Jeheskel 32 - সান্তালী বাইবেল

Pharao lạgitʼ homor halaṅ

¹ Bondi dosa reakʼ gelbar bochor reakʼ gelbar cando reakʼ pạhil hilokʼ Probhu Isorakʼ noa katha do iń ṭhen sodorena,

² “E manwa hopon, Misorren raj Pharao babotre homor halaṅkate noam metaea, ‘am dom hudisetʼ tahẽkana jạtrenko modre mitʼṭen dhạcri kul kanam mente, menkhan am do tala gaḍaren mitʼṭen tayan kanam. Am do amakʼ gaḍaregem humtạgokʼkan tahẽkana, ar jaṅgate leoḍakate dakʼem boḍeyetʼ tahẽkana.

³ “ ‘Iń Probhu Isorgeń menetʼkana, iń do am cetanre jhạliń pasnaotińạ, hẽ, jạt jạtrenko sãotege ar onko do ińakʼ jhạliteko or rakapʼmea.

⁴ Iń do ṭạnḍire amiń lebda giḍikama. Ińakʼ hukumte coṭren cẽṛẽko do am cetanreko abokʼa ar dhạrtiren sanam janwarko do amko jommea arko tirpitokʼa.

⁵ Amakʼ mạ̃ṛĩ do kuṭrạkate burukore ar buru nalakoreń giḍikakʼa.

⁶ Buru-ḍuṅgri hạbicʼ iń do amakʼ mãyãmte disạmiń lohoda; ar amakʼ mãyãmte ạtukʼ dakʼ do aragokʼa.

⁷ Am sesme jokhecʼ rimil doń dapal esetʼkakʼa ar ipilkoń ńutkoa; rimilte siń candoń dapal esedea ar ńindạ cando do marsal bae emokʼa.

⁸ Am cetan reakʼ serma reakʼ joto marsal doń ńut ocoya; amakʼ disạm cetanre ńutiń ạguiya. Iń Probhu Isorge noa katha doń meneda.

⁹ “ ‘Jạt jạtrenko talare, amakʼ bin baḍaeyakʼ eṭakʼ disạmko talare tinre amakʼ ḍahao maraokʼ reakʼ sombatiń emakoa unre onko do monre dukko ńama.

¹⁰ Iń do am cetanre okań cekae ona ńelte ḍher jạtrenko doko tharbasaokʼa. Ar onko samaṅre tinre ińakʼ tarwaṛeń ạcurtińạ unre onkoren rapajko do botorteko thar tharaokʼa. Amakʼ ńurokʼ dinre onkoren mimitʼko do akoakʼ jiwi botorte jao okteko thar tharaokʼa.

¹¹ “ ‘Iń Probhu Isorgeń menetʼkana, Babelren rajakʼ tarwaṛe do am cetanre hijukʼa.

¹² Daṛean hoṛkoakʼ tarwaṛete, metakʼme sanam jạtrenko modre joto khon kurmutạha jạtrenkoakʼ tarwaṛete amren hoṛkoakʼ ńurokʼ iń hoeocoya. Onko do Misor reakʼ bạḍạiko chaka chuntaea ar onaren sanam hoṛko marao utạrkoa.

¹³ Dakʼ aṛere tahenkan onaren sanam janwarko hõń maraokoa; ona dakʼ do manwawakʼ jaṅga se janwarakʼ khurạte ar baṅ boḍekʼa.

¹⁴ Nonkate ona reakʼ dakʼ do saphageń dohoya ar ona reakʼ sanam gaḍako do sunum lekań ạtu ocoya.

¹⁵ Tinre iń do Misoriń marao giḍiyea ar disạm tala reakʼ jotowakʼ iń ujạṛa ar onḍe tahenkan sanamkoń gocʼkoa unreko baḍae daṛeakʼa, ińkangeạń Probhu Isor do.

¹⁶ “ ‘Niạko sanam katha onko do Misor lạgitʼ duk sodorkateko sereńa. Eṭakʼ jạtkoren maejiuko hõko homor sereńa. Iń Probhu Isorge noa katha doń meneda.’ ”

Gocʼkoakʼ disạm

¹⁷ Bondi dosa reakʼ gelbar bochor reakʼ pạhilakʼ cando reakʼ gelmõṛẽakʼ dinre Probhu Isorakʼ noa katha do iń ṭhen sodorena,

¹⁸ “E manwa hopon, Misorren hoṛko lạgitʼ homor halaṅpe ar okoe Seolteko pheḍ calakʼkan onko sãote uni ar eṭakʼ daṛean jạtkoren hoṛko hõ dhạrti reakʼ khandṛaṅte kolkakome.

¹⁹ Ar Misor do metaeme, ‘am do cetʼ eṭakʼko khon ḍhergem cehragea? Am do Seolte pheḍ senkate bin khatna akan hoṛko talare giticʼkokʼme.’

²⁰ Lạṛhạire okoeko gocʼakan onko modre uniren hoṛge giḍi akanko tahena. Uni do tarwaṛereye soprot ocokʼa; uniren sanam hoṛko sãote uni hõe or idi ocokʼa.

²¹ Seol tala khon daṛean lạṛhại birko do Misor ar uniren gateko reaṅko mena, ‘tarwaṛete gocʼakan onko bin khatna hoṛko do latarte hecʼkateko giticʼ akana.

²² “Ạsur do acʼren sanam lạṛhại phạdante onḍe menaea. Uni beṛhaete do acʼren sanam gocʼ hoṛkoakʼ topa menakʼa; noko sanamkoge lạṛhạireko gocʼlena.

²³ Onkoakʼ topa do Seol reakʼ khandṛaṅre menakʼa ar uniren lạṛhại phạdko do uniyakʼ topa beṛhaeteko gocʼ akana. Jiwetʼkoakʼ disạmre okoe do botorko unạnakatʼ onko sanamge lạṛhạireko gocʼ ocoakana.

²⁴ “Elam hõ onḍege menaea; uniyakʼ topa beṛhaete do acʼren sanam hoṛko menakʼkoa. Onko sanamkoge lạṛhạireko gocʼ ocoakana. Onko do jiwetʼkoakʼ disạmre botorko unạn ocoletʼ tahẽkana, menkhan mucạtʼre onko sanamkoge bin khatna akan dosare dhạrti reakʼ khandṛaṅreko pheḍena. Ar okoe Seolteko pheḍ sen akan onko sãotege noko hoṛ do akoakʼ lajaoko dipil akada.

²⁵ Gocʼ hoṛko talare do Elem reakʼ aṭetʼakʼ aṭetʼ akana; ar uniyakʼ topa beṛhaete do uni sãote uniren sanam hoṛge menakʼkoa. Noko do bin khatna akan hoṛkoakʼ lạṛhạiteko gocʼ ocoakana. Jiwetʼkoakʼ disạmre onko do botorko unạnetʼ tahẽkana, menkhan okoe Seolteko pheḍakan onko sãotege noko hoṛ do akoakʼ lajaoko dipil akada; ar gocʼ hoṛ talaregeko giticʼ akatʼkoa.

²⁶ “Mesek ar Tebal do onḍe menakʼkinạ; unkin beṛhaete do unkinren sanam hoṛkoakʼ topa menakʼa. Noko do bin khatna akan hoṛkoakʼ tarwaṛeteko gocʼ ocoakana. Jiwetʼkoakʼ disạmre onko do torasko pasnaoleda.

²⁷ Menkhan onko do bin khatna akan eṭakʼ lạṛhại birko sãote do bako giticʼ tahena. Onko lạṛhại bir do khanḍa bhanḍawante Seolteko pheḍ akana, onkoakʼ tarwaṛe do onkoakʼ bohokʼ latarre doho akana ar onkoakʼ kại reakʼ sạjại do onkoakʼ jaṅko cetanrege menakʼa. Onko do jiwetʼkoakʼ disạmre torasko udukʼako kan tahẽkana.

²⁸ “E Misor, am hõm rạputʼ ocokʼa ar onko bin khatna akan hoṛko talare giticʼ akanem tahena okoe do tarwaṛeteko gocʼ ocoakan.

²⁹ “Edom, ar uniren rapajko ar uniren sanam disạm cakʼlaoko okare menakʼko; onkoakʼ daṛe tahẽlenre hõ lạṛhạire gocʼakan hoṛko sãoteko giticʼ akana. Okoe Seolteko pheḍ sen akan onko bin khatna akan hoṛko sãote onko doko giticʼ akana.

³⁰ “Onḍe do utạr secʼren disạm cakʼlaoko menakʼkoa, onko sanamkoge ar Sidonren sanamkoge, one onko gocʼ ocoakanko tulucʼ lajao salakʼko pheḍ senakan, okoakʼ birbao daṛete sanam torasko hoyocoakatʼ tahẽkanre hõ, onko do bin khatnage tarwaṛete gur akanko tulucʼko giticʼakana, ar khandṛaṅte pheḍ calakʼkanko tulucʼ akoakʼ lajaoko dipil akatʼtakoa.

³¹ “Pharao do onkoe ńẽtʼkoa ar acʼren sanam phạdko ńutumte jiwiye raṛejtaea. Pharao ar uniren sanam lạṛhại phạdko do tarwaṛeteko ńẽtʼena, Probhu Isore meneda.

³² Iń do Pharao hotete jiwetʼkoakʼ disạmre botoriń pasnao ocoletʼre hõ enhõ uni ar uniren sanam hoṛko do bin khatna akan, lạṛhạire gocʼakan hoṛko sãoteko giticʼ ocokʼa. Ar iń Probhu Isorge noa katha doń meneda.”