Jeheskel 41 - সান্তালী বাইবেল

¹ Ona tayom uni do mundil oṛakʼ reakʼ maraṅ kandha ṭhen hecʼkate duạr reakʼ banar paya khunṭiye jokhakeda; banar secʼakʼ paya khunṭi do osarte turui mokakate tahẽkana;

² mundil oṛakʼ reakʼ bhithõ turui moka osar tahẽkana. Banar paya tala reakʼ jaega do gel moka tahẽkana ar mimitʼ paya khunṭi do mõṛẽ moka osar tahẽkana. Uni do tala kandha reakʼ jokha hõe hataokeda; ona reakʼ jeleń do pongel moka ar osar do bargel moka tahẽkana.

³ Ona tayom uni do bhitri reakʼ kandhate senkate onḍe bolokʼ duạr reakʼ paya khunṭikoe jokhakeda; mimitʼ paya khunṭi do bar mokakate osar tahẽkana. Banar paya khunṭi tala reakʼ ṭhạ̃i do turui moka tahẽkana ar paya khunṭi sãote joṛao akatʼ banar aṛe reakʼ bhit do jeleńte eae moka kate tahẽkana.

⁴ Ona tayom uni do bhitri kandhae jokhakeda; ona do jeleńte bargel moka ar osarte bargel moka tahẽkana. Uni do ińe metadińạ, “Noa do sonot utạrakʼ ṭhạ̃i kana.”

⁵ Ona tayom uni do mundil oṛakʼ reakʼ bhite jokhakeda; ona do turui moka dạriạ tahẽkana ar ona bhit reakʼ beṛhae aṛeteakʼ kandhako reakʼ osar do ponon moka kate tahẽkana.

⁶ Ona kandhako do mitʼṭecʼ cetanre ar mitʼṭecʼ nonkate pe mahla tahẽkana; mimitʼ mahlare pegel kate kandhako tahẽkana. Kandhako reakʼ bhar do mundil oṛakʼ bhit reakʼ pe secʼge khap tahẽkana. Kandhako reakʼ bim do ona tak cetanre doṛom tahẽkana, mundil oṛakʼ reakʼ bhitre bhorao do baṅ tahẽkana.

⁷ Ona iạte mundil oṛakʼ reakʼ pe senakʼ kandhako do osarte latar mahla khon cetan mahla hạbicʼ osar idiakana. Latar mahla khon bar mahla talate cetan mahla hạbicʼ mitʼṭecʼ siṛhi do rakapʼ akana.

⁸ Ińiń ńelkeda, mundil oṛakʼ do mitʼṭecʼ cetan ṭhạ̃ire menakʼa ar onage mundil oṛakʼ ar kandhako reakʼ rehetʼ tahẽkana. Ona rehetʼ do mitʼ ḍaṅ tahẽkana, metakʼme turui moka usul tahẽkana ar kandhako khon mõṛẽ moka bạ̃ṛti tahẽkana.

^9-10 Kandhako reakʼ bahre bhit do mõṛẽ moka dạriạ tahẽkana. Mundil oṛakʼ reakʼ rehetʼ khon naekekoakʼ oṛakʼko hạbicʼ bargel moka osar jaega tahẽkana.

¹¹ Mundil oṛakʼ reakʼ kandhakote bolokʼ lạgitʼ utạr secʼ mitʼṭecʼ ar dạkhin secʼ ar mitʼṭecʼ duạr tahẽkana ar ona duạrkin do phaelao jaega secʼ samaṅ akan tahẽkana. Rehetʼ reakʼ ona mõṛẽ moka phaelao hĩs do banar duạr ṭhen calakʼ hor tahẽkana.

¹² Mundil oṛakʼ reakʼ pạchim secʼ phaelao jaega reakʼ mucạtʼ simạnare mitʼṭecʼ dalan tahẽkana. Ona do eaegel moka osar ar aregel moka jeleń tahẽkana. Ona beṛhaeteakʼ bhitko do mõṛẽ moka dạriạ tahẽkana.

¹³ Ona tayom uni do mundil oṛakʼe jokhakeda; ona do jeleńte mitʼsae moka ar mundil oṛakʼ khon phaelao jaega ar tayom reakʼ bhit sudhạ dolan do mitʼsae moka jeleń tahẽkana.

¹⁴ Purub secʼ mundil oṛakʼ samaṅre okaṭakʼ phaelao jaega tahẽkan ona hõ jeleńte mitʼsae moka tahẽkana.

^15-16 Ona tayom uni do banar aṛe reakʼ bhitri hor sudhạ pạchim secʼakʼ dolan hõe jokhakeda; ona do jeleńte mitʼsae moka tahẽkana. Mundil oṛakʼ reakʼ asolakʼ kandha, bhitri reakʼ kandha ar raca secʼ samaṅ akatʼ pinḍạ reakʼ bhitko do kaṭ reakʼ toktate dapal esetʼ tahẽkana. Ona pe jaegate bolokʼ hor reakʼ banar aṛe reakʼ ganaḍe ar bata lagao akatʼ joto jalnako hõ toktate esetʼ tahẽkana. Ar jalnakore do kaṭ reakʼ palla tahẽkana.

^17-18 Bolokʼ hor cetan reakʼ bhit sudhạ asolakʼ kandha ar bhitri kandha reakʼ joto bhit reakʼ tokta cetanre Kerubko ar khijur dare reakʼ muṭhạnko rokʼ benao tahẽkana; mitʼṭecʼ khijur dare ar mitʼṭen Kerub do por por sajao tahẽkana. Mimitʼ Kerubkinren do bareakate mẽtʼãhã tahẽkana,

¹⁹ mitʼṭen do manwawakʼ mẽtʼãhã ar eṭakʼakʼ do dhạcri kulakʼ mẽtʼãhãge; manwawakʼ mẽtʼãhã do mitʼṭecʼ khijur dare secʼ ar dhạcri kulakʼ mẽtʼãhã do eṭakʼ khijur dare secʼ samaṅ akan tahẽkana. Goṭa mundil oṛakʼ bhit reakʼ beṛhaete noako do rokʼ benao akan tahẽkana.

²⁰ Mimitʼ goṭecʼ kandha do pạcri reakʼ tala khon ehopʼkate bolokʼ hor cetan reakʼ jaega hạbicʼ joto jaegare Kerub ar khijur dareko reakʼ muṭhạn rokʼ benao akan tahẽkana.

²¹ Tala kandha reakʼ duạr khunṭiko do ponkona tahẽkana ar sonot utạrakʼ ṭhạ̃i reakʼ duạr hõ inạ lekage tahẽkana.

²² Tala kandhare pe moka usul, bar moka jeleń ar bar moka osar kaṭ reakʼ mitʼṭecʼ pinḍ tahẽkana ar noa reakʼ ponon kona, rehetʼ ar beṛhaete do kaṭ reakʼge tahẽkana; uni do arhõe menkeda, “Noa do hoyokʼkana ona ṭebil oka do Probhu Isor samaṅre tahenkan.”

²³ Tala kandha ar sonot utạrakʼ ṭhạ̃ire mitʼṭecʼkate bar palla reakʼ duạr tahẽkana.

²⁴ Mimitʼ palla do barea toktate benao akan tahẽkana; ar tokta kin do kobjare ạcurokʼakʼge.

²⁵ Tala kandha duạr reakʼ palla kin do cetan bhit reakʼ lekage Kerub ar khijur dareko reakʼ muṭhạn rokʼ benao akan tahẽkana. Ar pinḍạ bolokʼ duạr chat latarre do mitʼṭecʼ bim tahẽkana.

²⁶ Pinḍạre batako emakawatʼ jalnako reakʼ banarsa aṛe ar bhitkore do khijur dare muṭhạnkoge rokʼ benao tahẽkana. Ona chaḍa mundil oṛakʼ reakʼ bhit ar sor kandhakore hõ khijur dare muṭhạnkoge rokʼ benao tahẽkana.