Jeheskel 40 - সান্তালী বাইবেল

Nãwã koejoṅ oṛakʼ (40.1-48) Jeheskel Jerusalemteye idi ocoyen

¹ Bondi dosa reakʼ bargel mõṛẽ bochor reakʼ etohopʼre, cando reakʼ gelakʼ dinre, Jerusalem nagraha ńurokʼ gelpon bochor tayom Probhu Isorakʼ ti do iń cetanre tahẽkana.

² Isor emakʼ dorson talate uni do Israel disạmteye idikedeńte mitʼṭecʼ usul buru cetanreye dohokedińa. Ona buru reakʼ dạkhin aṛere adom dolan oṛakʼko tahẽkana onako do ńelokʼte nagraha leka tahẽkana.

³ Uni do onḍe ińe idikedińa ar iń do mitʼṭen manwań ńelkedea one uniyakʼ hoṛmo do tama leka jhak jhakaokʼkan tahẽkantae. Uniyakʼ ti re do musnạ reakʼ baber ar jokha reakʼ ḍaṅ tahẽkana ar uni do phaṭok duạr ṭhene teṅgo akan tahẽkana.

⁴ Uni hoṛ do ińe metadińạ, “E manwa hopon, am do mẽtʼte ńelme ar luturte ańjomme ar iń okań udukʼam ona jotowakʼ moneyakʼme, ente ona lạgitʼge nonḍeń ạgu akatʼmea. Ar jãhãnakʼgem ńel ona jotoge Israelkom lạiyakoa.”

Purub secʼakʼ phaṭok duạr

⁵ Iń doń ńelkeda koejoṅ oṛakʼ do beṛhaete mitʼṭecʼ pạcrite esetʼ ạcurakana. Uni hoṛakʼ ti reakʼ jokha ḍaṅ do jeleńte turui moka; mimitʼ moka reakʼ jeleń do mitʼ moka pon kạṭupʼ tahẽkana. Uni do pạcri bhite jokhakeda; ona do mitʼ ḍaṅ osar ar mitʼ ḍaṅ usul tahẽkana.

⁶ Ona tayom uni do purub secʼakʼ phaṭok duạr ṭhene senene. Uni do siṛhite cetanteye rakapʼente phaṭok duạre jokhakeda; ona do jeleńte mitʼ ḍaṅ tahẽkana.

⁷ Phaṭok duạrre pahradarkoakʼ kandhako do mitʼ ḍaṅ jeleń ar mitʼ ḍaṅ osar tahẽkana ar mitʼ kandha khon eṭakʼ kandha tala reakʼ bhit do mõṛẽ moka osar tahẽkana. Phaṭok duạr reakʼ ganaḍe do mitʼ ḍaṅ jeleń tahẽkana.

⁸ Ona tayom uni do ona kandhae jokhakeda; ona reakʼ osar do kandhate bolokʼ duạr reakʼ osar khon banar secʼ mitʼ ḍaṅ bạ̃ṛti tahẽkana.

⁹ Ona kandha do jeleńte irạl moka ar ona khon oḍokokʼ hor reakʼ banarsa reakʼ kham khunṭi do bar moka kate osar tahẽkana. Phaṭok duạr mucạtʼ reakʼ ona kandha duạr do mundil oṛakʼ secʼ tahẽkana.

¹⁰ Purub secʼakʼ phaṭok duạr bhitri banarsa aṛere peakate jotote turui goṭecʼ kandha tahẽkana; onako mimitʼ goṭecʼ reakʼ jokha do somange tahẽkana ar onako tala reakʼ bhitko reakʼ mimitʼ goṭecʼ reakʼ jokha hõ mitʼge tahẽkana.

¹¹ Ona tayom uni do phaṭok duạre jokhakeda; ona bolokʼ hor reakʼ jeleń do gelpe moka ar bolokʼ duạr reakʼ osar do gel moka tahẽkana.

¹² Pahradarkoakʼ mimitʼ goṭecʼ kandha samaṅre do mitʼ moka usul ar mitʼ moka osar bhit tahẽkana ar kandhako reakʼ jeleń ar osar do turui mokakate tahẽkana.

¹³ Ona tayom uni do phaṭok duạr reakʼ chat reakʼ osare jokhakeda; uni do mitʼṭecʼ kandha reakʼ bahre secʼ khon uniyakʼ samaṅ kandha reakʼ bahre hạbicʼe jokhakeda. Mitʼṭecʼ kandha bhit reakʼ khạli ṭhạ̃i khon uniyakʼ samaṅ kandha reakʼ khạli ṭhạ̃i reakʼ sạṅgiń do bargel mõṛẽ moka tahẽkana.

¹⁴ Ar phaṭok duạr kham khunṭikin reakʼ usultetʼ do turui gel moka kateye jokhakeda. Kham khunṭikin khonge phaṭok duạr reakʼ raca do ehopʼakana.

¹⁵ Phaṭok duạr reakʼ bolokʼ hor khon phaṭok reakʼ mucạtʼ simạ reakʼ kandha hạbicʼ do mõṛẽgel moka jeleń tahẽkana.

¹⁶ Kandhako reakʼ bahre bhitre ar kham khunṭikin sor reakʼ bhitre jạli emakʼ jalna tahẽkana, ar phaṭok reakʼ mucạtʼre oka kandha tahẽkan ona reakʼ bhitrehõ onage tahẽkana; nonkate phaṭok duạr reakʼ bhitkore do onkan jalnako tahẽkana. Ona chaḍa banar kham khunṭire do khijur dare muṭhạnko rokʼ akan tahẽkana.

Bahre bakher raca

¹⁷ Ona tayom uni do bahre bakher racateye idikedińa. Raca reakʼ sanam secʼ do jotote pegel kandhań ńelkeda ar onako do jotoge mitʼ secʼ khạli tahẽkana; onako samaṅre do mitʼṭecʼ dhiri bạisạuakʼ ṭhạ̃i tahẽkana.

¹⁸ Ona dhiri bạisạuakʼ jaega do duạr aṛe aṛete senakana, duạr reakʼ jeleńtetʼ somange; ona do latar reakʼ dhiri bạisạuakʼ jaega tahẽkana.

¹⁹ Ona tayom uni do latar senakʼ duạr reakʼ bhitri nakha samaṅ khon bhitri raca reakʼ bahre nakha hạbicʼe jokhakeda, ar ona do tahẽkana, mitʼsae moka.

Utạr secʼakʼ phaṭok duạr

²⁰ Ona tayom uni do bahre raca reakʼ utạr secʼ samaṅ akan phaṭok duạr reakʼ jeleńtetʼ ar osartetʼe jokhakeda.

²¹ Ona reakʼ horho kandhako, dene banar nakha do pepe goṭecʼ, ar ona reakʼ paya khunṭiko ar ona reakʼ osarko do pạhilakʼ duạr reakʼ jokha lekage tahẽkana; ona reakʼ jeleńtetʼ do mõṛẽgel moka ar osar bargel mõṛẽ moka tahẽkana.

²² Ona reakʼ jalnako ar ses utạrakʼ kandha ar kham khunṭiko reakʼ khijur dare muṭhạnko do ar purub duạr lekage tahẽkana. Ar onḍe rakabokʼ reakʼ eae goṭecʼ siṛhi dhap tahẽkana ar phaṭok duạr mucạtʼ simạnare ona kandha do tahẽkana.

²³ Bhitri raca reakʼ purub duạr lekage ona utạr reakʼ duạr hõ tahẽkana. Uni do bahre raca reakʼ phaṭok duạr khon bhitri raca reakʼ phaṭok duạr hạbicʼe jokhakeda; ona do mitʼsae moka tahẽkana.

Dạkhin reakʼ phaṭok duạr

²⁴ Ona tayom uni do dạkhin secʼe idikedińa. Ar iń do bahre raca reakʼ dạkhin duạriń ńelkeda. Uni do ona phaṭok duạr reakʼ kham khunṭiko ar mucạtʼ reakʼ kandhae jokhakeda. Eṭakʼ phaṭok duạrko leka ona reakʼ jokha hõ mitʼge tahẽkana.

²⁵ Eṭakʼ phaṭok duạrko leka niạ phaṭok duạrkore jalnako tahẽkana. Phaṭok duạr do mõṛẽgel moka jeleń ar osar do bargel mõṛẽ moka tahẽkana.

²⁶ Onḍe rakabokʼ lạgitʼ eae goṭecʼ siṛhi dhap tahẽkana ar phaṭok duạr reakʼ ses simạnare do ona reakʼ kandha tahẽkana. Phaṭok bhitri banarsa reakʼ kham khunṭire do khijur dare muṭhạnko rokʼ akan tahẽkana.

²⁷ Bhitri reakʼ racare hõ mitʼṭecʼ dạkhin duạr tahẽkana. Uni do ona phaṭok duạr khon bahre raca reakʼ dạkhin duạr hạbicʼe jokhakeda; ona do mitʼsae moka hoyena.

Bhitri raca reakʼ duạrko

²⁸ Ona tayom uni do bhitri raca reakʼ dạkhin duạr talate bhitri racateye idikedińa ar phaṭok duạre jokhakeda; onako do eṭakʼakʼko leka inạ mitʼ jokhage hoyena.

²⁹ Ona phaṭok duạr reakʼ pahradarkoakʼ kandhako, banar kham khunṭikin ar mucạtʼ reakʼ kandha do eṭakʼakʼko leka inạ mitʼ jokhage tahẽkana. Ar eṭakʼ phaṭok duạrko lekage noa phaṭok duạrre hõ jalna tahẽkana. Phaṭok duạr reakʼ jokha do mõṛẽgel moka jeleń ar bargel mõṛẽ moka osar tahẽkana.

³⁰ Bhitri raca reakʼ eṭakʼ eṭakʼ ṭhạ̃ire kham khunṭi cetanre chat reakʼ ṭhạ̃i tahẽkana. Onako do bargel mõṛẽ moka jeleń ar mõṛẽ moka osar tahẽkana.

³¹ Bhitri reakʼ raca reakʼ dạkhin duạr bolokʼ kandha reakʼ duạr do bahre raca secʼ tahẽkana. Phaṭok duạr bolokʼ hor banarsa reakʼ kham khunṭire do khijur dare muṭhạnko rokʼ akan tahẽkana. Onḍe rakabokʼ lạgitʼ do irạl goṭecʼ siṛhi tahẽkana.

³² Ona tayom uni do bhitri raca reakʼ purub secʼe ạgukedińa ar onḍenakʼ phaṭok duạre jokhakeda; ona reakʼ jokha hõ eṭakʼakʼko lekage tahẽkana.

³³ Ar pahradarkoakʼ kandhako, kham khunṭikin ar bolokʼ kandhako do eṭakʼakʼko leka inạ mitʼ jokhage tahẽkana. Eṭakʼ phaṭok duạrko lekage noa phaṭok duạrre hõ jalna tahẽkana. Phaṭok duạr do mõṛẽgel moka jeleń ar bargel mõṛẽ moka osar tahẽkana.

³⁴ Ona kandhare bolokʼ reakʼ duạr do bahre raca secʼ tahẽkana. Phaṭok duạr bolokʼ banarsa reakʼ kham khunṭire do khijur dare muṭhạnko rokʼ akan tahẽkana. Ar onḍe rakabokʼ reakʼ siṛhi do eae goṭecʼ dhap tahẽkana.

³⁵ Ona tayom uni do utạr phaṭok duạr ṭhene ạgukedeńte onae jokhakeda. Onako do eṭakʼakʼko leka inạ mitʼ jokhage tahẽkana.

³⁶ Ona reakʼ pahradar kandhako, banar khunṭi ar bolokʼ kandha do eṭakʼakʼko leka inạ mitʼ jokhage tahẽkana. Eṭakʼ phaṭok duạrko lekage noa phaṭok duạrre hõ jalna tahẽkana. Phaṭok duạr do mõṛẽgel moka jeleń ar osar do bargel mõṛẽ moka tahẽkana.

³⁷ Ona reakʼ kham khunṭi do bahre raca secʼ tahẽkana; ar onakore do khijur dare muṭhạn rokʼ akan tahẽkana. Ar onḍe rakabokʼ lạgitʼ do irạl goṭecʼ siṛhi tahẽkana.

Janwar samaṅko reakʼ sapṛao kandha

³⁸ Bahre raca reakʼ bhitri phaṭok duạrko reakʼ kham khunṭi aṛere mitʼ secʼ jhicʼ akatʼ mitʼṭecʼ kandha tahẽkana; ona do jeredokʼ samaṅokʼ janwarkoakʼ jel ạrupʼ ṭhạ̃i tahẽkana.

³⁹ Phaṭok duạrte bolokʼ kandha reakʼ banarsa aṛerege bareakate ṭebil tahẽkana. Onako cetanre do jeredokʼ samaṅokʼakʼ, puruchun lạgitʼ samaṅokʼakʼ ar dos samaṅokʼren janwarkoakʼ jel getʼkateko dohoyetʼ tahẽkana.

⁴⁰ Utạr duạr bolokʼ hor reakʼ siṛhi ṭhen banarsa aṛerege bareakate ṭebil tahẽkana.

⁴¹ Nonkate phaṭok reakʼ mitʼ aṛere ponea ar eṭakʼ aṛere ponea jotote irạl goṭecʼ ṭebil tahẽkana one ona cetanre samaṅokʼkan janwarakʼ jelko getʼ kaṭa kuṭiyetʼ tahẽkan.

⁴² Jeredokʼ samaṅokʼ lạgitʼ oka ponea ṭebil tahẽkan onako do dhiri reakʼ getʼ benao tahẽkana; mimitʼ goṭecʼ ṭebil reakʼ jeleń do mitʼ moka tala, osar hõ mitʼ moka tala ar usul do mitʼ moka. Onḍe do samaṅokʼakʼ khanḍa bhanḍako dohokʼkan tahẽkana.

⁴³ Pon kạṭupʼ jeleń barea ạṅkus do bhitre khil jalatʼ tahẽkana. Onare do ṭebilko cetanre samaṅokʼakʼ jelko dohokʼkan tahẽkana.

Naekekoakʼ kandha

⁴⁴ Bhitri raca talare phaṭok duạr aṛere sekʼreńko lạgitʼ pe secʼ jhicʼge kandha tahẽkana; barea do utạr phaṭok aṛere dạkhin duạr ar mitʼṭecʼ do purub phaṭok aṛere utạr duạr.

^45-46 Uni do ińe metadińạ, “Dạkhin duạr do mundil oṛakʼ reakʼ ńel todarot reakʼ bhare ńamakatʼ naeke lạgitʼkana ar utạr duạr kandha do pinḍko ńel todarot reakʼ bhare ńamakatʼ naekeko lạgitʼ kana. Onko naekeko doko hoyokʼ kana Sadekren hoponko; liwiko modre eken onkoge Probhu Isor samaṅre uniyakʼ sewakʼ kạmi lạgitʼko sen daṛeakʼa.”

⁴⁷ Ona tayom uni do racae jokhakeda. Ona do tahẽkana mitʼsae moka jeleń ar mitʼsae moka osar mitʼṭecʼ ponkona ṭhạ̃ige. Ar pinḍ do mundil oṛakʼ samaṅre tahẽkana.

Mundil oṛakʼ

⁴⁸ Ona tayom uni do mundil oṛakʼ reakʼ pinḍạreye ạgukedińa ar pinḍạ samaṅ reakʼ kham khunṭikin ar bolokʼ hor reakʼ banarsa duạr paya khunṭiye jokhakeda. Mimitʼ paya khunṭi do mõṛẽ moka osar ar pe moka osar tahẽkana.

⁴⁹ Pinḍạ do bargel moka jeleń ar gelmitʼ moka osar tahẽkana. Ar onḍe rakabokʼ reakʼ mitʼṭecʼ siṛhi tahẽkana ar ona banar paya khunṭi samaṅre mitʼṭecʼkate kham khunṭi tahẽkana.