Jeheskel 25 - সান্তালী বাইবেল

Amonrenko upạrte nạbi katha

¹ Probhu Isor do ińe metadińạ,

² “E manwa hopon, Amonrenko secʼ amakʼ mẽtʼãhã samaṅme ar onko upạrte nạbikatha roṛme.

³ Probhu Isorakʼ noa katha onko ańjom lạgitʼ metakom, ‘Ińakʼ oṛakʼ besonotokʼkan ar Israel disom ujạṛokʼkan ńelte ar Jihudạren hoṛko bondi ocokʼkan ńelte ape do ạḍipe kusilena.

⁴ Onate iń do purub disạmren hoṛkoakʼ tireń soprotpea. Onko do apeakʼ disạmre tạmbuko ṭaṅgao ar ape talareko girobasokʼa; onko do apeakʼ jo ar toako joma.

⁵ Rabba nagraha do ũṭkoakʼ ạtiń ṭạnḍiń hoeocoya ar Amon disạm do bhiḍikoakʼ jirạukʼ reakʼ ṭhạ̃ige. Unre ape dope baḍae daṛeakʼa, iń kangeạń Probhu Isor do.

⁶ Ape do Israel disạm reakʼ dosa ńeltepe thayoleda, arpe enecʼlena ar monre hiskạ iạtepe rạskạlena.

⁷ Ona iạte ape upạrte iń do ińakʼ tiyiń tiyạrtińạ ar luṭakʼ mal lekate eṭakʼ jạtrenkoakʼ tireń soprotpea. Eṭakʼ jạtrenko ar disạm tala khoniń hese giḍikapea ariń marao utạrpea. Ar onatepe baḍae daṛeakʼa, iń kangeạń Probhu Isor do.’ ”

Moab upạrte nạbi katha

⁸ Probhu Isore menkeda, “Moab ar Seyir dokin meneda, ‘ńelpe, Jihudạren hoṛko do eṭakʼ jạtrenko lekageko hoyakana.’

⁹ Ona iạte iń do Moab reakʼ mitʼ secʼakʼ simạnań jhicʼ ocoya. Ar onate Moab reakʼ ṭhonok nagraha Beth-Jesimoth, Bakʼal-Meyon ar Kiriathayim cetanre jhãp ema.

^10-11 Iń do Amonrenko sãote Moab hõ purub disạmren hoṛkoakʼ tireń soprotkoa jemon jạt jạtrenko talare Amonrenkoakʼ katha do hiṛińokʼ ar Moab hõ sạjạiye ńam. Unre onkoko baḍae daṛeakʼa, ińkangeạń Probhu Isor do.”

Edom upạrte nạbi katha

¹² Probhu Isore menkeda, “Edom do Jihudạren hoṛko cetanreko hala hạli akatʼte ạḍiko behok akada.

¹³ Ona iạte iń Probhu Isorgeń menetʼkana, Edom upạrte iń do tiyiń tiyạrtińạ ar onḍenko sanam hoṛ ar janwarkoń gocʼ cabakoa. Ona do dhaṅ dhaserakʼgeń hoeocoya ar Teman khon Dedan hạbicʼ hoṛko do tarwaṛeteko gujukʼa.

¹⁴ Iń do ińren hoṛ Israelkoakʼ tite Edom cetanreń hala hạliya ar onko do ińakʼ edre ar khĩs lekate Edom birudteko kạmiya. Unre onko doko baḍae daṛeakʼa, ińgeń hala hạli akada mente.”

Philisṭiko upạrte nạbi katha

¹⁵ Probhu Isor do nonkae menkeda, “Philisṭiko do Jihudạ cetanre hala hạkʼliko calao akada; onko do jug reakʼ bene bạiri meṭao lạgitʼ Jihudạ marao utạreko khojkana.

¹⁶ Ona iạte iń Probhu Isorgeń menetʼkana, ‘Philisṭiko upạrte ińakʼ tiyiń tiyạrtińạ; ar Kerethikoń marao cabakoa ar jalapuri aṛeren sarecʼ hoṛko hõń maraokoa.

¹⁷ Iń do raṅgao reakʼ ḍanṭaore maraṅ hala hạli onko upạrteń purạua. Ar tinre onko cetanreń hala hạliya unreko baḍae daṛeakʼa, iń kangeạń Probhu Isor do.’ ”