Jeheskel 30 - সান্তালী বাইবেল

Misor lạgitʼ homor halaṅ

¹ Probhu Isor do arhõ ińe metadińạ,

² “E manwa hopon, am do noa nạbi katha roṛme, Probhu Isore menetʼkana, ‘enhilokʼ lạgitʼ jare jarekʼpe.

³ Mitʼṭecʼ botoranakʼ dinge hijukʼkana, ente Probhu Isorakʼ din do seṭerakana; ona do rimilte danaṅ esetʼ akan din ar boṅgan hoṛ jạtrenkoakʼ mucạtʼ okte kana.

⁴ Misor cetanre lạṛhại hijukʼa ar Kus cetanre do udạsge. Misorren hoṛko do ńur akanko tahena, ona reakʼ dhon-durib do idi ocokʼa ona reakʼ sanam ṭhạ̃i do dhaṅdhaserokʼa.

⁵ Kus, Puṭ, Lud ar sanam Arob disạm, Kub ar gate disạmren hoṛko do lạṛhạire Misorrenko sãoteko gujukʼa.

⁶ Misorren gate disạmkoren hoṛ doko gurokʼa ar uniyakʼ daṛe reakʼ bạḍại hõ cabakʼtaea. Migdol khon Seyene hạbicʼ hoṛko do lạṛhạireko gujukʼa. Iń Probhu Isorge noa katha doń meneda.

⁷ “ ‘Jarkhar akan disạmko modre Misor reakʼ dosa do arhõ bạṛicʼ hoyokʼa ar dhaṅdhaser akan nagrahako modre uniyakʼ nagrahako reakʼ dosa do artetʼge bạṛicʼ hoyokʼa.

⁸ Misorre iń do tinre seṅgeliń jolla ar onaren sanam gokʼṛokoko rạpudokʼa unre onkoko baḍae daṛeakʼa, ińkangeạń Probhu Isor do.

⁹ “ ‘Enhilokʼ nicind tahen kạnicʼ Kus do botor udukʼae lạgitʼ sombat akʼsenko ińakʼ hukum lekate jahajteko oḍok calakʼa. Misor reakʼ ses dinre Kus hõe udạsokʼa, ente ona din do uni cetanre hõ hijukʼa.

¹⁰ “ ‘Iń Probhu Isorgeń menetʼkana, Babelren raj Nebukadnesarakʼ tite Misor reakʼ anecʼ dhanecʼ iń caba utạra.

¹¹ Uni ar uniren lạṛhại phạdko, metakʼme jạt jạtrenko talare okoeko kurmutạhage onkogeko ạgu ocokʼa disạm jarkhar lạgitʼ. Onko do Misorre jhãpko ema ar gocʼ hoṛkote disạmko pereja.

¹² Ar iń do nil gaḍa reakʼ dakʼ iń ańjetʼ ocoya ar bạṛicʼ hoṛko ṭhen disạmiń ạkhrińa; bidisiạkoakʼ tite disạm ar ona tala reakʼ sanamakʼ iń dhaṅ dhaser ocoya. Iń Probhu Isorge noa katha doń meneda.

¹³ “ ‘Iń do Memphisren boṅga muṭhạnkoń marao utạrkoa, ar uniren murhutʼkoń cabakoa. Misorre do cele disạm cakʼlaokoge bako tahena ar disạm reakʼ sanam ṭhạ̃irege iń do botoriń paṛao ocoya.

¹⁴ Ar Pathros do ujạṛakʼ iń hoeocoya, ar Soanre do seṅgeliń salgaoa ar Thebes nagraha doń sạjạiyea.

¹⁵ Misor reakʼ kajak gaṛ Pelusium nagraha cetanre ińakʼ edreń dultińạ ar Thebes nagraharen sanamkoń makʼ gocʼ cabakoa.

¹⁶ Misorre do seṅgeliń lagaoakʼa; ar Pelusium nagraha do hasote eṛseń toṛseńokʼa. Thebes nagraha cetanre ackage muhin hijukʼa; ar ona do banbạsite unumokʼa.

¹⁷ Ona ar Pibesethren juạn hoṛ do lạṛhạireko gujukʼa ar eṭakʼ hoṛko do bondikateko idiocokʼa.

¹⁸ Iń do tinre Misor reakʼ arãṛiń rạputʼ giḍikakʼa unre Tahpanhesre siń do ńutokʼa; onḍe uniyakʼ daṛe reakʼ bạḍạitetʼ hõ cabakʼtaea. Uni do rimilteye danaṅ esedokʼa ar uniyakʼ atoren hoṛko do bondikateko idi ocokʼa.

¹⁹ Nonkate iń do Misoriń sạjạiyea, ar unre onko doko baḍae daṛeakʼa, ińkangeạń Probhu Isor do.’ ”

²⁰ Aleakʼ bondi dosa reakʼ gelmitʼakʼ bochor reakʼ pạhil cando reakʼ eaeyakʼ dinre Probhu Isorakʼ noa katha do iń ṭhen sodorena,

²¹ “E manwa hopon, iń do Misorren raj Pharaoakʼ tiyiń rạputʼ akatʼtaea. Ar bogekʼ lạgitʼ ona ti do kicricʼte baṅ bedhao akana jemon ghuriạte ona do tarwaṛe bae sapʼ daṛeakʼ.

²² Iń Probhu Isorgeń menetʼkana, Misorren raj Pharao upạrten kạnạń. Iń do uniyakʼ keṭecʼakʼ ar rạputʼatʼ banar tigeń rạpudtaea ar uniyakʼ ti khon tarwaṛeń ńur ocoytaea.

²³ Ar jạt jạtrenko ar disạmko talare Misorrenkoń chirchạturkoa.

²⁴ Iń do Babel rajakʼ tire daṛeń ema ar ińakʼ tarwaṛe do uniń calaea, menkhan Pharaoakʼ ti doń rạpudtaea. Onate Pharao do Babel raj samaṅre ghạl akan hoṛ lekae geraṅa.

²⁵ Iń do Babel rajakʼ tire daṛeń emaea menkhan Pharaoakʼ sopo do ńurokʼtaea. Ar ińakʼ tarwaṛe tinre Babel rajiń calaea ar uni do Misor upạrte onae calaoa unre sanamgeko baḍae daṛeakʼa, ińkangeạń Probhu Isor do.

²⁶ Ar Misorrenko do tinre eṭakʼ eṭakʼ jạtrenko ar disạmko talareń chir chạturkoa unreko baḍae daṛeakʼa, ińkangeạń Probhu Isor do.”