Jeheskel 37 - সান্তালী বাইবেল

Rohoṛ jaṅko reakʼ buru-nala

¹ Probhu Isorakʼ ti do iń cetanre tahẽkana ar uni do acʼren Jiu hoteteye idikedeńte mitʼṭecʼ buru-nala reakʼ otetreye dohokedińa; ona ṭhạ̃i do jaṅkote perecʼge tahẽkana.

² Uni do onako reakʼ beṛhaeteye idikedińa. Ar ona buru-nala reakʼ otetre aema jaṅkoń ńelkeda; onako do rohoṛge tahẽkana.

³ Uni do ińe kulikedińa, “E manwa hopon, noako jaṅ do cetʼ jiwetʼ daṛekokʼgea? ” Ińiń menkeda, “E Probhu Isor, eken amge ona dom baḍaea.”

⁴ Unre uni do ona jaṅko ṭhen noa nạbi katha roroṛe metadińạ, “E rohoṛ jaṅko, ape do Probhu Isorakʼ katha ańjompe.

⁵ Probhu Isore menetʼkana, ‘iń do apere sahẽtʼ iń aderapea arpe jiwedokʼa.

⁶ Iń do apeakʼ jaṅko sãote jaṅkoń tolkatapea, ar apeakʼ jelkoń janam ocoya ar hartate onakoń esetʼ ocoya. Ar sahẽtʼ iń emapea arpe jiwedokʼa. Unre ape dope baḍae daṛeakʼa, ińkangeạń Probhu Isor do.’ ”

⁷ Ar cetʼ lekań hukum ocolen onkage iń do nạbi kathań roṛkeda. Nạbi katha roroṛ jokhecʼge khaṭ khoṭ saḍeń ańjomkeda ar mitʼke mitʼ jaṅ do apan ạpin jaṅ sãote joṛao mitʼena.

⁸ Ińiń ńelkeda jaṅko sãote jaṅ tolena, ar ona cetanre jel hoyena ar hartate ona do dapal esetʼena, menkhan onkore sahẽtʼ do baṅ tahẽkana.

⁹ Unre uni do ińe metadińạ, “Am do hoe ńutumte nạbi katha roṛme; E manwa hopon, noa nạbi katha roṛme, Probhu Isore menetʼkana, ‘E hoe, am do beṛhae secʼ khon hijukʼme ar noko gocʼ hoṛkore sahẽtʼ emokʼme jemonko jiwedokʼ.’ ”

¹⁰ Ona iạte uniyakʼ hukum lekage iń do nạbi kathań roṛkeda ar unre onkore sahẽtʼ boloyena; ar onko doko jiwetʼena ar jaṅgateko teṅgoyena. Onko do mitʼṭecʼ maraṅ okocʼ lạṛhại phạdko tahẽkana.

¹¹ Ona tayom uni do ińe metadińạ, “E manwa hopon, noako jaṅ do hoyokʼkana sanam Israel jạtrenkoge. Onkoko meneda, ‘aleakʼ jaṅ do rohoṛ akantalea ar aleakʼ ashõ bạnukʼtalea; ale dole gocʼakana.’

¹² Onatege am do onko ṭhen noa nạbi katha roṛme, Probhu Isore menetʼkana, ‘E ińren hoṛko, iń do apeakʼ topa jhicʼkate onḍe khon iń rakapʼ ạgupea. Israel disạmre apeń ruạṛ ạgupea.

¹³ Iń do tinre apeakʼ topakoń jhijtapea ar onḍe khoniń oḍok ạgupea unrepe baḍae daṛeakʼa, ińkangeạń Probhu Isor do.

¹⁴ Ińren Jiu do apereń emokʼa ar ape dope jiwedokʼa. Ar apeakʼ disạmreń girobas ocopea. Unrepe baḍae daṛeakʼa, iń Probhu Isorge noa katha doń menetʼkana ariń onka akada.’ ”

Mitʼṭen raj tabere mitʼ jạtrenko

¹⁵ Probhu Isorakʼ noa katha do iń ṭhen sodorena,

¹⁶ “E manwa hopon, mitʼṭecʼ ṭheṅga hataokate am do ona cetanre noa katha olme, ‘Jihudạ ar ona sãote Israelko lạgitʼ.’ Ona tayom ar mitʼṭecʼ ṭheṅga ạgukate ona cetanre olme, ‘Ephrayem reakʼ ṭheṅga, metakʼme Joseph ar uni sãoten sanam Israelko lạgitʼ.’

¹⁷ Tayomte ona banar ṭheṅga joṛaokate mitʼṭecʼ ṭheṅga benaome jemon amakʼ tire ona banar ṭheṅga do mitʼṭecʼ ṭheṅgage hoyokʼ.

¹⁸ “Ar am jạtren hoṛko tinreko kulimea, ‘am do cetʼ noa reakʼ mane bam lạiyalea?’

¹⁹ Unre onkom metakoa, Probhu Isore menetʼkana, ‘Ephrayemakʼ tire Joseph ar uni sãote Israelren gusṭiko reakʼ oka ṭheṅga menakʼ iń do ona hataokate Jihudạ reakʼ ṭheṅga sãote joṛaokate mitʼṭecʼ ṭheṅgageń hoeocoya ar ona banar do ińakʼ tire mitʼṭecʼge hoyokʼa.’

^20-21 Am okakin ṭheṅga cetanrem olakatʼ ona do unkinakʼ mẽtʼãhã samaṅre dohokate unkinem metakinạ, Probhu Isore menetʼkana, ‘Israelko okoe jạtrenko talare menakʼko onḍe khon iń do onkoń oḍok ạgukoa. Ar beṛhae secʼ khoniń jarwakoa ar akoakʼ disạmteń ruạṛ idikoa.

²² Onḍe Israel reakʼ buruko cetanre onko lạgitʼ mitʼṭecʼ rajosṭiń benaoa. Onko sanamko cetanre mitʼṭen rajgeye hoyokʼa ar onko do tishõ barea do bako hoyokʼa ar barea rajosṭi do baṅ hạṭińokʼa.

²³ Onkoren sanam boṅga murhutʼkote se jãhãn behokakʼte onko do apnartetʼ ar bako bhonḍokʼa. Iń do onkoakʼ sanam kại ar bạṛicʼ hor khoniń rukhiyạkoa ariń saphakoa. Onko do ińren hoṛko hoyokʼa ar iń do onkoren Isoriń hoyokʼa.

²⁴ “ ‘Ińren guti Dạud do onkoren raje hoyokʼa ar sanamkoren gukʼpiyicʼ do mitʼṭengeye hoyokʼa. Onko do ińakʼ ạn-ạri lekako calakʼa ar ińakʼ sanam niạm sontorteko manaoa.

²⁵ Ar okaṭakʼ disạm do ińren guti Jakob iń em akawadea, ar okaṭakʼ disạmre onkoren hapṛamko girobasokʼ kan tahẽkan onḍege onko hõko girobasokʼa. Onko ar onkoren hoponko, hoponerako ar goṛom gidrạko onḍe jaejugko tahena ar ińren guti Dạud do jaejug hạbicʼ onkoren raje hoyokʼa.

²⁶ Onko lạgitʼ mitʼṭecʼ bhạlạiyanakʼ bondobosiń dohoya; ar ona do jaejug lạgitʼ mitʼṭecʼ bondobosge hoyokʼa. Onko do daṛeankoń hoyocokoa ar onkoakʼ lekhań baḍhao ocoytakoa ar ińakʼ oṛakʼ do jaejug lạgitʼ onko talareń bạisạutińạ.

²⁷ Ińakʼ tahen ṭhạ̃i do onko talarege hoyokʼa; iń do onkoren Isoriń hoyokʼa ar onko do ińren hoṛko hoyokʼa.

²⁸ Ińakʼ oṛakʼ do tinre jaejug lạgitʼ onko talare hoyokʼa unre jạtren sanamko baḍaea daṛeakʼa, iń Probhu Isorge iń ńutumte Israel doń begar dohoakadea.’ ”