Jeheskel 22 - সান্তালী বাইবেল

Jerusalem reakʼ ghạṭ

¹ Probhu Isor do arhõ ińe metadińạ,

² “E manwa hopon, am do cetʼ bicạr lạgitʼem sapṛaogea? Enḍekhan mãyãme joro ocoakatʼ niạ nagraha reakʼ baṛe bicạrme. Am do uniyakʼ sanam hirkhạwakʼ kạmiko reakʼ katha baḍae ocoyem.

³ Unim metaea, Probhu Isore meneda, ‘noa do ona nagraha kana, okoe do apnar talare mãyãm joro ocokate apnarakʼ sorbonase ạgujoṅa ar boṅga benaokate apnartetʼe bhonḍokʼkan.

⁴ Mãyãmem joro ocoakatʼte am do dusim hoyakana ar boṅga benaokate besaphayicʼem hoyakana. Am do amakʼ dinkom sạt ạgu akatʼtama ar amakʼ ses okte do seṭer akana. Ona iạte jạt jạtrenko do amko landa dhutʼama ar sanam disạmrenko ṭhen do cigạrigeń hoyocomea.

⁵ E besulukte perecʼ hirkhạwanakʼ nagraha, am do sor ar sạṅgińren sanamko amko landa-dhutʼama.

⁶ “‘Ńelme, amre menakʼko Israelren cakʼlaoko do akoakʼ daṛe leka mãyãm joro ocoy lạgitʼko mone muruk akada

⁷ Am talarege hoṛko do eṅga-apako nihạ̃tetʼkoa, bidisiạkoko santaoetʼkoa ar ṭũạr amar ar rạnḍi maejiuko tulucʼ hõko jor julumeda.

⁸ Am do ińakʼ sonot jiniskom hirkhạ akawada ar ińakʼ jirạukʼ mãhãko reakʼ sonottetʼ do bam rukhiyạ akada.

⁹ Am talare nonkan hoṛ menakʼkoa okoe do eṭakʼkoakʼ bodnamko lại baṛaete onkoakʼ mãyãmko joro ocoyetʼkan, buru cetan than boṭkocʼreko jom-ńũiyetʼkan ar kharap kharapakʼko kạmikan.

¹⁰ Am talare nonkan hoṛ menakʼkoa okoe do kạki eṅgattetʼ sãoteko laṭghaṭetʼkan, ar candoteakʼ hoyokʼkan maejiu sãote jor jobor salakʼko giticʼmidokʼ kan,

¹¹ aḍepaseren hoṛren bạhutetʼ sãote, kimintetʼ sãote ar kạki gogoren hoponera sãoteko laṭghaṭetʼ kan.

¹² Am talare mãyãm joro ocoy lạgitʼ hoṛko do ghusko hataoeda; ona chaḍa am hõ ḍher sudkom hataoeda ar jor julumkate aḍepaseren hoṛkom recʼetʼkoa. Ar iń dom hiṛiń akadińạ. Iń Probhu Isorge noa katha doń meneda.

¹³ “ ‘Am okaṭakʼ behokakʼem lab akatʼ ar am talare okaṭakʼ mãyãmem joro ocoakatʼ ona lạgitʼ khạṭige iń do ti thayowateń hạ̃nmea.

¹⁴ Ar oka hilokʼ am ṭhen khon hisạbiń hataoa enhilokʼ do cetʼ dil tahentamgea? Amakʼ ti do cetʼ keṭecʼge tahentama? Iń Probhu Isorge noa katha doń meneda ar onage iń doń onkaea.

¹⁵ Iń do amren hoṛko eṭakʼ eṭakʼ jạtrenko talare ar disạmko talareń chirchạturkoa ar amakʼ besaphawakʼ iń sạṅgiń giḍikakʼa.

¹⁶ Ar jạt jạtrenko samaṅre tinrem besonotokʼa unre am dom baḍae daṛeakʼa, iń kangeạń Probhu Isor do.’ ”

¹⁷ Ona tayom Probhu Isor do ińe metadińạ,

¹⁸ “E manwa hopon, Israelko iń ṭhen do mạilạ lekako hoyakana; onko sanamkoge bhaṭa reakʼ pitạl, ṭin, mẽṛhẽtʼ ar sisạ kanako. Rupạ reakʼ mạilạ kanako.

¹⁹ Onatege Probhu Isore meneda, ‘sanamkoge mạilạpe hoyakante iń do Jerusalemreń jarwapea.

²⁰ Hoṛko do cetʼleka rupạ, pitạl, ṭin, mẽṛhẽtʼ, ar sisạ jarwakate bhaṭa reakʼ seṅgel salgaokateko galao onkage ińakʼ edre ar khĩs do nagraha talare jarwakateye galaopea.

²¹ Iń do apeń jarwapea ar ińakʼ jolokʼkan edreyiń oṅapea ar ape do nagraha talarepe galaokʼa.

²² Culhạre cetʼ leka rupạ galaokʼ onkage ape hõ onarepe galaokʼa. Unre ape dope baḍae daṛeakʼa, iń Probhu Isorge ape cetanre ińakʼ edreń dul akada mente.’ ”

²³ Probhu Isor do arhõ ińe metadińạ,

²⁴ “E manwa hopon, disạm do nonkam metaea, ‘am do mitʼṭecʼ besapha disạm kanam, onate ińakʼ edre reakʼ dinkore am cetanre do bae daga.’

²⁵ Ona disạmren nạbiko doko soṛojontrokana; onko do hạnḍrạukʼ kan dhạcri kul leka kanako. Onko do hoṛko jomkoa, dhon-durib ar damanakʼ jinisko hataoa ar disạm talare ḍher maejiuko rạnḍi ocokoa.

²⁶ Uniren naekeko do ińakʼ ạn-ạri upạrteko kạmikana ar ińakʼ sonot jiniskoko besonot ocoyeda. Okaṭakʼ sonotakʼkan ar okaṭakʼ do sonotakʼ baṅkan ona jotoko mitʼeda; onko do sapha ar besaphawakʼ talare oka pharak menakʼ ona reaṅ bako cetʼako kana ar ińakʼ jirạukʼ mãhãko manao babotre mẽtʼ doko jạpitʼkatako kana. Onate onko talare ińakʼ ńutum reakʼ sonottetʼ do nosṭokʼ kana.

²⁷ Hunḍạr cetʼleka sikạrko sapʼko onkage onḍenko rajkạmiyạko do mãyãmko joro ocoyeda ar behok lekate lab iạte manwako khũnetʼkoa.

²⁸ Eṛe dorson ar eṛe gukʼniko iạte onkoren nạbiko do onkoakʼ kạmiko cetanre cunteko potaoetʼkana. Probhu Isor bae men akatʼre hõ onko doko mena, ‘Probhu Isor do noa kathae meneda.’

²⁹ Disạmren hoṛ doko jor jukʼlum kana arko rerecʼkana; reṅgecʼ orecʼko cetanreko behoketʼ kana ar dhorom bicạr baṅkate bidisiạko cetanreko sasantao kana.

³⁰ “Iń do onko talare nonkan mitʼ hoṛakʼ khojiń hataokeda, okoe do bhite gathao rakab ar disạmren hoykate bhit reakʼ paṛakʼre iń samaṅreye teṅgokʼ jemon disạm do aloń dhaṅdhaser daṛeakʼ, menkhan celege bạń ńamletʼkoa.

³¹ Onatege ińakʼ edre do onko cetanreń dultińạ ar onkoakʼ colon reakʼ kuṛại do onkoakʼ bohokʼ cetanreń paṛao ocoya ar ińakʼ jolokʼkan edrete onkoń jeretʼ giḍikoa. Iń Probhu Isorge noa katha doń meneda.”