ dạyikko palon akatʼ onkoge iń sewawạń lạgitʼ iń ṭhenko hecʼdaṛeakʼa; onko do mãyãm ar itil samaṅ lạgitʼ iń samaṅreko teṅgo daṛeakʼa. Iń Probhu Isorge noa katha doń menetʼkana.

¹⁶ Eken onkoge ińakʼ oṛakʼreko bolo daṛeakʼa; eken onkoge ińakʼ sewa kạmi lạgitʼ ińakʼ ṭebil ṭhenko hecʼdaṛeakʼa ar onkoge ińakʼ oṛakʼ reakʼ sanamakʼko kạmi daṛeakʼa.

¹⁷ “ ‘Musnạ kicricʼ horokʼkate onko do bhitri raca reakʼ duạrteko bolokʼa; ar bhitri raca reakʼ duạr ṭhen se mundil oṛakʼ talare sewa kạmi jokhecʼ do jãhãn upʼ reakʼ kicricʼ bako horokʼ daṛeakʼa.

¹⁸ Onkoakʼ bohokʼre musnạ kicricʼ reakʼ dạhṛi tahena ar onko do musnạ reakʼ jhaṅgako horoga; ar alo jemonko udgạrokʼ nonkan kicricʼ do bako horoga.

¹⁹ Onko do tinre bahre racare tahenkan hoṛko ṭhenko calakʼa unre sekʼwa kạmi reakʼ kicricʼ totʼkate sonot oṛakʼreko doho oṭokakʼa ar eṭakʼ kicricʼko horoga, jemon onkoakʼ kicricʼ reakʼ jakʼte hoṛko iń ńutumte aloko begarokʼ.

²⁰ “ ‘Onkoakʼ bohokʼ reakʼ upʼ do bako hoyo munḍrạitakoa se jeleń hõ bako doho daṛeakʼa menkhan upʼ doko getʼ kạṭicʼ daṛeakʼa.

²¹ Jãhãe naekege darkha rasa ńũkate bhitri oṛakʼte do bae bolo daṛeakʼa.

²² Rạnḍi maejiu se jãwãeye bạgi akawade nonkan jãhãe maejiu onko do bako bapla daṛeakoa; onko do eken Israel jạtren kũạri kuṛi se naekeren rạnḍi akan bạhuko bapla daṛeakoa.

²³ Iń ńutumte okaṭakʼ begar dohoakan ar oka baṅ begar akan ona tala reakʼ ińren hoṛko cetʼakoa ar okaṭakʼ saphawakʼ ar okaṭakʼ baṅ saphawakʼ onako udukʼakoa.

²⁴ “ ‘Jãhãn mambla hoylen khan naekeko do Hạkim reakʼko kạmiya ar ińakʼ hukum lekage onko doko bicạr phanḍaoa. Ar ińiń niṭ akatʼ sanam porobko lạgitʼ onko do ińakʼ ạn-ạri ar niạmko palona ar jirạukʼ mãhãko reakʼ sonottetʼko rukhiyạ dohoya.

²⁵ “ ‘Naeke do jãhãe gocʼ hoṛko ṭhen senkate apnar do bae bhonḍokʼa; menkhan gogo-baba, hopon ar hoponera, boeha se baṅ bapla akade boeha kuṛi lạgitʼ apnar doe bhonḍ daṛeakʼa.

²⁶ Are saphalen tayom uni do eae din hạbicʼ tạṅgi hataṛ hoyokʼtaea.

²⁷ Ona tayom oka hilokʼ uni do sekʼwa kạmi lạgitʼ mundil oṛakʼ reakʼ bhitri racateye bolokʼa un hilokʼ do apnar lạgitʼ kại ńutumte samaṅokʼakʼ samaṅ hoyokʼtaea. Noa do iń Probhu Isorgeń menetʼkana.

²⁸ “ ‘Naekekoakʼ sompotti do eken ińgeń tahena. Ape Israelko do apeakʼ disạmre jãhãn sompottige alope emakoa; onkoren sompotti do ińgeń hoyokʼa.

²⁹ Onko do anaj samaṅokʼakʼ, kại ńutumte samaṅokʼakʼ ar dos ńutumte samaṅokʼakʼ jinisko joma; Israel disạmre Probhu Isor ńutumte emakʼ mitʼke mitʼ jiniskoge onkoakʼ hoyokʼa; onako do baṅ chaḍao ạgukʼa.

³⁰ Joto lekan phosol reakʼ pạhilre rakapʼakʼ khon bhageakʼ hĩs ar apeakʼ sanam sandesko do naekekoakʼ hoyokʼa. Apeakʼ nãwã holoṅ reakʼ pạhilakʼ hĩs ape do onkope emakoa jemon apeakʼ gharońj cetanre bhor tahen.

³¹ Gocʼ akan se bir janware cirạ akade nonkan jãhãn cẽṛẽ se janwarakʼ jel naekeko do bako jom daṛeakʼa.