Jeheskel 23 - সান্তালী বাইবেল

Boeha kuṛikinakʼ ghạṭ

¹ Probhu Isor do ińe metadińạ,

² “E manwa hopon, barea boeha kuṛikin tahẽkana one unkin do mitʼ gogoren hoponera kin tahẽkan.

³ Huḍiń umer khon unkin do Misor disạmre kusumbi kin tahẽkana. Ona disạmrege hoṛko do unkinakʼ bạ̃sko sapʼetʼ tạkin tahẽkana ar kũạri cuńciko locayetʼ tạkin tahẽkana.

⁴ Unkin modre maraṅicʼakʼ ńutum do Ohola ar bokot kuṛiyakʼ ńutum do Oholiba. Unkin do ińrenkin hoyena ar koṛa hopon ar kuṛi hoponkin janamketʼkoa. Ohola do Samariại hoyena ar Oholiba do Jerusalemge.

^5-6 “Ohola do ińrene tahẽkanre hõe loṭghuṭikeda. Uniren dulạṛiạko, metakʼme Ạsurrenko secʼ uni doe gagojok ʼkan tahẽkana. Onko do beguni roṅ kicricʼ horokʼ akatʼ lạṛhại birko, disạm cakʼlaoko ar subedarko tahẽkana; ar jotoge ńapae juạn ar sadomre dejokʼ aswariko tahẽkana.

⁷ Uni do acʼakʼ hoṛmoe danatʼkoa Ạsurren onko soros soros hoponkoge; ar jãhãegeye gagojatʼko onkoren sanam boṅga murhutʼko iạte apnartetʼ hõe bhonḍena.

⁸ Uni do acʼakʼ laṭghaṭ kạmiko do bae bạgileda, one Misorre tahẽkan jokhecʼ khone ehopʼletʼ; onḍe uni do kom umere tahẽkanrege hoṛko sãoteye giticʼ mitʼena ar onkoakʼ laloc do acʼreye dulante acʼakʼ kũạritetʼe nosṭoketʼtaea.

⁹ “Ona iạte iń do uniren dulạṛiạkoakʼ tire, metakʼme okoeye gagojako kan tahẽkan onko Ạsurrenkoakʼ tireń soprotkadea.

¹⁰ Onko do uniko uluṅkedete uniren koṛa hopon ar kuṛi hoponko recʼkedea ar tarwaṛeteko makʼ gocʼkedea. Ar maejiuko talare uni do mitʼṭecʼ kạhtukgeye hoyena, ente unire bicạrko do purạuena.

¹¹ “Uniren boeha kuṛi Oholiba do noakoe ńelkeda, enhõ uni do acʼakʼ gagojokʼre ar laṭghaṭre acʼren boeha kuṛi khon hõ bạ̃ṛtiye kharapena.

¹² Uni hõ Ạsurrenko secʼe gagojena; onko do disạm cakʼlaoko ar subedarko tahẽkana; ar mońj kiricʼ horokʼ akatʼ lạṛhại bir ar aswariko tahẽkana; onko do jotoge napae juạnko tahẽkana.

¹³ Iń doń ńelkeda uni hõ apnartetʼe bhonḍena; banarge inạ mitʼ hortegekin taṛamkeda.

¹⁴ “Menkhan Oholiba do arhõ bạ̃ṛtiye laṭghaṭ idikeda. Uni do pạcri bhitre chap akan herel hoponkoe ńelketʼkoa, sindurte chap akan Kạldikoakʼ muṭhạnge.

¹⁵ Onko do paṭheyakʼte ḍanḍareko tol ạcurakana, bohokʼre dhacanakʼ dạhṛiteko dạhṛi akana; onko do jotoge ńelokʼte Babel disạmren subedarko lekako ńelokʼkan tahẽkana.

¹⁶ Onko ńelko sãote uni do onko cetanre laloc hecʼadea ar Bablete hoṛe kulketʼkoa.

¹⁷ Onate Babelrenko do uni ṭhen hecʼkate uni tulucʼ aṭetʼreko giticʼ mitʼena arko laṭghaṭketʼte uniko bhonḍkedea. Arko bhonḍkede khan uni do onko hirkhạwakoe ehopʼena.

¹⁸ Uni do tinre khulạsate loṭghuṭiye ehopʼkeda ar acʼakʼ uluṅtetʼe sodorkeda unre iń do uniń hirkhạwadea, cetʼleka acʼren boeha kuṛiń hirkhạwade tahẽkan.

¹⁹ Juạn oktere tinre uni do Misorreye loṭghuṭiyetʼ tahẽkana unreakʼ dinko disạkate uni do arhõ bạ̃ṛti loṭghuṭi kạmiye ehopʼena.

²⁰ Onḍe uni do nonkan hoṛkoe gagojatʼkoa one onkoakʼ hereltetʼ reakʼ jel hoṛmo hạṭiń do gadhakoakʼ jel hoṛmo hạṭiń leka ar onkoakʼ hereltetʼ reakʼ itạ do sadomkoakʼ itạ leka tahẽkan.

²¹ “E Oholiba, amakʼ juạn oktere Misorren hoṛko do amakʼ bạ̃sko sipotʼetʼ tahẽkana ar amakʼ juạn nunu cuńciko locayetʼ tahẽkana. Onko do amakʼ kũạritetʼko nosṭoketʼtama; ar ńitokʼ am do arhõ onko tulucʼge loṭghuṭi reakʼem khojkana.

²² Ona iạte iń Probhu Isorgeń menetʼkana, amren okoe dulạṛiạkom hirkhạ akatʼko onkoge am upạrteń uskạukoa ar beṛhae khon am upạrteń ạgukoa.

²³ Onko do Babelrenko, sanam Kaldiko, Pekod, Soya ar Koa ar onko sãote sanam Ạsurren hoṛko. Onko do jotogeko napae juạn kanako; ar jotoge disạm cakʼlaoko, subedarko, rãt gạḍi cakʼlaoko, cetan hudạren kạmiyạko ar aswariko tahẽkana.

²⁴ Onko do utạr khon khanḍa bhanḍawante, rãt gạḍikote, sagaṛ gạḍikote ar mitʼ maraṅ phạdante am upạrteko hijukʼa. Onko do maran ar huḍiń ḍhalante bohokʼ aḍokʼ reakʼ ṭupri horokʼkate amko gherao esetʼmea. Ar iń do onkoakʼ tireń soprotmea ar akoakʼ niạm lekako sạjạimea.

²⁵ Ińakʼ jaljalaokʼkan edre do am upạrteń paṛao ocoya jemon onko do raṅgaote am tulucʼko beohar. Onko do amakʼ mũ ar luturko heseytama ar amren sarecʼ hoṛ doko gocʼkoa. Onko do amren hoponko ar hoponerako idikoa, ar amren sarecʼ hoṛ do seṅgelteko ḍahao maraokoa.

²⁶ Onko do amakʼ kicricʼko bhạnduṛtama ar amakʼ mońj abhranko idiytama.

²⁷ Okaṭakʼ laṭghaṭ kạmi Misor disạmrem ehopʼletʼ ona do nonkageń cabaytama. Onate am do onko hoṛko secʼ bam beṅgeda ar Misor hõ bam disạyea.

²⁸ “Ar okoekom hirkhạwako kan, ar okoeko secʼ khonem ạcurakan onkoakʼ tiregeń soprotmea.

^29-30 Onko do amko hirkhạwama ar amem khaṭaolen reakʼ sanam jo do onkoko idiytama. Onko doko uluṅmea arko ekenti oṭokama. Unre amakʼ kusumbiteakʼ kạmi reakʼ lajaoakʼ do sodorokʼtama. Amakʼ laṭghaṭ kạmi ar kusumbigiri khạtirte noako do amre hijukʼa, ente am do jạt jạtrenko tulucʼ laṭghaṭ reakʼem kạmi akada, metakʼme onkoren boṅga murhutʼkotem bhonḍ akana.

³¹ Am do amren boeham kuṛiyakʼ hortegem sen akana; onate uniyakʼ bạṭi do amakʼ tireń calam kana.

³² “Iń Probhu Isorgeń menetʼkana, amren boeham kuṛiyakʼ bạṭiregem ńũiya; ente ona do khạ̃yukʼ ar lạṭugea. Ar onare ḍherge sahobokʼte am do ona ńũkate hirkhạwan ar landa dhutʼicʼem hoyokʼa.

³³ Am do botor ar maraokʼakʼ bạṭi khonem ńũite, amren boeham kuṛi Samariawakʼ bạṭi khon ńũkatem bulokʼa ar duktem perejokʼa.

³⁴ Am do onarem ńũiya, arem ńũ ańjeda; ar ona reakʼ kelhatʼ hom togoja ar amakʼ toakin hõm raboṛ cirạitama. Ar ińakʼ bicạr reakʼ ray do noa kangea.

³⁵ Am do ińem hiṛiń arem dea giḍi akadińte amakʼ laṭghaṭ ar kusumbi reakʼ kuṛạiyem joma. Iń Probhu Isorge noa katha doń meneda.”

³⁶ Inạ tayom Probhu Isor do ińe metadińạ, “E manwa hopon, am do cetʼ Ohola ar Oholiba tạkin bicạrkin lạgitʼem sapṛaogea? Enḍekhan unkinakʼ hirkhạwanakʼ kạmiko reakʼ katha baṛe baḍae ocokinme.

³⁷ Unkin dokin laṭghaṭ akada ar ti do mãyãmtekin thoko boko akatʼtạkina. Boṅga murhutʼkin sewawako kante unkin dokin laṭghaṭ akada; ar iń lạgitʼkin janam akatʼko hopon ar hoponerako do boṅga murhutʼkoren jomakʼ lekate seṅgelrekin samaṅ akatʼkoa.

³⁸ Ona chaḍa inạko okterege unkin do ińakʼ oṛakʼkin bhonḍ akada. Unkin do ińakʼ jirạukʼ mãhãko reakʼ sonottetʼ do bạkin rukhiyạ akada.

³⁹ Inạko dinrege unkin do ạkinren boṅgako ṭhen ạkinren hopon ar hoponerako kin teṅgen akatʼkoa ar ińakʼ oṛakʼte bolokatekin bhõnḍ akana. Unkin do ińakʼ oṛakʼrege noakin kạmi akada.

⁴⁰ “Ona chaḍa Ohola ar Oholiba do sạṅgiń disạm khon hoṛko ạguko lạgitʼ hoṛkin kolketʼkoa. Ar onko hoṛko hecʼen khan unkin dokin um saphayena, aenom kajarkin lagaoana ar gohna horokʼkate mońjtekin sajaoena.

⁴¹ Ona tayom unkin do mońj aṭetʼre duṛupʼkate ona samaṅre mitʼṭecʼ ṭebil ạgukate ona cetanre ińakʼ dhup ar sunumgekin dohokeda.

⁴² “Unkin beṛhaete do gad gad hoṛkoakʼ aṛaṅge ańjomokʼkan tahẽkana. Unkin talare do nicạṛ monan hoṛ ar hahaṅkar ṭoṭharen ńũ bhuteṛ hoṛko tahẽkana. Onko do boeha kuṛikin tire sakomko horokʼatʼkinạ ar unkinakʼ bohokʼre do mońj okocʼ mukuṭko horokʼatʼkinạ.

⁴³ Unre laṭghaṭte laṅga akan maejiu reaṅ iń menkeda, ‘ńitokʼ onko hoṛ do kusumbi lekageko beohar ocoge ar uni hõ onko sãoteye laṭghaṭ idiyma.’

⁴⁴ Hoṛko cetʼ leka kusumbiko sãoteko giticʼmidokʼ onkage onko do Ohola ar Oholiba ṭhenko boloyena, unkin nilạjiạ maejiukin ṭhenge.

⁴⁵ Menkhan dhorom hoṛ do unkinko bicạrkinạ laṭghaṭ maejiuko bicạrko lekage, ar mãyãmko joro ocoy ạimạiko bicạrko lekage, ente unkin do laṭghaṭren maejiukin kanakin ar mãyãm do unkinakʼ tire menakʼa.

⁴⁶ “Ente Probhu Isor do nonkae meneda; unkin upạrte phạdke phạd ạgukope ar mitʼṭecʼ botoranakʼ ar jarkharakʼge hoyocokinpe.

⁴⁷ Onko hoṛ do dhiriteko tińkinạ ar tarwaṛeteko makʼ khanḍa khunḍikinạ. Onko do unkinren hoponko ar hoponerako gocʼkoa ar onkoakʼ oṛakʼ-duạrko jeretʼ giḍikatakoa.

⁴⁸ “E Ohola ar E Oholiba nonkage iń do disạm tala khon bạṛicʼ kạmiń caba ocoya jemon sanam maejiuko cehaokʼte aben leka nilạjiạwakʼ aloko kạmi.

⁴⁹ Abenakʼ bạṛicʼ kạmi reakʼ jo do abenge jojom hoyokʼtabena ar boṅga murhutʼko sewawako reakʼ kuṛại do ben asen baṛaea. Ar unre ben baḍae daṛeakʼa, ińkangeạń Probhu Isor do.”