Jeheskel 27 - সান্তালী বাইবেল

Tur lạgitʼ homor halaṅ

¹ Probhu Isor do ińe metadińạ,

² “E Manwa hopon, Tur babotre homor halaṅme.

³ Jalapuri bolokʼ reakʼ horre okoe menae, ar jalapuri ḍhipren okoe doe jạt jạtkoren beparikan uni Tur dom metaea, Probhu Isore menetʼkana, ‘E Tur, am dom meneda cehratem perecʼgea.

⁴ Jalapuri talare amakʼ rajosṭi; mitʼṭecʼ mońj jahaj leka mistriko do amakʼ napaetetʼ purạteko ạguakada.

⁵ Senir ṭoṭha khon onko do saro dare reakʼ toktako benao akada; ar amakʼ badam khunṭi lạgitʼ do Lebanon khon debdạru dareko ạguakada.

⁶ Ar Bason disạm reakʼ Elon darete do amakʼ jahaj reakʼ ḍạḍuko benao akada; ar Kaprus khon Tạsur kaṭ ạgukate onko do amakʼ jahaj reakʼ anaṭetʼ benaokate hạti reakʼ ḍaṭateko sajao akada.

⁷ Misor reakʼ likạn goṛhon mĩhĩ mushnạ kicricʼte amakʼ jahaj reakʼ badam do benaolena ar onatege hoṛko do amko orom daṛeamkan tahẽkana. Elisa khon ạguwakʼ nil ar beguni roṅakʼ kicricʼ do amakʼ dapalakʼ tahẽkana.

⁸ Sidon ar Arwadren hoṛko do amakʼ jahajren ḍạḍu okʼorkoko tahẽkana. E Tur, gạkhuṛ hoṛko do amren jahaj cakʼlaokoko tahẽkana.

⁹ Gebalren murubbiko do gạkhuṛ hoṛko lekate amre oṛecʼ paṛakʼakʼren jut aroe reakʼko kạmikan tahẽkana. Doreão reakʼ sanam jahaj ar onkoren jahaj cakʼlaoko do amakʼ jinisko bạnij bekʼpar lạgitʼ am ṭhenko hijukʼkan tahẽkana.

¹⁰ “ ‘Paras, Lud ar Put disạmren hoṛko hõ amren lạṛhại phạdko sãote tahẽkateko lạṛhạikan tahẽkana. Onko do akoakʼ ḍhal ar bohokʼ rurukhiyạ reakʼ ṭupri amre ṭaṅgaokate amakʼ ṭhonoktetʼko maraṅetʼ tahẽkana.

¹¹ Arwad ar Helekren hoṛko do am beṛhaeteakʼ pạcri bhit cetanreko horhoyetʼ tahẽkana, ar Gamadren hoṛko do amakʼ usul buruńj oṛakʼko horhoyetʼ tahẽkana. Am beṛhaeteakʼ pạcri bhitre onko do ḍhalko aka dohokakʼkan tahẽkana; ar amakʼ sanam mońjtetʼ do onkogeko ạguleda.

¹² “ ‘Amakʼ asambheṛ dhon-durib lạgitʼ Tạrsis do am sãoteye bạnij-beparetʼ tahẽkana; rupạ, mẽṛhẽtʼ, ṭin ar sisạkote amakʼ jiniskoe kirińetʼ tahẽkana.

¹³ Jawan, Tubạl ar Mesek do am sãoteko bạnij-beparetʼ tahẽkana; onko do amakʼ jinisko bodolte guti-kạ̃ṛmĩ ar tambako emokʼkan tahẽkana.

¹⁴ Amakʼ jinisko bodolte Beth-togarmaren hoṛko do sadomko, lạṛhại sadomko ar khoccorko emokʼkan tahẽkana.

¹⁵ Dedanren hoṛko do am sãoteko bạnij-beparetʼkan tahẽkana ar jalapuri aṛeteakʼ ḍher disạmge amakʼ jiniskoko kirińetʼ tahẽkana; onko do hạti ḍaṭa ar terel mańjko emamkan tahẽkana.

¹⁶ Amakʼ benaoakʼ ḍher jinisko lạgitʼ Siriya do am tulucʼe bạnij-beparetʼ tahẽkana; amakʼ jinisko bodolte onko do akoakʼ podmorag mạnik, beguni roṅakʼ kicricʼ, likạn goṛhon kicricʼ, mĩhĩ musnạ kicricʼ ar rokto mạnikkote amakʼ jinisko hataoetʼ tahẽkana.

¹⁷ Jihudạ ar Israel do am sãotekin bạnij beparetʼ tahẽkana; unkin do amakʼ jinis bodolte guhum, jomakʼ jinis, toa, sunum, ar jut so mosola kin emam kan tahẽkana.

¹⁸ Am benaoakʼ ḍher jinisko ar asambheṛ dhon-durib lạgitʼ Damesek do Helbon reakʼ darkha rasa ar ponḍ bhiḍi upʼte am sãoteye bạnij beparetʼkan tahẽkana.

¹⁹ Bodan ar Jawanren hoṛko do amakʼ jinisko bodolte Usal khon ạguwakʼ koṭecʼ jhalkaoakʼ mẽṛhẽtʼ, darcini, tejpat ar bocko emokʼkan tahẽkana.

²⁰ Dedan do am sãote aswarikowakʼ palan kicricʼkoe bạnij-beparetʼ tahẽkana.

²¹ Arob ar Kedarren sanam sordarko do amren asol bạnij-bekʼpariko tahẽkana.

²² Seba ar Ramaren bạnij-bepariko hõ am sãoteko bạnijetʼ tahẽkana; amakʼ jinisko bodolte onko do sanam lekan bhage bhage mosola, damanakʼ dhiri ar sonako emam kan tahẽkana.

²³ Haran, Kanne, Edon ar Sebaren bepariko ar Ạsur ar Kilmad hõ am sãoteko bạnijetʼ tahẽkana.

²⁴ Onko do amakʼ bajarre mońj mońj kicricʼko, nil kicricʼko, likạn goṛhon kicricʼko ar roṅ beroṅ kicricʼko baberte kajakte tolkateko ạguiyetʼ tahẽkana.

²⁵ “ ‘Tạrsis reakʼ jahajko do amakʼ jiniskoko ạguiyetʼ tahẽkana. Doreão talare ḍher jiniskote am do perecʼem tahẽkana.

²⁶ Okoe do jahaj reakʼ ḍạḍu ghanṭakoko tahẽkan onko do jalapuri talateko idiyetʼme tahẽkana; menkhan jalapuri talare purub reakʼ hoete am dom rạputʼ gejerena.

²⁷ Amakʼ maraokʼ reakʼ dinre amakʼ dhon-durib, amakʼ bạnij reakʼ jinisko, eṭakʼ eṭakʼ jinisko, amren jahaj cakʼlaoko, jujut akʼroko, amren bạnij-bekʼpariko ar amren sanam lạṛhại phạdko ar amreko tahenkan eṭakʼ sanamko hõ jalapuri talareko unum gujukʼa.

²⁸ Amren jahaj cakʼlaokoakʼ kạumạute jalapuri aṛe reakʼ ṭhạ̃iko do daldalaokʼa.

²⁹ Okoe ḍạḍuko ghanṭae onko sanamkoge akoakʼ jahaj bạgikateko calakʼa; ar jahaj cakʼlaoko do jotoge jalapuri aṛere teṅgo akanko tahena.

³⁰ Onko do am ńutumteko kạuạ rạuạkʼa ar apnarakʼ bohokʼre dhuṛiko ojokʼ joṅa ar torocʼreko guṛdạukʼa.

³¹ Onko do am iạte bohokʼko hoyo munḍrạkʼa ar gõṛẽ kicricʼko horoga. Onko do mon reakʼ dukte am ńutumteko homor halaṅa ar ạḍi ãṭko raga.

³² Onko do am lạgitʼ ãṭ aṛaṅteko raga; ar am iạte homor halaṅateko mena; “ ‘Jalapuri talare Tur leka do ar okoeye nosṭoakana?

³³ Amakʼ bạnij reakʼ jinisko do tinre jalapurire oḍokokʼkan tahẽkana unre am do jạt jạtrenkom tirpitetʼko tahẽkana; amakʼ asambheṛ dhon-durib ar jiniskote dhạrtiren rapajkom kisạ̃ṛetʼko tahẽkana.

³⁴ Am do ńitokʼ jalapuri reakʼ khạndri dakʼrem rạputʼ gejer akana; amakʼ jinisko ar amren sanam hoṛko do am sãoteko unum akana.

³⁵ Doreão aṛere girobasokʼ kan hoṛko do jotoge amakʼ dosa ńelteko tharbasao akana; onko do raj botorteko thar tharaokʼkan tahẽkana arko keklesedokʼkan tahẽkana.

³⁶ Jạt jạtrenko talaren bepariko do am ńelteko sisetʼkan tahẽkana. Ar am do mitʼṭecʼ torasgem hoyakana; ar bam tahena.’ ”