Jeheskel 34 - সান্তালী বাইবেল

Israelren gukʼpiyicʼ

¹ Probhu Isoe do ińe metadińạ,

² “E manwa hopon, Israelren gukʼpiko upạrte am do nạbi lekate niạ katham lại jạhira, Probhu Isore menetʼkana, ‘Hae, Israelren onko gukʼpiko do, okoe do eken apnargeko ńel jujutkan! Bhiḍiko ńel todarotko do cetʼ gukʼpikoakʼ lek do baṅkana?

³ Ape do toape jomeda, ar upʼte do kiricʼ benaokatepe horokʼeda ar bachao akan bheḍakope guretʼkoa, menkhan bhiḍiko do bape jotonetʼkoa.

⁴ Ape do nijor akanko bape daṛe ocoletʼkoa, ruạkʼko bape boge ocoletʼkoa, ghạl akankoakʼ ghaoko bape bedhao letʼtakoa. Ar okoe bạṛicʼ horteko sen akan onko hõ bape ruạṛ ạguletʼkoa ar atʼ akan hoṛkoakʼ khoj tolas hõ bape hataoleda, bickom kajak ar kurmutạha lekape ḍanṭao akatʼkoa.

⁵ Gukʼpiko bạnukʼko iạte onko doko chirchạtur akana ar bir janwarkoren adharko hoyakana.

⁶ Ińren bhiḍiko do goṭa buru-nalakoreko ạcur baṛaekana. Goṭa dhạrtireko chirchạtur akana; okoehõ onkoakʼ khoj tolas do bako hatao akada.

⁷ “ ‘Onatege, E gukʼpiko, ape do ińakʼ katha ańjompe.

⁸ Iń Probhu Isorge iń ńutumte kiriạkateń menetʼkana, gukʼpiko begorte ińren palko do luṭren jinisko hoyakana ar bir janwarkoren adharko hoyakana. Ińren gukʼpiko do ińren palrenkoakʼ khoj tolas bako hatao akada ar ńel hõ bako ńel todarotletʼkoa; ona bodolte onko do ako apnargeko ńel todarotokʼ kana.

⁹ Ona iạte, E gukʼpiko, ińakʼ katha ańjompe.

¹⁰ Iń Probhu Isorgeń menetʼkana, iń do gukʼpiko secʼ do bạnuńạ; ar onkoakʼ ti khon ińren bhiḍikoń hataokoa. Ar ińren pal gukʼpiko khoniń ocokʼkoa jemon apnartetʼ aloko lab daṛeakʼ. Onkoakʼ moca khon ińakʼ palrenkoń rukhiyạkoa ar bhiḍiko do onkoren jomakʼ bako hoyokʼa.

¹¹ “ ‘Iń Probhu Isorgeń menetʼkana, iń apnartetʼge ińren bheḍakoakʼ khoj tolasiń hataoa ar onkoń ńel jutkoa.

¹² Gukʼpiyicʼ cetʼ leka acʼren pasnao akan palrenkoe tolasko onkage ińren bhiḍi hõń tolaskoa. Rimil ar ńut reakʼ dinre oka ṭhạ̃ikoreko pasnao akan iń do onḍe khoniń bańcao ạgukoa.

¹³ Iń do jạt jạtrenko ar disạmko tala khoniń oḍok ạgukoa ar akoakʼ disạmreń jarwakoa. Ar Israel reakʼ buru-boṭkocʼ cetanre, gaḍako aṛere ar disạm reakʼ sanam ṭhạ̃ikore onkoń gupikoa.

¹⁴ Onko do bhage bhage ạtiń ṭạnḍireń gupikoa ar Israel reakʼ usul burukore onkoakʼ ạtiń ṭhạ̃i do hoyokʼa. Onko do bhage ṭhạ̃iregeko tahena ar onḍe Israelakʼ burukore bhage ạtiń ṭạnḍireko ạtiń baṛaea.

¹⁵ Ińge ińren bhiḍikoń gupikoa ar jirạukʼ ṭhạ̃iteń idikoa.

¹⁶ Ar okoeko atʼakan onkoń sendra ạgukoa ar okoe do eṭakʼ hor secʼko ghańjeṛ akan onko doń ruạṛ ạgukoa. Ar hạn akanko do ghaokoń bedhaokatakoa ar nijorko do jorankoń hoyocokoa, menkhan lodgopʼ ar daṛeanko doń marao giḍikoa, ente iń do dhorom reakʼ bicạr talate ińren palrenkoń ńel jutkoa.

¹⁷ “ ‘E ińakʼ palrenko, ańjomtińpe. Iń do bhage bhiḍi ar bạṛicʼ bhiḍiko talareń bicạra. Ar bhiḍi ar meromko talare hõń bicạra.

¹⁸ Apeakʼ bhage ạtiń ṭạnḍi do cetʼ komkante sarecʼakʼ ạtiń jaega hõ jaṅgatepe lebetʼ gasmanḍaoa? Ar phạriạ dakʼpe ńũiyetʼ do cetʼ komkante sarecʼ dakʼ hõ jaṅgatepe leoḍa boḍeyeda?

¹⁹ Jaṅgate okape lebetʼ gasmanḍao akatʼ ar okaṭakʼ dakʼpe leoḍa boḍeakatʼ onage cetʼ ińren bhiḍiko do ńũńũi hoyokʼtakoa?

²⁰ “ ‘Ńelpe, iń Probhu Isorge lodgopʼ ar roga bhiḍiko talareń bicạra.

²¹ Joto nijor bhiḍiko ạuripe laga ńirko hạbicʼ ape do hoṛmo ar tarenkote onkope ṭhelaoetʼkoa ar dereńtepe uṭicʼ pạsiretʼkoa.

²² Onate ińren bhiḍi doń rukhiyạkoa ar luṭren jinis do bako hoyokʼa. Iń do boge bhiḍiko ar bạṛicʼ bhiḍiko talareń bicạra.

²³ Onko cetanre mitʼṭen gukʼpiyicʼ, metakʼme ińren guti Dạudiń ojokʼ bahalea; uni acʼge onkoe ńel todarotkoa ar onkoren gukʼpiyicʼe hoyokʼa.

²⁴ Iń Probhu Isorge onkoren Isoriń hoyokʼa ar ińren guti Dạud do onkoren mukhiyại hoyokʼa. Iń Probhuge noa katha doń meneda.

²⁵ “ ‘Iń do onko lạgitʼ bhạlại reakʼ mitʼṭecʼ bondobosiń dohoya ar disạm khon botoran janwarkoń marao utạrkoa jemon ińren bhiḍiko do khạtirjomako tahente bir-gajaṛkore hõko jạpitʼ daṛeakʼ.

²⁶ Iń do onkoń bhorakoa ar ińakʼ buru reakʼ beṛhaeteakʼ ṭhạ̃iko hõń bhorakʼa. Iń do okte nạpitre dakʼ iń kola; ar ona do ạsirbad reakʼ dakʼge hoyokʼa.

²⁷ Ona do ṭạnḍi reakʼ darekore joye sapʼ ocoya ar ot do phosole emokʼa; ar onko do apan ạpin jumireko girobasokʼa. Ar onkoakʼ arãṛ tinreń rạputʼ giḍikakʼa ar okoe do golamko benaoletʼko onkoakʼ ti khoniń chaḍao ạgukoa, ar unreko baḍae daṛeakʼa, ińkangeạń Probhu Isor do.

²⁸ Onko do jạt jạtkoren luluṭ jinis do ar bako hoyokʼa, bir janwarko ṭhen hõ bako jom ocokʼa. Onko do khạtirjomako tahena ar celege bako botor ocokoa.

²⁹ Iń do upjạuakʼ ot baṛgekoń emakoa; disạm talare onko do akalre ar bako paṛaokʼa ar eṭakʼ jạtrenko ṭhen hõ bako henosta ocokʼa.

³⁰ Unre onko doko baḍae daṛeakʼa, ińkangeạń onkoren Probhu Isor do ar ińge onko são sãote minạńa ar onko do metakʼme, Israelko do ińren hoṛ kanako.

³¹ E ińakʼ palrenko, ińakʼ ạtiń ṭạnḍirenko, ape do ińren kangeape ar iń doń aperen Isor kana. Ar iń Probhu Isorge noa katha doń meneda.’ ”