Jeheskel 24 - সান্তালী বাইবেল

Ututeakʼ celaṅ

¹ Bondi dosa reakʼ areakʼ bochor reakʼ gelakʼ cando reakʼ gelakʼ dinre Probhu Isorakʼ niạ katha do iń ṭhen sodorena,

² “E manwa hopon, am do teheń, teheńakʼ tạrik reakʼ kathage ol dohokakʼme, ente teheń Babelren raj do Jerusaleme gherao esetʼeda.

³ Noko huhulkan jạtrenko ṭhen niạ phen reakʼ katha lạime. Onkom metakoa, Probhu Isore meneda, ‘Celaṅ condaeme, celaṅ condaeme ar onare dakʼ dulakʼme.

⁴ Ona talare jel kuṭi emakʼme, bulu ar taren reakʼ bhage bhage jel kuṭige emakʼme. Ar bhage bhage jaṅkoante ona do perej me.

⁵ Ar palren bhiḍiko khon soros utạricʼ bheḍa hataoem; ar celaṅ latarre sahan sajaome; ar mońjte jaṅko teke isinme.’

⁶ “Probhu Isor do arhõe menetʼkana, ‘Hae, uni mãyãm joro ocoyicʼ nagraha do! Uni do mitʼṭecʼ celaṅ kanae one onare mạilạ tạpukʼ akan, one oka do baṅ saphakʼ. Jelko bachao hatao baṅkate kuṭi kuṭige lo oḍokme. Gulibãṭ do okaṭakʼre hõ baṅ paṛao akana.

⁷ Ente uniye joro ocoakatʼ mãyãm do ńithõ acʼ talarege menakʼa; uni do ona cenḍeń cạṭạnireye jorokeda, otre do bae joroleda dhuṛire ona dapalkakʼ lạgitʼ do.

⁸ Ińakʼ edre caṛhao ocoy lạgitʼ ar hala hạli lạgitʼge ona mãyãm do cạṭạni cetanreń doho akada jemon alo danaṅ esedokʼ.’

⁹ “Probhu Isor do arhõe meneda, ‘Hae, ona mãyãm joro ocoyetʼkan nagraha do! Iń hõ sahaniń ṭhiki jarwaea.

¹⁰ Onate aema sahan ṭhekaokate, seṅgel jolme, mosola makhaokate mońjte jel teke isinme, ar jaṅko do roṅgo ocoyme.

¹¹ Ona tayom aṅgra cetanre ạjạuṛi celaṅ condaeme; jemon ona dhipạukʼ, ar ona reakʼ pitạl do jeredokʼ, jemon ona reakʼ mạilạko onarege lekʼte ona reakʼ icʼtetʼ jeretʼ cabakʼ.

¹² Menkhan sanamakʼ kurumuṭuge eṛeteakʼ hoyakana; ona reakʼ dạriạ icʼ do baṅ cabakʼkana ar icʼtetʼ hõ seṅgelte baṅ caba akana.

¹³ “ ‘E Jerusalem, amakʼ bạṛicʼakʼ kạmige hoyokʼ kana ona bhonḍtetʼ do. Iń do saphaeme reakʼ iń kurumuṭukeda menkhan amakʼ bhõnḍtetʼ khon bam saphalena. Am upạrte ińakʼ edre purạte ạuriń dultiń hạbicʼ am do bam saphakʼa.

¹⁴ Ińakʼ kạmi reakʼ okte do seṭerakana. Iń do onań onkaegea, bạń mãyãkʼa se bạń dayakʼa. Amakʼ colon ar amakʼ kạmi lekagem bicạr ocokʼa. Iń Probhu Isorge noa katha doń meneda.’ ”

Jeheslkelren bạhutetʼakʼ gujukʼ

¹⁵ Probhu Isor do arhõe metadińạ,

¹⁶ “E manwa hopon, noa uyukʼrege am ṭhen khon amakʼ mẽtʼ reakʼ hạ̃siń idi lạgidokʼ kana. Enhõ am do alom rakʼ homora, alom raga se mẽtʼ dakʼ alom joroytama.

¹⁷ Am do kuhrạukʼme. Ar gocʼ icʼ lạgitʼ do alom homor halaṅa. Dạhṛikʼme jaṅgare cạṭki horogme; amakʼ moca alom bedtama ar hokʼmorkoakʼ jomakʼ hõ alom joma.”

¹⁸ Iń do setakʼ jokhecʼ hoṛko sãote kathań roṛkeda ar ạyupʼ jokhecʼ ińren bạhu doe gocʼena. Ar dosar hilokʼ setakʼ do Probhu Isorakʼ hukum lekań kạmikeda.

¹⁹ Unre hoṛko do ińko kulikedińa, “Okam cekaketʼ ale lạgitʼ onako do cetʼ kana? Ona do cetʼ bam lạiyalea? ”

^20-21 Onatege iń do onkoń metatʼkoa, Probhu Isor do Israelko noa katha lạiyakoe metadińa, “Ińakʼ oṛakʼ, okaṭakʼ do apeakʼ daṛe reakʼ gorbokan, okaṭakʼ do mẽtʼ reakʼ suk kan ar mãyã reakʼ jiniskan, onage iń doń besonot ocoya. Ar okoe hopon ar hoponerakope bạgi giḍi akatʼko onko do lạṛhạiteko gujukʼa.

²² Unre Jeheskel okae cekaketʼ apehõ onape onkaea. Moca bape beda ar hokʼmorkoakʼ jomakʼ hõ bape joma.

²³ Bohokʼre dạhṛipe tola ar jaṅgare cạṭkipe horoga. Ar bape homora se rakʼ hõ bape raga, menkhan apan ạpin ghạṭ iạtepe nijorokʼa ar eṭakʼko ṭhenpe geraṅ baṛaea.

²⁴ Jeheskel do ape ṭhen mitʼṭecʼ cinhạ lekae hoyokʼ; uni okae ceka akatʼ ape hõ onagepe kạmiya. Tinre noako hoyokʼa unrepe baḍae daṛeakʼa, iń kangeạń Probhu Isor do.”

²⁵ Probhu Isor do arhõe metadińạ, “E manwa hopon, oka hilokʼ iń do ona daṛe reakʼ gorbo, onkoakʼ rạskạ ar ṭhonok, onkoakʼ mẽtʼãhã reakʼ suk, onkoakʼ mon reakʼ khojogokʼakʼ ar onkoren hopon ar hoponerakoń hataokoa,

²⁶ enhilokʼ mitʼṭen nir paskaoicʼ hoṛ do am khoboram lạgitʼe hijukʼa.

²⁷ Ona jokhecʼ amakʼ moca do jhijokʼtama; am do uni tulucʼ katham roṛa, amakʼ alaṅ do ar baṅ thirokʼtama. Nonkate am do onko ṭhen mitʼṭecʼ cinhạm hoyokʼa ar onkoko baḍae daṛeakʼa, iń kangeạń Probhu Isor do.”