Jeheskel 39 - সান্তালী বাইবেল

¹ “E manwa hopon, Gog upạrte am do noa nạbi katha roṛme, Probhu Isore menetʼkana, ‘E Mesok ar Tubạlren maraṅ disạm cakʼlaoyicʼ Gog, am secʼ do bạnuńa.

² Am do tayom secʼ ạcur ruạṛkateń or idimea. Ar utạr reakʼ ses simạ khon ạgukate Israel reakʼ buruko upạrteń kolmea.

³ Ona tayom iń do amiń ghạlmea ar amakʼ leṅga ti khon akʼ ar jojom ti khon do sar iń giḍikatama.

⁴ Israel reakʼ buruko cetanre am ar amren sanam lạṛhại phạdko ar am sãote jạtrenko do giḍi akanko tahẽkan. Ar am do gidi ar janwarkoakʼ jomakʼgeń hoyocomea.

⁵ Am do ṭạnḍire giḍi akangem tahena, ente iń Probhu Isorge noa katha doń menetʼkana.

⁶ Magogre ar okoe do sạṅgiń disạmkore khạtirjomako girobasokʼ kan onko cetanre do seṅgeliń kola; ar onateko baḍae daṛeakʼa, ińkangeạń Probhu Isor do.

⁷ “Ińren hoṛ Israelko talare iń do ińakʼ sonottetʼ iń sodortińạ. Ińakʼ ńutum do ar bạń besonot ocowakʼa; onate jạtrenko baḍae daṛeakʼa, ińkangeạń Probhu Isor Israelren uni sonoticʼ.

⁸ Ńelpe, noa do hijukʼkana ar hoyokʼgea. Noa din reakʼ kathage iń Probhu Isor doń menleda.

⁹ “ ‘Unre Israel reakʼ nagrahare tahenko do bahrete oḍok calakʼa ar sahan leka lạṛhại reakʼ khanḍa bhanḍako jeretʼ giḍikakʼa. Onko do kạṭicʼ ar lạṭu ḍhalko, akʼ-sarko, lạṛhại reakʼ mutạkko ar borlomkote eae bochor hạbicʼ sahan lekako jereda.

¹⁰ Onko do sahan jogaṛ lạgitʼ ṭạnḍi khon se bir-gajaṛ khon ạgu baṅ lagao akoa, ente sahan bodolte khanḍa bhanḍako jereda. Onko do luluṭkoakʼ jinisko luṭ joṅa; ar rerecʼkoakʼ jinisko recʼ ruạṛkoa. Iń Probhu Isorge noa katha doń menetʼkana.

¹¹ “ ‘Enhilokʼ Gog do Israelko talare mitʼṭecʼ topa ṭhạ̃iyiń emaea. Ona do doreão purub secʼ dãṛãnkoakʼ buru-nalage hoyokʼa. Ar ona do sen paromokʼkan hoṛkoakʼ hore esedtakoa, ente Gog ar uniren sanam phạdko do onḍeko topa ocokʼa. Ona iạte ona do Gogren hoṛkoakʼ buru-nalage hoyokʼa.

¹² Israelko do eae cando hạbicʼ onkoakʼ topa iạte disạmko bhonḍa.

¹³ Disạmren sanam hoṛ do onkoko topakoa. Nonkate ińakʼ ṭhonok sodorokʼ dinre onkoakʼ ńutum do pasnaokʼtakoa.

¹⁴ Ona eae cando mucạtʼre disạm saphae lạgitʼ hoṛko bahal ocokʼa. Onko do goṭa disạm dãṛã dãṛãte giḍi akan jaṅko sendra toda arko topakakʼa.

¹⁵ Disạm talare dãṛãn jokhecʼ jãhãege manwawakʼ mitʼṭecʼ jaṅe ńelńam enḍekhan tin hạbicʼ topa lala hoṛko do Gogren hoṛkoakʼ buru-nalare bako topae unhạbicʼ onko do ona jaṅ lạgitʼ mitʼṭecʼ cinhạko bitʼ dohoya.

¹⁶ Nonkate onko do disạmko saphaea. Ona buru-nala otet reakʼ mitʼṭecʼ nagraha reakʼ ńutum do Hamoena (mane do hoṛkoakʼ) dohokʼa.’

¹⁷ “E manwa hopon, iń Probhu Isorgeń menetʼkana, am do joto lekan cẽṛẽko ar sanam bir janwarko hohoatem metakoa, ‘jarwakʼpe ar ape lạgitʼ Israelakʼ buru boṭkocʼkore one okare maraṅ okocʼ dãṛẽ reakʼ iń bondobos akatʼ ona lạgitʼ beṛhae secʼ khon jarwakʼpe. Onḍe ape do jel ar mãyãmpe joma.

¹⁸ Ape do daṛean hoṛkoakʼ jelpe joma ar dhạrtiren disạm cakʼlaokoakʼ mãyãmpe ńũiya; noko hoṛko do Bason disạmren moṭa soṭa bheḍa, bheḍa hopon, merom boda ar ḍaṅgra leka kanako.

¹⁹ Ar okaṭakʼ dãṛẽ reakʼ ape lạgitʼ iń bebostayetʼ onate lacʼ ạuri bikʼtape hạbicʼ itilpe joma ar ạuripe bul bhuteṛokʼ hạbicʼ mãyãmpe ńũiya.

²⁰ Ińakʼ ṭebilre ape do lacʼ perecʼ sadomko reakʼ, rãt gạḍi cakʼlaoko reakʼ, daṛean hoṛko reakʼ ar sanam lạṛhại phạdko reakʼ jelpe joma.’

²¹ “Iń do jạtrenko talare ińakʼ ṭhonok iń sodora ar ińakʼ daṛeanakʼ tite onko okaṭakʼ sạjạiyiń emako ona do sanam jạtrenko ńela.

²² Enhilokʼ khon Israelko doko baḍae daṛeakʼa, ińkangeạń onkoren Probhu Isor do.

²³ Ar jạt jạtrenko doko baḍae daṛeakʼa, Israelko do akoakʼ kại iạte bondi dosateko senlena mente, ente onko do ińre bepạtiạuko tahẽkana. Ona iạte ińakʼ mẽtʼãhã do onko khoniń betʼ esetʼ akatʼ tahẽkana ar bạirikoakʼ tireń soprotletʼkoa; ar onko do jotoge lạṛhạireko gocʼlena.

²⁴ Iń do onkoakʼ besaphawakʼ leka ar onkoakʼ pap ghạṭiko lekageń halawatʼkoa ar onko khon ińakʼ mẽtʼãhãń betʼ esetʼletʼtińạ.”

²⁵ Probhu Isor do arhõe menkeda, “Jakob do ńitokʼ bondi dosa khoniń ruạṛ ạguyea ar Israelren sanam hoṛkoń mãyãwakoa ar ińakʼ ńutum reakʼ sonottetʼ lạgitʼ iń ãṭokʼa.

²⁶ Ar onko do akoakʼ disạmre tinre khạtirjomako girobasokʼa ar okoehõ bako botor ocokoa ar unre iń upạrteko kạmiletʼ akoakʼ lajao ar sanam bepạtiạrakʼko hiṛińạ.

²⁷ Ar iń do jạt jạtrenko tala khon ar bạirikoakʼ disạm khoniń jarwakoa ar ḍher jạtrenkoakʼ mẽtʼãhã samaṅre onko hotete ińakʼ sonottetʼ iń sodortińạ.

²⁸ Unre onko doko baḍae daṛeakʼa, onkoren Probhu Isor doń ińkangea, ente jạt jạtrenko talare bondi dosareń kolletʼko tahẽkanre hõ onko do akoakʼ disạmteń ruạṛ ạgukoa, ar okoehõ bạń bạgi oṭoakoa.

²⁹ Onko ṭhen khon ińakʼ mẽtʼãhã do ar bạń betʼ esetʼkakʼa, ente Israelko cetanre iń do ińren Jiu iń dulea. Iń Probhu Isorge noa katha doń menetʼkana.”