Jeheskel 31 - সান্তালী বাইবেল

Lebanon reakʼ debdạru dare

¹ Bondi dosa reakʼ gelmitʼakʼ bochor reakʼ tesar cando reakʼ pạhil hilokʼ Probhu Isorakʼ noa katha do iń ṭhen sodorena,

² “E manwa hopon, Misorren raj Pharao ar uniren sanam hoṛko metakom, ‘Amakʼ maraṅtetʼ lekate am do okoe tulucʼem jurikʼkana?

³ Ạsur reakʼ katha hudiskate ńelme, uni do mitʼ din Lebanon reakʼ debdạru dareye tahẽkana. Uniyakʼ mońj mońj ḍạrko do birre umuletʼ tahẽkana; uni do ạḍi usule tahẽkana, ar ona reakʼ muthni do rimil hạbicʼ ṭuṅgạu akan tahẽkana.

⁴ Athantar dakʼte ona doe hara ocokeda ar khạndri jharna do onae usul ocokeda; ar ạtukʼ jharna do ona ṭhạ̃i reakʼ beṛhaeteye ạtu ocoyetʼ tahẽkana ar uniyakʼ gaḍako do bir reakʼ sanam dare nạ̃ṛĩko dakʼe emakʼkan tahẽkana.

⁵ Nonkate bir reakʼ joto dareko khon ona do usulena; ar ḍher dakʼe ńamketʼte ona reakʼ do maraṅ maraṅ ḍạrko hoyena ar hara idiyente pasnao idiyena.

⁶ Coṭren sanam cẽṛẽko do ona reakʼ ḍạrkoreko tukạko benao joṅana ar birren sanam janwarko hõ uniyakʼ umulreko busạgokʼkan tahẽkana; ar ona reakʼ umulre do sanam napṛakʼ napṛakʼ jạtren hoṛko ḍerakʼkan tahẽkana.

⁷ Ona pasnao akan ḍạrko reakʼ mońjtetʼ iạte ona do maraṅge tahẽkana, ente ona reakʼ rehetʼ do latar dakʼko hạbicʼ boloakan tahẽkana.

⁸ Isorakʼ bagwan reakʼ debdạru dareko hõ ona sãote do baṅ jurilena. Saro dareko hõ uniyakʼ maraṅ ḍạrko soman do baṅ tahẽkana; uniyakʼ ḍạrko sãote Armon dareko hõ baṅ jurilena. Ar mońj dareko hõ cetatge baṅ tahẽkana ona reakʼ tulni do. Isorakʼ bagwan reakʼ jãhãn dareko reakʼ husnạkʼ hõ ona leka do baṅ tahẽkana.

⁹ Aema ḍạrkote ińge ona do ṭhosokiń benaoleda; Edenre Isorakʼ bagwan reakʼ joto dare do onako hiskạwada.

¹⁰ “ ‘Ńitokʼ do iń Probhu Isorgeń meneda, ona doe usul akana, ona reakʼ muthni do rimile tiyạkʼ akada, ar usul akante bạḍạite perecʼ akana.

¹¹ Ona iạte iń do boṅgan hoṛ jạtren disạm cakʼlaoyicʼakʼ tireń soprot akadea; uni do uniyakʼ bạṛicʼtetʼ lekate uni tulucʼe beohara. Uni doń nihạ̃t giḍi akadea.

¹² Boṅgan hoṛ jạtrenko talare joto khon kurmutạha jạtren hoṛ do uniko makʼ bhinḍạṛ akadea arko bạgi oṭoakadea. Uniyakʼ maraṅ maraṅ ḍạrko do buruko ar nalako cetanre ńur akana; uniyakʼ ḍạrko do rạputʼente disạm reakʼ sanam ạtukʼ dakʼkore ńur akana. Dhạrtiren sanam jạtrenko do uniyakʼ umul khon oḍok kate uniko bạgi oṭo akadea.

¹³ Ona bhindạṛ akan darere coṭren sanam cẽṛẽko do hecʼkateko tahenkana ar birren sanam janwarko hõ uniyakʼ ḍạrreko ḍerakʼkana.

¹⁴ Ona iạte dakʼ aṛe reakʼ eṭakʼ jãhãn dareko do bạḍạite baṅ usulokʼa, ona reakʼ muthniko do rimil bae tiyoga ar ona do nunạkʼ coṭhõ baṅ hara rakabokʼa. Onako joto do manwa leka gujukʼ tabe reakʼ kana; onako do dhạrti reakʼ khạndri, metakʼme patal purite pheḍokʼ lạgitʼ ṭhik doho akana.

¹⁵ “ ‘Iń Probhu Isorge arhoń menetʼkana, oka hilokʼ Seolte ona pheḍena enhilokʼ uni lạgitʼ homor halaṅ reakʼ cinhạ lekate ona athantar dakʼ iń dapal esetʼkeda; iń do ona reakʼ sanam ạtukʼ dakʼkoń thir ocokeda, onate ona reakʼ sanam dakʼko do teṅgo thirena. Ona lạgitʼ iń do Lebanoniń homor halaṅ ocokedea ar uniyakʼ bir reakʼ mitʼke mitʼ dare do loraoena.

¹⁶ Gocʼ hoṛko sãote tinre Seolteń pheḍkadea unre uniyakʼ ńurokʼ reakʼ saḍete boṅgan hoṛ jạtrenko doko thar tharaoena. Unre Eden reakʼ sanam dareko, Lebanon reakʼ bachao akan ar soros soros dareko ar mońjte dakʼ ńam akawatʼ sanam dareko do ot reakʼ latar utạrakʼkore jiwi raṛecʼko ńamkeda.

¹⁷ Ar okoe uniyakʼ umulreko girobasokʼ kan tahẽkan, metakʼme okoe do jạt jạtrenko talareko girobasokʼ kan tahẽkan onko do uni sãote Seolre laṛhạite gocʼ akan hoṛko ṭhenko pheḍ calaoena.

¹⁸ “ ‘E Pharao raj, ṭhonok ar jakjomok secʼte Eden reakʼ dareko modre mitʼṭecʼ hõ am soman do baṅkana. Enhõ Eden reakʼ dareko sãote amhõ ot reakʼ latar utạrakʼkotem pheḍ ocokʼa; ar okoe bin khatna akan hoṛ lạṛhạiteko gocʼakan onko sãote giticʼ akanem tahena.’ “Iń Probhu Isorgeń menetʼkana, ona dare do hoyokʼ kana Pharao ar uniren sanam phạdkoge.”