Jeheskel 42 - সান্তালী বাইবেল

Naekeko reakʼ dolan

¹ Tayomte uni do mundil oṛakʼ reakʼ utạr secʼ bahre racareye ạgukedeńte mitʼṭecʼ dolanteye idikedińa. Ona dolan do mundil oṛakʼ reakʼ utạr secʼ phaelao jaega aṛere pạchim secʼakʼ dolan ṭhen tahẽkana.

² Ona do mitʼsae moka jeleń ar mõṛẽgel moka osar ar onare bolokʼ hor do utạr duạr tahẽkana.

³ Noa dolan do tahẽkana bhitri raca reakʼ bargel moka ona phaelao jaega ar bahre racare tol akatʼ jaega talare. Dolan do pe mahla tahẽkana ar mimitʼ mahla reakʼ kandhako samaṅte taṛam reakʼ hor hõ tahẽkana.

⁴ Ona hor do gel moka osar tahẽkana; onḍe khon dolan bhitri reakʼ phaelao jaegate calakʼ lạgitʼ mitʼ moka osar mitʼṭecʼ hor tahẽkana. Ar dolan reakʼ kandhako do utạr secʼ jhicʼge tahẽkana.

^5-6 Bhitri phaelao jaegako reakʼ khunṭiko leka dolan reakʼ cetan banar mahla reakʼ do jãhãn khunṭige baṅ tahẽkana. Ar onatege noa dolan reakʼ horko do mitʼṭecʼ cetanre ar mitʼṭecʼ baṅ tahẽkana, bickom tinạkʼ cetante rakapʼ akan unạkʼge bhitri secʼ bolo idiakana; onate kandhako do huḍiń idiakana.

^7-9 Ona dolan reakʼ purub secʼ mitʼṭecʼ bolokʼ duạr tahẽkana ar ona samaṅre utạr-dạkhinte jeleń mitʼṭecʼ mõṛẽgel moka bhit tahẽkana. Ar ona bhit reakʼ purub aṛere do bahre raca tahẽkana. Ona bhit do dolan reakʼ osartetʼ soman tahẽkana. Dolan reakʼ purub aṛe bahre raca secʼ do osarte mõṛẽgel moka ar mundil oṛakʼ secʼ jeleń do mitʼsae moka tahẽkana.

¹⁰ Mundil oṛakʼ reakʼ dạkhin secʼ ṭhik nonkage mitʼṭecʼ dolan tahẽkana. Ona do tahẽkana raca reakʼ phaelao jaega aṛere ar pạchim secʼakʼ dolan ṭhen.

¹¹ Utạr secʼ lekage noa dolan do mitʼṭecʼ hor tahẽkana. Noa dolan do joto secʼ khon, metakʼme jeleńte, osarte, bolokʼ hor ar bhitri reakʼ jotowakʼko utạr secʼakʼ dolan leka tahẽkana.

¹² Ar ona dolante bolokʼ reakʼ hor do dạkhin secʼ tahẽkana. Dolan reakʼ purub secʼ ar mitʼṭecʼ bolokʼ hor tahẽkana ar ona samaṅre hõ mitʼṭecʼ bhit tahẽkana.

¹³ Ona tayom uni do ińe metadińạ, “Mundil reakʼ phaelao jaegare utạr ar dạkhin secʼakʼ banar dolan do naekekoakʼ kana. Okoe naekeko do Probhu Isor ṭhenko bolokʼ onkoge niạ banar dolanre samaṅokʼakʼ sonot utạrakʼ jinisko joma. Onḍe onko do anaj samaṅokʼakʼ, dos ńutumte samaṅokʼakʼ ar kại ńutumte puruchunokʼ reakʼ samaṅokʼakʼ sonot utạrakʼ jinisko dohoya, ente banar dolange sonotgea.

¹⁴ Naekeko sekʼwa kạmi lạgitʼ okako kicricʼ horokʼkate mundil oṛakʼteko bolokʼ onako do niạ banar dolanreko bocʼ doho oṭokakʼa ar ona tayom do bahre racateko oḍok daṛeakʼa, ente onako do sonot utạrakʼ kicricʼkana. Hoṛkoakʼ jaegate calakʼ lahare onko do eṭakʼ kicricʼ horokʼ lagao akoa.”

¹⁵ Mundil oṛakʼ beṛhaeteakʼ bhit reakʼ sanamakʼ jokha hoyen khan uni do purub secʼakʼ phaṭok duạrte bahreteye ạgukedińa ar bahre reakʼ beṛhaeteakʼ jaegae jokhakeda.

^16-19 Uni do ḍaṅte jaega reakʼ purub, utạr, dạkhin ar pạchim secʼe jokha sạtketʼ khan onako reakʼ mimitʼ jokha do mõṛẽsae ḍaṅkate hoyena.

²⁰ Sonot utạrakʼ ṭhạ̃i khon hoṛkoakʼ jaegae begar lạgitʼ eṭakʼ beṛhaeteakʼ joto secʼ mõṛẽsae ḍaṅ jeleń mitʼṭecʼ bhit tahẽkana.