Jeheskel 36 - সান্তালী বাইবেল

Israel reakʼ buruko lạgitʼ nạbi katha

^1-2 Probhu Isor do ińe metadińạ, “E manwa hopon, Israel reakʼ buruko ṭhen nạbi katha roṛme ar Probhu Isorakʼ noa katha ańjom lạgitʼem metakoa, bạiriko do onko reaṅe menetʼkana, ‘Ah! Mare usul ṭhạ̃iko do aboakʼ dokholre hecʼakana.’

³ Onatege iń Probhu Isoriń menetʼ kana, jạt jạtrenkoakʼ dokholre jemonpe hijukʼ ar jemon hoṛko hiskạ arko landa dhutʼape ona lạgitʼ onko do beṛhae secʼ khonko maraoetʼpea arko utʼetʼpea.

⁴ Onate E Israel reakʼ buruko, ape do ińakʼ katha ańjompe. E maraṅ ar huḍiń buruko, khandṛaṅko, buru-nalako, ujạṛ utạrakʼ dhaṅ dhaserakʼko ar ape beṛhaeten eṭakʼ eṭakʼ jạtrenko okoe do luluṭko ar landa dhudhutʼkope hoyocoakatʼko ona bạgi oṭowakʼ nagrahako,

⁵ Iń Probhu Isorgeń menetʼkana, ińakʼ dugur dugurokʼkan edre iạte eṭakʼ jạtrenko ar sanam Edomrenko upạrte kathań roṛetʼkana, ente onko do goṭa mon reakʼ rạskạte ar nihạ̃t gikʼḍi monte ińakʼ disạm do ạidạri menteko hạtińana; jemon onako ạidạri daṛeakʼ arko luṭ daṛeakʼ. Iń Probhu Isorge noa katha doń menetʼkana.

⁶ “Am do Israel disạm upạrte nạbi katha roṛme. Uniyakʼ maraṅ buruko ar huḍiń buruko, khandṛaṅko ar buru-nalakom metakoa, Probhu Isore menetʼkana, ‘ińakʼ dugur dugurokʼ kan edreteń menetʼkana, ente ape do boṅgan hoṛ jạtrenkoakʼ nisṛạupe dipil akada.

⁷ Ona iạte iń do kiriạkateń menetʼkana, ape beṛhaeten jạtrenko hõ akoakʼ nisṛạuko dipiltakoa.

⁸ “ ‘Menkhan E Israel reakʼ buruko, ape do apeakʼ dare reakʼ ḍạrkope kahle oḍok ocoyte ińren hoṛ Israelko lạgitʼ ḍher jope jokʼa, ente onko do usạratege oṛakʼteko ruạṛ hijukʼa.

⁹ Iń do ape secʼge minạńa ar apegeń moneyapea; onate apere do casogokʼa ar itạ hõ erogokʼa.

¹⁰ Apere goṭa Israel jạtren hoṛkoakʼ lekhań ḍher ocoya. Nagrahakore hoṛko girobasokʼa ar dhaṅ dhaserakʼ do arhõ benao arokʼa.

¹¹ Apere manwa ar janwarkoakʼ lekha hõń ḍher ocoya ar onko doko bạḍ idikʼa ar lekhareko ḍherokʼa. Ar apere lahate lekage hoṛkoń girobas ocokoa ar laha khon hõ ḍher gidrạkoń hoyocokotapea. Unrepe baḍae daṛeakʼa, ińkangeạń Probhu Isor do.

¹² Iń do ape cetante hoṛko, metakʼme ińren hoṛ Israelkoń dãṛãbaṛa ocokoa. Onko do apeko ạidạripea ar onkoren ạidạri reakʼ ṭhạ̃ipe hoyokʼa; ar tishõ bin gidrạwanko do bape hoyocokoa.

¹³ “ ‘E Israel disạm, hoṛ doko metamkana, am do hoṛ jojomicʼ kanam ar apnar jạtrenko do bin gidrạwan kom hoyoco akatʼkoa.

¹⁴ Menkhan ińiń menetʼkana, manwa do ar alom utʼkoa ar am jạtren hoṛko hõ bin gidrạwanko alom hoyocokoa.

¹⁵ Jạt jạtrenkoakʼ landa dhutʼicʼ do ar bạń hoyocomea ar onkoakʼ henosta hõ ar bam ańjoma. Am khạtirte amren hoṛko do ar bako tohodokʼa. Iń Probhu Isorge noa katha doń meneda.’ ”

¹⁶ Ona tayom Probhu Isor do ińe metadińạ,

¹⁷ “E Manwa hopon, Israelrenko akoakʼ disomreko girobasokʼ jokhecʼ onkoakʼ colon ar kạmiko hotete disạmko bhonḍleda. Ar ińakʼ mẽtʼre onkoakʼ colon do maejiukoakʼ candoteakʼ reakʼ besaphawakʼ lekage tahẽkana.

¹⁸ Ona iạte ińakʼ raṅgao do onko cetanreń upʼleda, ente onko do disạm talare mãyãmko joroleda ar onkoren boṅga murhutʼkote disạmko bhonḍleda.

¹⁹ Ona iạte boṅgan hoṛ jạtrenko ar disạmko talareń chir chạturletʼkoa; ar onkoakʼ colon ar kạmi lekateń sạjạiletʼkoa.

²⁰ Ar jạt jạtrenko talare jãhãregeko senlen onḍege ińakʼ sonot ńutumko besonot letʼtińạ, ente hoṛ do onko reaṅko roṛetʼ tahẽkana, ‘Probhuren hoṛ kanako, enhõ uniyakʼ disạm khon oḍokʼ hijukʼ hoyentakoa.’

²¹ Ińakʼ ńutum reakʼ sonottetʼ rukhiyạitiń lạgitʼgeń moneyatʼ tahẽkana, ente Israel hoponko do jạt jạtrenko talare ińakʼ ńutumko besonot akatʼtińạ.

²² “Onatege am do Israelkom metakoa, Probhu Isore menetʼkana, ‘E Israelko, ape khạtirte noakoń kạmi lạgidokʼkan ona do baṅa, menkhan ińakʼ ona sonot ńutum khạtirtege onań onkaea. Ape okoe do jạt jạtrenko talarepe senlen onḍege ińakʼ ńutumpe besonot akada.

²³ Okaṭakʼ ńutum do jạt jạtrenko talare besonot hoyakan ona ińakʼ maraṅ ńutum reakʼ sonottetʼ iń do apeń udukʼapea; ente onko talare ape do ona ńutumpe besonot akada. Iń do onkoakʼ mẽtʼãha samaṅre ape hotetege ińakʼ ńutumiń sonot ocoytińạ ar unre jạt jạtrenko baḍae daṛeakʼa, ińkangeạń Probhu Isor do.

²⁴ “ ‘Boṅgan hoṛ jạtrenko tala khon ińge apeń oḍok ạgupea; ar goṭa disạm khoniń jarwapea ar apeakʼ disạmteń ruạṛ ạgupea.

²⁵ Ape cetanre saphakʼ reakʼ dakʼ iń chiṭkạu apea, ar onatepe saphakʼa; apeakʼ sanam hirkhạwakʼko ar boṅga murhutʼko khon apeń saphapea.

²⁶ Iń do apere nãwã ontor ar nãwã moniń emapea; ar apeakʼ keṭecʼ moniń sạṅgiń ocoyte lạbitʼ moniń danapea.

²⁷ Apere ińren Jiu iń bạisạuapea ar nonkań hoyocopea jemon ińakʼ sanam niạmpe manaotiń. Onate ape do ińakʼ ạn-ạṛikope moneyakʼa.

²⁸ Ar aperen hapṛamko okaṭakʼ disạm iń ematʼko tahẽkan onḍegepe girobasokʼa; ape do ińren hoṛpe hoyokʼa ar iń do aperen Isor iń hoyokʼa.

²⁹ Iń do apeakʼ sanam besaphawakʼ khoniń rukhiyạpea. Ar aema phosolkoń emapea ar apeakʼ disạmre akal do ar bạń kola.

³⁰ Iń do dare reakʼ jo ar khet reakʼ phosolkoń baḍhao ocoytapea jemon akal khạtirte jạtrenko talare alope bemanot ocokʼ.

³¹ Ar unre ape do apeakʼ bạṛicʼ colon ar bạṛicʼ kạmiko reakʼ kathape disạiya ar apeakʼ kại ar bạṛicʼakʼ kạmiko iạte apnartetʼpe hirkhạ joṅa.

³² Ape do baḍaekakʼpe, ape khạtirte noa kạmi do bạń kạmi lạgidokʼkana. E Israel jạtrenko, apeakʼ colon iạte lajao ar dukokʼpe.

³³ “ ‘Iń Probhu Isorgeń menetʼkana, oka hilokʼ sanam kạiko khoniń saphapea enhilokʼ iń do nagrahakore hoṛkoń girobas ocokoa ar dhaṅ dhaserakʼ ṭhạ̃iko arhõń benao aroya.

³⁴ Ar parom senokʼre hoṛko do okaṭakʼ disạm jarkhar akanko ńelletʼ ona disạmre do cas abadokʼa.

³⁵ Onko doko mena, noa disạm do lahate maraolen tahẽkana, menkhan ńitokʼ ona do Eden bagwan leka hoyakana; ona reakʼ nagrahako do maraoakʼ, ujạṛakʼ ar jarkharakʼ hoylena, menkhan ńitokʼ do pạcrite esetʼ ar ḍerakʼ ṭhạ̃ige hoyakana.

³⁶ Unre ape beṛhaete jiwetʼ tahen jạt jạtrenko baḍae daṛeakʼa, iń Probhu Isorge dhaṅ dhaserakʼko arhõń benao aro akada ar ujạṛakʼ ṭhạ̃ikore arhõ darekoń rohoe akada. Iń Probhu Isorge noa katha doń menakada ar ińge onań onkaea.’ ”

³⁷ Ona tayom Probhu Isor do ińe metadińa, “Iń do ar mitʼ dhao Israel jạtrenko iń ṭhen nehõrokʼ iń metakoa ar onkoakʼ nehõrokʼakʼ lekate bhiḍi palko leka onkoren hoṛko alekhań hoyocokoa.

³⁸ Jerusalemre niṭ akatʼ porobre cetʼleka samaṅokʼ bheḍakote perejokʼkan tahẽkan onkage dhaṅdhaser akan nagrahako do alekha manwakote perejokʼa. Unre onko doko baḍae daṛeakʼa, ińkangeạń Probhu Isor do.”