Jeheskel 4 - সান্তালী বাইবেল

Jerusalem gherao esedokʼkan

¹ Uni do arhõe metadińạ, “E manwa hopon, ńitokʼ do mitʼṭecʼ hasa reakʼ paṭa ạgukate iń samaṅre dohoyme ar ona cetanre Jerusalem nagraha reakʼ muṭhạn benaome.

² Ona beṛhaete nonka gherao esetʼakʼ dohoyme; ona upạrte mitʼṭecʼ usul pạcri benaome ar beṛhaete mitʼṭecʼ pinḍhạ upʼ rakabme, ar nagraha upạrte lạṛhại phạdkoakʼ ḍera benaome ar ona beṛhaete pạcri rạpud reakʼ jontroko bạisạume.

³ Ona tayom mẽṛhẽtʼ reakʼ mitʼṭecʼ paṭa hataokate ona do am ar nagraha talare pạcri leka dohoyme ar amakʼ mẽtʼãhã ona secʼ ạcurtam. Onate nagraha do esetʼ ạcur akana mente bujhạukʼa; ar nonkatem ńela, nagraha do gherao ạcur akana. Ar noa do Israel jạtrenko lạgitʼ mitʼṭecʼ cinhạge hoyokʼa.

⁴ “Ona tayom amakʼ leṅga aṛete soṛtatem giticʼa ar Israelakʼ kại reakʼ sạjại am cetanrem hataoa. Ar tinạkʼ din soṛtate giticʼ akanem tahena unạkʼ din am do onkoakʼ sạjạiyem goga.

⁵ Onkoakʼ sạjại ńam reakʼ bochor lekha hisạbkate unạkʼ din iń do gog lạgitʼ iń ematʼmea. Onate am do pesae aregel din Israelakʼ sạjạiyem goga.

⁶ “Noako purạulen khan arhõm giticʼa; niạ dhao do jojomsa aṛete soṛtatem giticʼa ar Jihudạwakʼ kại reakʼ sạjạiyem goga. Giticʼ akan tahen lạgitʼ iń do pongel din iń ematʼmea, mimitʼ bochor lạgitʼ do mimitʼ din.

⁷ Am do Jerusalem reakʼ gherao ạcur akan secʼ amakʼ mẽtʼãhãm samaṅtama ar ti cetan khon kicricʼ ocokʼkate ona nagraha upạrtem nạbiya.

⁸ Amakʼ ghekʼrao dinko ạuri cabakʼ hạbicʼ jemon banarsa aṛe bam ạcur daṛeakʼ ona iạte iń do baberteń tolkama.

⁹ “Am do guhum ar jao, malhan, mạsri dạl, kode ar guḍma guhumko hataokate mitʼṭecʼ bhajanrem dohoya ar onakote am lạgitʼ piṭhạm benao joṅa. Ar oka pe sae aregel din mitʼsa aṛete soṛtate giticʼ akanem tahen unre onam joma.

¹⁰ Din hilokʼ soṅkate barsae pongel gram jomakʼ do enhilokʼge mitʼ domem joma.

¹¹ Ona chaḍa adha liṭar khon thoṛa ḍher ńokʼ dakʼhõ dinre mitʼ domem ńũiya.

¹² Onako jomakʼ do jao reakʼ piṭhạ lekam joma; hoṛ icʼ reakʼ gõeṭhate onko samaṅrem rapakʼ akatʼakʼge.

¹³ Ar okoe do boṅgan hoṛ jạtrenko talare Israelkoń laga ńirko onko talare tahen jokhecʼ onko do nonkage besaphawakʼ jomakʼko joma.” Noa katha do Probhu Isorgeye meneda.

¹⁴ Unre ińiń menkeda, “E Probhu Isor, nonka do alo baṛe hoyokʼma. Iń do tishõ bạń besapha akana. Gidrạ khon ńit hạbicʼ acʼte gocʼ akan janwar se janwar hotete ciro gocʼicʼakʼ jãhãnakʼge bạń jomakada. Jãhãn besapha jel do ińakʼ mocate baṅ bolo akana.”

¹⁵ Uniye menkeda, “Ńelme, iń do manwa mạilạ bodolte gại guricʼ iń aṛakʼam kana, am do ona gõeṭhate piṭhạ tearkatem joma.”

¹⁶ Ona tayom uni do ińe metadińạ, “E manwa hopon, iń do Jerusalemre jom reakʼ jogao doń bonda. Hoṛko do dạndikate tulạkate jomakʼko joma ar dakʼ do tharbasaoate soṅkateko ńũiya,

¹⁷ ente jomakʼ ar ńũi reakʼ do ṭonṭa hoyokʼa. Onko do tharbasaoateko beṅgetʼ joṅa ar akoakʼ kại iạteko heṛokʼa.