Jeheskel 29 - সান্তালী বাইবেল

Misor upạrte nạbi katha

¹ Aboakʼ bondi dosa reakʼ gelakʼ bochor reakʼ gelakʼ cando reakʼ gelbarakʼ dinre Probhu Isorakʼ noa katha do iń ṭhen sodorena,

² “E manwa hopon, amakʼ mẽtʼãhã do Misorren raj Pharao secʼ samaṅkate uni ar goṭa Misor disạm upạrte nạbi katha roṛme,

³ Probhu Isor doe menetʼkana, ‘E Misorren Pharao raj, iń do am secʼren doń baṅkana. Am do apnarakʼ gaḍareye giticʼkan uni maraṅ utạricʼ tayan kanam. Am dom menetʼ kana, nil gaḍa do amakʼ kangea ar apnar lạgitʼge ona dom benao akawana.

⁴ Menkhan iń do amakʼ jambere ạṅkusiń lagaoa ar amakʼ gaḍaren hakoko do amakʼ cuạ̃kʼreń laṭkao ocokoa. Ar amakʼ cuạ̃kʼre laṭkao akan sanam hakoko sudhạ am do gaḍa khoniń or rakapʼ ạgumea.

⁵ Iń do am ar amakʼ gaḍaren sanam hakoko hahaṅkarreń giḍikapea. Am do ṭạnḍire giḍi akanem tahena ar bam topa ocokʼa. Iń do jomakʼ lekate bir janwarko ar coṭren cẽṛẽko ṭheniń jimạ akatʼmea.

⁶ Onate okoe Misorreko girobasokʼ kan onko sanamgeko baḍae daṛeakʼa ińkangeạń Probhu Isor do. “Am do Israelko lạgitʼ chuci ṭheṅgagem tahẽkana.

⁷ Ar onko do tinre titeko sapletʼmea unre am dom paṛakʼena ar onkoakʼ tarenrem cirạketʼtakoa. Ar tinre am ṭhenko ṭenḍarena unre am dom rạputʼena ar onate onkoakʼ ḍanḍa dom ḍikạ ḍakeketʼtakoa.

⁸ “Ona iạte iń Probhu Isorgeń menetʼkana, iń do am upạrte tarwaṛeń ạguiya ar amren hoṛko ar janwarkoń gocʼ cabakoa.

⁹ Misor do mitʼṭecʼ ujạṛakʼ ṭhạ̃ige hoyokʼa. Unre hoṛko baḍae daṛeakʼa, ińkangeạń Probhu Isor do. “Am dom menetʼkana, nil gaḍa do amakʼ kana ar amge ona dom benao akada.

¹⁰ Ona iạte am ar amakʼ gaḍa reakʼ sanam dakʼko upạrte minạńạ. Iń do Migdol khon Seyene, metakʼme Kus reakʼ Simạna hạbicʼ Misor disạm do ujạṛakʼ ṭhạ̃igeń hoeocoya.

¹¹ Ar ona talate do cele manwa se janwar hõ bako sen paromokʼa; ar pongel bochor hạbicʼ onḍe do celege bako girobasokʼa.

¹² Jarkhar akan disạmko modre Misor disạm reakʼ dosa do artetʼ kharapiń hoeocoya; ar dhaṅdhaser akan nagrahako modre uniyakʼ nagrahako do pongel bochor hạbicʼ artetʼge bạṛicʼ hoyokʼa. Ar Misorrenko do jạt jạtrenko ar disạmko talareń chirchạturkoa.

¹³ “ ‘Ar pongel bochor tayom do jạt jạtrenko tala khon Misorren hoṛkoń jarwakoa.

¹⁴ Iń do lahate leka onkoakʼ dosań ruạṛkatakoa ar onkoren hapṛamkoakʼ disạm Pathrosteń ạgu ruạṛkoa. Onḍe onkoakʼ rajosṭi do nijorakʼ hoyokʼtakoa.

¹⁵ Pathros do joto khon nijor utạrakʼ rajosṭige hoyokʼa; eṭakʼ jạtrenko cetanre uni do apnarte ar tishõ bae usulokʼa. Uni do nunạkʼ iń nijor ocoyea, ar tishõ eṭakʼ jạtrenko cetanre rajosṭi bae calao daṛeakʼa.

¹⁶ Israelko do tishõ Misor cetanre ar bako ṭehãḍokʼa. Onko do Misor reakʼ dosa ńelteko bujhạu daṛeakʼa je, goṛo ńam lạgitʼ Misor secʼko ruạṛlenteko kạileda. Ar onateko baḍae daṛeakʼa, Probhu Isor doń ińkangea.’ ”

¹⁷ Bondi dosa reakʼ bargel eae bochor reakʼ pạhil cando reakʼ pạhil hilokʼ Probhu Isorakʼ noa katha do iń ṭhen sodorena,

¹⁸ “E manwa hopon, Babelren raj Nebukadnesar do Tur upạrte lạṛhại jokhecʼ acʼren lạṛhại phạdko nunạkʼe khaṭaoletʼkoa je, onko sanamkoakʼ bohokʼ do ceḍelentakoa ar taren reakʼ harta hõ poṭakʼ cabalentakoa. Enhõ Tur upạrte okaṭakʼe lạṛhạilen onate uni ar acʼren lạṛhại phạdkoakʼ do cetʼ labge baṅ hoylentakoa.

¹⁹ Ona iạte Babelren raj Nebukadnesar do Misor disạmiń emaea ar uni do uniyakʼ dhonkoe idiytaea. Ar acʼren lạṛhại phạdkoakʼ kuṛại lạgitʼ uni do ona disạme luṭ joṅa.

²⁰ Acʼakʼ kạmi reakʼ kuṛại lekate uni do Misor disạmiń em akawadea, ente uni do iń lạgitʼe kạmi akada. Ar iń Probhu Isorge noa katha doń meneda.

²¹ “Enhilokʼ Israel do daṛean jạtkoń hoyocokoa ar onko talare katha roṛ lạgitʼ amakʼ mocań jhijtama. Unre onkoko baḍae daṛeakʼa, ińkangeạń Probhu Isor do.”