Jeheskel 26 - সান্তালী বাইবেল

Tur upạrte nạbi katha

¹ Aboakʼ bondi dosa reakʼ gelmitʼ bochorre cando reakʼ pạhil dinre Probhu Isorakʼ niạ katha do iń ṭhen sodorena,

² “E manwa hopon, Jerusalem babotre Tur do kusikateye menakada, ‘bhagege hoyakana, jạt jạtrenkoakʼ phaṭok duạr do rạputʼ akana ar ona reakʼ silpińko do jhicʼakana; iń doń purunokʼa, ente nagraha do jarkharena.’

³ Ona iạte iń Probhu Isorgeń menetʼkana, ‘E Tur, am secʼ do bạnuńa. Jalapuri cetʼ leka ḍheokoe rakapʼ ocoy onkage iń hõ am upạrte ḍher jạtrenkoń ạgukoa.’

⁴ Onko do Tur reakʼ pạcri bhitko rạpuda ar usul pahra oṛakʼko dhasao giḍikakʼa. Ar iń do ona reakʼ dhuṛi hasakoń lakʼ giḍiya ar ona do cạṭạni lekań hoeocoya.

⁵ Uni do jalapuri talare jhạliko tase reakʼ ṭhạ̃igeye hoyokʼa, ente iń Probhu Isorge noa katha doń menetʼkana. Uni do boṅgan hoṛ jạtkoren luṭteakʼ jinise hoyokʼa.

⁶ Uni tabere menakʼ ghuṭu atoko do lạṛhại iạte marao utạrokʼa. Unre onḍenko hoṛko baḍae daṛeakʼa, iń kangeạń Probhu Isor do.

⁷ “E Tur, iń do am upạrte utạr secʼ khon sadomko, rãt gạḍiko, aswariko ar maraṅ okocʼ mitʼṭecʼ lạṛhại phạdko sãote rapajkoren raj, metakʼme Babelren raj Nebukadnesar iń ạguiyea.

⁸ Uni do lạṛhạikate amakʼ atokoe marao giḍikakʼa. Uni do am upạrte mitʼṭecʼ usul pinḍhại upʼ rakaba ar amakʼ pạcri bhit sãote bhiṛạu akatʼ mitʼṭecʼ daṛaṅ pinḍhại benaoa; ar apnar rukhiyạkʼ lạgitʼ ḍhalko reakʼ chate teṅgoea.

⁹ Uni do pạcri bhit bhugạg reakʼ jontrote amakʼ bhite sobokʼ bhugạgtama ar acʼakʼ jontrote amakʼ usul pahra oṛakʼkoe lạnduṛ giḍikakʼa.

¹⁰ Uniren sadomko do nunạkʼko saṅgeya je, onkoakʼ uḍiạu dhuṛite am dom topa utạrokʼa. Ar rạputʼ bhit talate hoṛko cetʼleka nagrahateko bolokʼ onkage uni do tinre lạṛhại sadomko, sagaṛ gạḍiko ar rãt gạḍikoante amakʼ phaṭok duạrteye bolokʼa unre onako reakʼ sabadte amakʼ pạcri bhit do daldalaokʼa.

¹¹ Uniren sadomkoakʼ khurạ do amakʼ sanam horko lebetʼ gasmanḍaoa; uni do amren hoṛkoe gocʼkoa ar amakʼ keṭecʼ keṭecʼ khunṭiko do otre bhindạṛokʼa.

¹² Onko do amakʼ dhon-durib ar amakʼ bạnij bepar reakʼ jinisko luṭ idiytama; ar amakʼ pạcri bhitko rạputʼ giḍikakʼa, mońj mońj oṛakʼ-duạrko marao giḍikakʼa ar amakʼ dhiri, kaṭ ar dhuṛi do jalapurireko giḍikakʼa.

¹³ Iń do amakʼ sereń reakʼ arãṛiń thir ocoytama; binạ banam reakʼ saḍe hõ ar do baṅ ańjomokʼa.

¹⁴ Am do cạṭạni lekań hoyocomea ar am do jhạliko tase reakʼ rohoṛ ṭhạ̃igem hoyokʼa. Ar am do bam benao aro ocokʼa, ente iń Probhu Isorge noa katha doń meneda.

¹⁵ Probhu Isor do noa kathae meneda, “ E Tur, jalapuri ḍhiprenko do amakʼ gurokʼ reakʼ saḍe ańjomte, ona gurokʼ reakʼ one onare ghạl akankoko geraṅetʼ, ar am talare khũn hoyokʼkan, onate cetʼ bako thartharaokʼa?

¹⁶ Unre jalapuri aṛe reakʼ disạmkoren rapajko do akoakʼ siṅghạson khon pheḍkate akoakʼ raj kicricʼ ar noksa akatʼ kicricʼko totʼ giḍikakʼa. Ar botorte otreko duṛupʼa, ar jao okteko thar tharaokʼa ar am ńelteko torasokʼa.

¹⁷ Unre onko do am reaṅ homor halaṅkateko mena, ‘E namḍak nagraha, am do cetʼ lekam marao utạrena! Amren hoṛko do doreão cetanteko dãṛãn kan tahẽkan. Jalapurire am ar amren hoṛko do daṛeanko tahẽkana; Jalapuri aṛekore okoeko girobasokʼ kan tahẽkan onko do amko botoram kan tahẽkana.

¹⁸ Ńitokʼ do amakʼ ńurokʼ reakʼ dinre jalapuri aṛe reakʼ disạmko do daldalaokʼ kana; amakʼ maraokʼ ńelte jalapuri tala reakʼ ḍhipko hõe botorokʼ kana.’

¹⁹ “E Tur, iń Probhu Isorge tinre ujạṛakʼ nagraha lekań hoyocomea one okare celege bako girobasokʼ kan, ar doreão reakʼ dakʼ tinre am cetanreń ạguiya ar ona do ame dapal esetʼmea,

²⁰ unre patal purite calakʼkan hoṛko sãote onko sedaeren hoṛko ṭheniń pheḍ idimea. Ar dhạrti khạndṛuṅ reakʼ jarkharakʼ talare patal purite calakʼkan hoṛko sãoteń girobas ocomea. Amre do ar celege bako girobasokʼa ar jiwetʼkoakʼ disạmre amakʼ ṭhạ̃i do ar baṅ hoyokʼtama.

²¹ Am do mitʼṭecʼ torasgeń hoyocomea; am do ar bam tahena. Ar hoṛ do amko sendra baṛamea menkhan tishõ ar bam ńamokʼa. Iń Probhu Isorge noa katha doń menetʼkana.”