Jeheskel 28 - সান্তালী বাইবেল

Turren raj upạrte nạbi katha

¹ Probhu Isor do ińe metadińạ,

² “E manwa hopon, am do Turren cakʼlaoyicʼ metaeme, Probhu Isor do noa kathae meneda, amakʼ ontor do gorbote perecʼ akana, ar am dom menakada, iń doń deb kana, iń do jalapuri talare Isorakʼ duṛupʼakʼreń duṛupʼ akana; menkhan am do ekenem manwa kana, deb dom baṅkana, enhõ am do debota tulnim hudisokʼ kana.

³ Ńelme, Daniel khon hõm ạkilangea, jãhãn khạndri katha hõ am ṭhen do baṅ danaṅa;

⁴ amakʼ ạkil ar amakʼ budte am lạgitʼ dhonem hạr akawana, am lạgitʼ sona ar rupạgem sõc akawana;

⁵ amakʼ maraṅ ạkil reakʼ bạnij hotete amakʼ dhonem baḍhao ocoakada, ar ona dhonkote amakʼ mon do bạḍạite perecʼ akantama;

⁶ ona iạte Probhu Isor do noa kathae meneda, amakʼ mon do Isorakʼ mon lekam hudisetʼtama;

⁷ Ona iạte ńelme, iń do am upạrte bidisiạkoń ạgukoa, jạt jạtrenko talare onko do kurmutạhakoge, onko do amakʼ ạkil reakʼ mońjakʼ upạrte apan ạpin tarwaṛeko bojtakoa, ar amakʼ ṭhonokko maraotama.

⁸ Onko do khandṛaṅreko ńurhạmea; ar am do gocʼ ocokʼko reakʼ gujukʼtem gujukʼa tala jalapurirege.

⁹ Amren gogocʼko samaṅre unre cetʼem mena, ‘iń doń isor kana?’ Menkhan okoe ame ghạlme, uniyakʼ tire am dom manwa kana, debota do baṅa.

¹⁰ Am do bidisiạkoakʼ ti hotete bin khatna akan hoṛko lekam gujukʼa, ente iń do noageń menakada, noa do Probhu Isorgeye meneda.

¹¹ Tayomte Probhu Isorakʼ niạ katha do iń ṭhen seṭerena,

¹² “E manwa hopon, am do Turren raj lạgitʼ homor halaṅme, unim metaea, Probhu Isor do noa kathae meneda, ‘am do sạbit utạricʼ mohorte chapakanicʼ, ạkilte perecʼicʼ, ar ńelokʼte mońj utạricʼ kanam.

¹³ Am do Isorakʼ Eden bagwanrem tahẽkana, sanam lekan damanakʼ dhiri, cuni, podmorag, hirạ, gomedok, boidurjo ar surjokanto, nilkanto, pitmani, morokot ar sona do amakʼ abhrange tahẽkana, amakʼ jhan jhanaokʼkan mala ar seke sekekʼ hạ̃sli do sona reakʼge tahẽkana; noako do sirjạu hilokʼrege tearlena.

¹⁴ Am do hohorhoyicʼ Kerub lekatem ojokʼ ocolena; am do Isorakʼ sonot bururem tahẽkana; am do seṅgel reakʼ dhiriko talategem taṛametʼ tahẽkana.

¹⁵ Amakʼ sirjạukʼ hilokʼ khon am do bin dusạngem tahẽkana; ar mucạtʼre amre behokakʼge ńamena.

¹⁶ Amakʼ ạḍi utạr beparikote jor julumtem perecʼena arem kạikeda, onate Isorakʼ buru khoniń lagaketʼmea, ar E horhoyicʼ Kerub, am do seṅgel reakʼ dhiriko tala khoniń laga ńirketʼmea.

¹⁷ Amakʼ mon do amakʼ mońjtetʼ iạte bạḍạiteye perecʼena ar amakʼ ṭhonok iạte amakʼ ạkil dom nosṭo akada. Onate iń do otreń lebda giḍikatʼmea; ar rapajko samaṅreń dohoketʼmea jemon onko do am ńelteko kusikʼ.

¹⁸ Amakʼ aema ghạṭ ar bedhorom pherbepar iạte am do apnarakʼ koejoṅ reakʼ ṭhạ̃ikom besonot akada. Ona iạte amre seṅgeliń jeretʼleda ar ona doe lo roṅgoketʼmea; okoeko ńeńelkan tahẽkan onko sanamkoakʼ mẽtʼ samaṅre am do ot reakʼ torocʼ lekageń hoyocoketʼmea.

¹⁹ Ar okoe jạtrenko bako baḍaeakatʼme tahẽkan onko do am ńelteko tharbasaoena. Am do botorgem caba utạrena; am do ar bam tahena.’ ”

Sidon birudre nạbi katha

²⁰ Probhu Isor do ińe metadińạ,

²¹ “E manwa hopon, am do Sidon secʼ samaṅkate uni upạrte nạbi katha roṛme,

²² Probhu Isore menetʼkana, ‘E Sidon, iń doń am upạrten kana; am upạrte okań cekae onate ińakʼ ṭhonok do sodorokʼa. Iń do tinre amiń sạjạimea ar am talare ińakʼ sonottetʼ iń sodortińạ unre amren hoṛko baḍae daṛeakʼa, ińkangeạń Probhu Isor do.

²³ Am cetanre mahamạriń kola ar amakʼ horkore do mãyãm joro ocokʼa. Beṛhae secʼ khon am dom hạ̃n ocokʼa ar onate hoṛko khũn ocokʼte amre giḍi akanko tahena. Unre amren hoṛko baḍae daṛeakʼa, ińkangeạń Probhu Isor do.’ ”

Israelko lạgitʼ bhor

²⁴ Probhu Isor do arhõe menkeda, “Israel jạtrenko haso ocoko lạgitʼ jãhãn jạnumanakʼ dare se jãhãn hasoanakʼ jạnum do arbaṅ tahena onko beṛhaeten sanamko modre, one onkoko nihạ̃tletʼko tahẽkan. Unre onkoko baḍae daṛeakʼa, ińkangeạń Probhu Isor do.

²⁵ “Eṭakʼ jạtrenko talare chirchạtur akan Israelko tinreń jarwakoa unre jạt jạtrenkoakʼ mẽtʼãhã samaṅre onko talare ińakʼ sonottetʼ iń sodora. Unre onko do akoakʼ ona disạmreko girobasokʼa one okaṭakʼ disạm do ińren guti Jakob iń emade tahẽkan.

²⁶ Onḍe onko do oṛakʼ-duạrko benaojoṅa ar nirạiteko girobasokʼa ar darkha bagwanko benaojoṅa. Ar onkoren landa dhudutʼkan jạtrenko tinreń sạjạikoa unre onko do nirạiteko girobasokʼa. Onate onko doko baḍae daṛeakʼa, ińkangeạń onkoren Probhu Isor do.”