Jeheskel 38 - সান্তালী বাইবেল

Gog upạrte nạbi katha

¹ Probhu Isor do ińe metadińạ,

² “E manwa hopon, am do Mogog disạm reakʼ Mesok ar Tubạlren maraṅ disạm cakʼlaoyicʼ Gog secʼ samaṅkate noa nạbi katha roṛme,

³ Probhu Isore meneda, ‘E Mesok ar Tubạlren maraṅ disạm cakʼlaoyicʼ Gog, iń do am secʼren doń baṅkana.

⁴ Am do tayom secʼ iń ạcurmea ar amakʼ jambere bạ̃ṛsiń lagaoa ar amakʼ goṭa lạṛhại phạdko sãote, metakʼme sanam sadomko, mońj kicricʼ horokʼakatʼ aswariko ar lạṭu kạṭicʼ ḍhalko ar tarwaṛeko sudhạ mitʼ maraṅ okocʼ dol sãote amiń oḍok ạgumea.

⁵ Onko sãote Pharas, Kus ar Puṭ disạmren lạṛhại phạdko tahena; onko sanamkoge ḍhal ar bohokʼ rurukhiyạ ṭupri horokʼ akaeko tahena.

⁶ Gomer disạmren sanam lạṛhại phạdko ar utạr secʼ reakʼ ses simạna reakʼ Beth-Togarma disạmren sanam lạṛhại phạdko am sãoteko tahena. Ar ḍher jạtrenkoge am sãoteko tahena.

⁷ “ ‘Ma sapṛaokʼme; am beṛhaete jarwa akan sanam dol bolko salakʼ, ape do apnartetʼ sapṛaokʼpe ar am do onkoren subedar hoyokʼme.

⁸ Ḍher bochor tayom am do lạṛhại lạgitʼem hoho ocokʼa. Unre am do nonkan mitʼṭecʼ disạm cetanre jhãpem ema okaṭakʼ disạm do lạṛhại khon rehaye ńamakatʼ, one onaren hoṛko do ḍher jạtrenko tala khon Israel reakʼ burureko jarwa akan. Ona disạm do ḍher din khon ujạṛakʼ tahẽkana, menkhan am do jhãp ạurim emrege uniren hoṛko do eṭakʼ eṭakʼ jạtrenko tala khonko oḍok ạgu ocokʼa, ar unre onko do jotoge khạtirjomako tahena.

⁹ Amren sanam lạṛhại phạdko ar am sãoten ḍher jạtrenko do ona disạm cetanre jhãp em lạgitʼ hoe bharḍo lekako laha idikʼa; ar ape do rimil leka disạmpe chạplạu eseda.

¹⁰ “ ‘Enhilokʼ amakʼ monre do aema lekan hudisko hecʼama ar mitʼṭecʼ bạṛicʼ bundisem perejokʼa.

¹¹ Arem mena, nonkan mitʼṭecʼ disạmre jhãpiń ema one oka reakʼ atokore pạcri bạnukʼ. Am do sulukte ar khạtirjoma tahen hoṛko cetanre jhãpem ema one okoe do pạcri, phaṭok duạr, ar huṛkạṛ chaḍageko girobasokʼ kan.

¹² Am do onkoakʼ jiniskom recʼkoa arem luṭtakoa ar dhaṅ dhaserakʼ jut aroakan jaegako upạrte ar jạt jạtrenko tala khon jarwa akatʼko hoṛ upạrte amakʼ tiyem tultama. Ona jokhecʼ onko hoṛ do janwarko ar jiniskote kisạ̃ṛ akanko tahena ar disạm do dhạrti reakʼ tala utạrakʼ ṭhạ̃ige hoyokʼa.

¹³ “ ‘Unre Seba, Dedan ar Tạrsis ar uniyakʼ sanam atokoren bạnij bekʼparko do amko kulimea, am do luṭ paṭ lạgitʼem hecʼakana se sona rupạ, janwarko ar jinisko idiy lạgitʼ ar ḍher jinisko recʼ idiy lạgitʼ amren dol bolkom jarwa akatʼkoa?’

¹⁴ “Onatege, E manwa hopon, Gog do noa nạbi katham metaea, Probhu Isore menetʼkana, ‘enhilokʼ tinre ińren hoṛ Israelko do khạtirjomako girobasokʼa unre cetʼ ona do bam baḍaea?

¹⁵ Utạr secʼakʼ mucạtʼ simạna reakʼ amakʼ ṭhạ̃i khon am ar am sãote aema jạtren hoṛko do sadomre decʼkate mitʼ maraṅ ar daṛean lạṛhại phạdko rakapʼ hijukʼa.

¹⁶ Am do rimil leka disạmem dapal eseda ar ińren hoṛ Israelko upạrtem rakapʼ hijukʼa. E Gog, mucạtʼre ińakʼ disạm upạrte amiń ạgumea. Unre iń do jạt jạtrenkoakʼ mẽtʼãhã samaṅre iń apnartetʼ do am hotete sonot menteń udugokʼa jemon onko do ińko baḍae daṛeạń.

¹⁷ “ ‘Iń Probhu Isorgeń menetʼ kana, sedaeakʼ dinkore ińren gutiko, metakʼme Israelren nạbiko hotete okoeyakʼ kathań roṛletʼ uni do cetʼ am dom baṅkana? Ona jokhecʼ bochorke bochor nạbikoko menleda, iń do onko upạrteń ạgumea.

¹⁸ Enhilokʼ Gog do tinre Israel disạmre jhãpe ema unre iń do edreteń jaljalaokʼa.

¹⁹ Iń do jaljalaokʼkan edreteń lại sodoretʼkana, ona jokhecʼ Israel disạmre ạḍi botor dhạrti laṛao hoyokʼa.

²⁰ Unre jalapuriren hakoko, coṭren cẽṛẽko, birren janwarko, ot cetanren mimitʼ leńokʼ ṭunḍạṅokʼko ar dhạrtiren sanam hoṛ do iń samaṅreko thar tharaokʼa, Maraṅ buruko do ulṭạukʼa, usul buruko do khanḍa khunḍikʼa ar joto pạcri do otre lạnduṛ ńurokʼa.

²¹ Ińakʼ disạm reakʼ sanam buruko cetanre Gog upạrte lạṛhạiyiń ạguiya. Mitʼke mitʼ manwawakʼ tarwaṛe do acʼren boeha upạrte tahentaea.

²² Iń do mahamạri ar mãyãmte Gogiń sạjạiyea; botoranakʼ dakʼ, arel ar jolokʼkan gondhok do uni cetanre, ar uniren lạṛhại phạdko cetanre ar uni soṅgeten sanam jạtrenko cetanreń upʼ gotʼkakʼa.

²³ Ar nonkate iń do jạt jạtrenkoakʼ mẽtʼãhã samaṅreń sodorokʼa; ar dhorom ar sonotgeń sodora. Unre onkoko baḍae daṛeakʼa, ińkangeạń Probhu Isor do.’