Jeheskel 43 - সান্তালী বাইবেল

Mundil oṛakʼre Probhu Isorakʼ ṭhonok

¹ Ona tayom uni do purub duạr secʼakʼ phaṭok ṭhene ạgukedeńạ,

² Ar iń do purub secʼ khon Israelren Isorakʼ ṭhonok hijukʼ kaniń ńelkeda. Uniyakʼ aṛaṅ do aema dakʼko reakʼ sabad leka tahẽkana ar dhạrti do uniyakʼ ṭhonokte marsalena.

³ Noa dorson ńelkate iń doń ombakʼena; ar nagraha maraokʼ reakʼ oka dorson Kebar gaḍa aṛereń ńelletʼ noa dorson do ona lekage tahẽkana.

⁴ Probhu Isorakʼ ṭhonok do purub duạr reakʼ phaṭok duạrte mundilte boloyena.

⁵ Unre Probhu Isorren jiu do ińe rakapʼ idikedeńte bhitri racateye idikedeńạ, ar Probhu Isorakʼ ṭhonok do mundil oṛakʼre perecʼena.

⁶ Ar uni manwa do unre iń aṛere teṅgo akane tahẽkana, ar iń do mundil oṛakʼ tala khon okoe coṅ iń tulucʼ katha roroṛiń ańjomkedea.

⁷ Uni doe menkeda, “E manwa hopon, noa do ińakʼ siṅghạson reakʼ ṭhạ̃i ar ińakʼ jaṅga dohoy lạgitʼ jaega kana. Iń do nonḍege Israelko talareń girobasokʼa. Israelko tishõ ińakʼ sonot ńutum do bako besonot ocoytińạ. Baṅ do ako ar baṅ do onkoren rapajkoakʼ laṭghaṭ iạte, ar akoren gocʼakan rapajko ńutumte dikʼsạwakʼko teṅgoe hotete onko do ińakʼ ńutum ar bako besonot ocoytińạ.

⁸ Onko do ińakʼ oṛakʼ aṛerege akoakʼ oṛakʼko benaoletʼa; onkoakʼ oṛakʼ ar ińakʼ oṛakʼ talare eken mitʼṭecʼ bhitge tahẽkana. Onkoakʼ bạṛicʼakʼ kạmiko hotete onko do ińakʼ sonot ńutumko besonot ocoletʼtińạ. Ar onatege onko do edreteń maraoletʼkoa.

⁹ Ar ńitokʼ do akoren boṅga murhutʼko ar akoren rapajkoakʼ mạ̃ṛĩ iń khonko sạṅgiń giḍikakʼma; inạkhan iń do jaejug hạbicʼ onko talareń girobasokʼa.

¹⁰ “E manwa hopon, am do Israelko ṭhen noa mundil oṛakʼ reaṅ lại jạhirme ar noa noksha reaṅ hudis lạgitʼ metakom, jemon onko do akoakʼ kại iạteko lajaokʼ.

¹¹ Onko do akoakʼ sanam kạmi iạteko lajaokʼ enḍekhan mundil oṛakʼ noksha reakʼ khạṭinạṭi sanamkʼem baḍae ocokoa; ar ona reakʼ kaṭhamo, ar bhitrite bolokʼ ar bahrete calakʼ reakʼ hor, metakʼme ona reakʼ purạ noksha ar ona reakʼ joto niạm ar ạn-ạriko onko ṭhenem sodora. Ona reakʼ jotowakʼ onko samaṅre olme jemon onko do ona reakʼ noksha lekateko kạmi daṛeakʼ ar ona reakʼ joto niạm jemonko manao.

¹² “Noa do hoyena mundil oṛakʼ reakʼ ạn; ar buru reakʼ beṛhaeteakʼ ṭhạ̃i do sonot utạrakʼ hoyokʼa. Ar mundil oṛakʼ reakʼ ạn do noa kangea.

Pinḍ

¹³ “Pinḍ reakʼ jokha do nonka kana, mokate (moka do mitʼ moka ar pon kạṭupʼ jeleń): ona reakʼ pheḍtetʼ do mitʼ moka usul, mitʼ moka osar, ar ona reakʼ kaṅkha aṛe aṛete do beṛhaete mitʼ bitạ tahena.

¹⁴ Ar pinḍ reakʼ usul do nonka tahena; otre ona reakʼ pheḍtetʼ khon latarakʼ khap hạbicʼ bar moka, ar osartetʼ do mitʼ moka tahena; hoponakʼ khap khon maraṅakʼ khap hạbicʼ, pon moka ar osartetʼ do mitʼ moka:

¹⁵ ar pinḍ reakʼ muthnitetʼ culhạ hĩs do pon moka tahena, ar pinḍ reakʼ culhạ reakʼ hĩs khon coṭ secʼ ponea dereń oḍok akan tahena, mimitʼ moka usul.

¹⁶ Pinḍ reakʼ culhạ hĩs do gel bar moka jeleń ar gel bar moka osar, pon konḍanakʼ tahena.

¹⁷ Ar khap hõ pon konḍanakʼge tahena, gelpon moka jeleń ar gelpon moka osar; ar ona beṛhaete do kaṅkha tahena, adha moka osar. Ar pinḍ reakʼ pheḍtetʼ do beṛhaete mitʼ moka oḍokakan tahena, ar ona reakʼ siṛhiko do purub secʼ samaṅkokʼa.”

¹⁸ Ona tayom uni do ińe metadińạ, “E manwa hopon, Probhu Isore menetʼkana, pinḍ benao sạtlen khan ar oka hilokʼ Probhu Isor ńutumte ona samaṅokʼa ar ona cetanre jeredokʼ samaṅokʼakʼ reakʼ mãyãm ircikʼa enhilokʼ noa niạm do manao hoyokʼa;

¹⁹ Sadok bõsren naekeko okoe do ińakʼ sekʼwae lạgitʼ iń ṭhenko hijukʼ onko do mitʼṭen ạnḍiạ ḍaṅgra samaṅokʼ lạgitʼem emakoa.

²⁰ Ar am do uniyakʼ thoṛa mãyãm hataokate pinḍ reakʼ ponea dereńre, ar tala hĩs reakʼ ponon konare ar aṛete joto secʼem joda; nonkate kại puruchun reakʼ porobem hoeocoyte pinḍem sapha ocoya.

²¹ Am do kại samaṅokʼ lạgitʼ gur akade ḍaṅgra idikate mundil oṛakʼ bahre sonot ṭhạ̃ire niṭ akatʼ jaegarem jeredea.

²² “Dosar hilokʼ am do mitʼṭen niphuṭ merom bodam ạguiyea, ar naekeko do kại samaṅokʼakʼ porobko hoeocoya ar pinḍ do ḍaṅgrawakʼ mãyãmte cetʼ leka sapha hoylen onkagem saphaea.

^23-24 Pinḍ saphae tayom am do mitʼṭen niphuṭ damkom ar pal khon niphuṭ mitʼṭen bheḍawante Probhu Isor samaṅrem hạjirokʼa; Ar naekeko do uni cetanre buluṅko chiṭiạuaea ar Probhu Isor ńutumte jeredokʼ samaṅokʼ reakʼ porobko hoeocoya.

²⁵ “Eae din hạbicʼ din hilokʼ am do kại ńutumte samaṅokʼ lạgitʼ mitʼṭen kate merom boda emokʼ hoyokʼtama. Ona chaḍa hõ mitʼṭen damkom ar pal khon mitʼṭen bheḍa emokʼ hoyokʼa; ar onko do jemon niphuṭ utạrkoko hoyokʼ.

²⁶ Naeke do eae din hạbicʼ pinḍ reakʼ kại puruchun reakʼ porobe hoeocoyte onae saphaea; nonkate pinḍ do Probhu Isor ńutumteko samaṅa.

²⁷ Niạko din mucạtʼlen khan irạl din hilokʼ khon naekeko do ona pinḍ cetanre apeakʼ jeredokʼ ar helmel samaṅokʼakʼ porobko hoeocoya. Unre iń do apeń ataṅpea. Iń Probhu Isorge noa katha doń menetʼkana.”