Jeheskel 3 - সান্তালী বাইবেল

¹ Uni do ińe metadińạ, “E manwa hopon, am samaṅre oka menakʼ ona jomme; noa guṛhạ puthi do jomme, ar ona tayom do Israelko ṭhen senkate galmarao akome.”

² Unre mocań cahapʼketʼtińạ, ar uni do ona puthiye jom ocokedińa.

³ Ar ona tayom uni doe metadińạ, “E manwa hopon, iń emakʼ noa puthi jomkate amakʼ lacʼ bi ocoytam.” Onate iń do onań jomkeda, ar ińakʼ mocare do dumur rasa leka heṛemiń ạikạukeda.

⁴ Ona tayom uni doe metadińạ, “E manwa hopon, am do ńitokʼ Israelko ṭhen senkate ińakʼ kathako galmarao akome.

⁵ Am do nonkan hoṛko ṭhen do bam kol ocokʼkana one onkoakʼ pạrsi do ạnạṛige ar muskilge, menkhan am do Israelko ṭhengem kol ocokʼkana.

⁶ Okoekoakʼ katha bam bujhạu onkan ạnạṛi ar kuṭhin pạrsi roroṛ ḍher jạtrenko ṭhen do bam kol ocokʼkana. Onko ṭheniń kollem khan khạṭige onko do amakʼ kathako ańjomkea.

⁷ Menkhan Israelko do amakʼ katha bako ańjomtama, ente onko do ińakʼ katha ańjom lạgitʼ bako rebena; noa reakʼ karon do hoyokʼ kana, goṭa Israel jạtren hoṛ do kạṭhuạ ar keṭecʼ monan kanako.

⁸ Menkhan am do onko leka kạṭhuạ ar keṭecʼ monan hoṛiń hoyocomea.

⁹ Amakʼ moloṅ do hirạ mạnik leka keṭecʼ, ar cokmuki dhiri khon hõń keṭecʼ ocoakatʼtama. Onko doko huhulkan jạtren kanrehõ alogem botorakoa ar onko ńelte alom botorokʼa.”

¹⁰ Uni do arhõe metadińạ, “E manwa hopon, iń okako kathań lạiyam kan ona do mon lagaokate ańjomtińme ar monre rebetʼ dohokakʼme.

¹¹ Am do ńitokʼ bondi dosare menakʼko amakʼ disạmren hoṛko ṭhen senkate galmarao akome. Onkoko ańjomtam ar bako ańjomtam, am do Probhu Isorakʼ katha onko galmarao akome.”

¹² Ona tayom Isorren Jiu do ińe kuṭuṅ rakapʼkedińa, ar iń tayom secʼre ãṭ aṛaṅte roṛoṛkan noa kathań ańjomkeda, “Coṭ utạrre Probhu Isorakʼ ṭhonok reakʼ sarhao hoyokʼtaema.”

¹³ Iń do onko jiwetʼ jiwiyankoakʼ phạ̃kṛạ̃kʼ reakʼ saḍeń ańjomkeda ar onko pantere tahẽkan pạihạ̃ reakʼ saḍe hõ kajakteń ańjomkeda.

¹⁴ Isorren Jiu do ińe kuṭuṅ rakapʼ idiyiń jokhecʼ iń do ińakʼ mon reakʼ duktegeń calaoena, ar Probhu Isorakʼ keṭecʼ ti do ińre tahẽkana.

¹⁵ Bondi akan okoeko hoṛ do Kebar gaḍa ṭhenakʼ Tel-Abibreko tahẽkan onko ṭhen iń doń calaoena. Ar okareko tahẽkan onḍe onko talare iń do eae din hape akaniń tahẽyena.

Israelakʼ sontor

¹⁶ Eae din paromen khan Probhu Isorakʼ noa katha do iń ṭhen hecʼena,

¹⁷ “E manwa hopon, Israelko lạgitʼ pahradar iń benaoakatʼmea; onate iń okań metam ona ańjomme ar iń huyạte onkom sontorkoa.

¹⁸ Iń do tinre mitʼṭecʼ dusṭạmi hoṛiń metaea, ‘khạṭige am dom gujukʼa,’ unre am do uni bam sontore, se uniyakʼ jiwi bańcaotae lạgitʼ bạṛicʼ hor khon ruạṛ hijukʼ lạgitʼ jãhãnakʼ bam metae, enḍekhan uniyakʼ gujukʼ lạgitʼ do amgeń dạyimea.

¹⁹ Menkhan dusṭạmi hoṛem sontore tayom hõ uni do acʼakʼ dusṭạmi khon se acʼakʼ bạṛicʼ hor khon bae ruạṛ hijukʼ enḍekhan uniyakʼ kại iạte uni doe gujukʼa; menkhan am dom rukhiyạkʼa.

²⁰ “Arhõ, jãhãe dhorom hoṛ jodi acʼakʼ hor khon ruạṛkate bạṛicʼakʼe kạmi ar uni samaṅre mitʼṭecʼ muhin iń dohoy, enḍekhan uni doe gujukʼa. Ar uni bam sontorlede iạte uni do acʼakʼ kại iạteye gujukʼa. Ar okako dhorom reakʼ uniye kạmi akatʼ ona do ar baṅ disạkʼtaea; ar uniyakʼ gujukʼ lạgitʼ am do bạń dạyimea.

²¹ Menkhan alo kại lạgitʼ jodi uni dhorom hoṛem sontore ar uni bae kại enḍekhan sontorokʼ reakʼ katha ańjom khạtirte uni do khạṭigeye bańcaokʼa ar am hõ apnarte rukhiyạm ńama.”

²² Onḍe Probhu Isorakʼ daṛeanakʼ ti do iń cetanre tahẽkana ar uni do iń metadińạ, “Ma beretʼme ar bilạn ṭạnḍite oḍok calakʼme, onḍe iń do am tulucʼ kathań roṛa.”

²³ Onatege iń do beretʼkate bilạn ṭạnḍiteń oḍok calaoena. Ar Kebar gaḍa aṛere Probhu Isorakʼ oka ṭhonok iń ńelletʼ onkan ṭhonokge onḍe hõń ńelkeda; ar iń doń ombakʼena.

²⁴ Unre Isorren Jiu do ińreye boloyena ar ińakʼ jaṅgateye teṅgokedińa. Uni doe metadińạ, “Am do amakʼ oṛakʼte bolokʼme ar duạr sińkate bhitrire tahenme.

²⁵ E manwa hopon, am do babertem tol ocokʼa; onate bahreren hoṛko talare bam oḍok sen daṛeakʼa.

²⁶ Am do jemon hape akanem tahen ar onko bam ruhetʼ daṛeako ona iạte amakʼ alaṅ do tạrureń jalatʼ ocoytama. Ente Israelko do mitʼṭen huhulkan jạtren kanako.

²⁷ Menkhan am tulucʼ iń galmarao jokhecʼ iń do amakʼ mocań jhijtama ar am do onko ṭhen Probhu Isorakʼ katham lạiya. Onko modre okoe amakʼ ańjom reakʼe khoj uni doe ańjomma ar okoe ańjom bae khoj uni do aloe ańjomma; ente onko do huhulkan jạtren kanako.”