Jeheskel 21 - সান্তালী বাইবেল

Isorakʼ tarwaṛe

¹ Ona tayom Probhu Isor do ińe metadińa,

² “E manwa hopon, amakʼ mẽtʼãhã do Jerusalem secʼ samaṅkate koejoṅ oṛakʼ upạrte katha roṛme ar Israel disạm upạrte nạbi katha roṛme.

³ Unim metaea, Probhu Isore meneda, ‘iń do am upạrte minạńa. Iń do khap khon ińakʼ tarwaṛeń oḍoka ar am tala khon dhorom hoṛ ar bedhorom hoṛ jotogeń gocʼkoa.

⁴ Dhorom hoṛ ar bedhorom hoṛ sanamko gocʼko lạgitʼ ińakʼ tarwaṛe do khap khoniń or oḍoka ar dạkhin khon utạr hạbicʼ sanam hoṛkoń gocʼkoa.

⁵ Unre sanam hoṛko baḍae daṛeakʼa, iń Probhu Isorge khap khon tarwaṛeń oḍok akada; ar ona do baṅ doho ruạṛokʼa.”

⁶ “Ona iạte E manwa hopon, am do kũhrạukʼme, koṛam oṛejokʼ lekage ar hae nisạste onko samaṅre kũhrạukʼme.

⁷ Onko do tinre amko kulimea, ‘cedakʼem kũhrạukʼ kana?’ Am dom mena, ‘okaṭakʼ sombat hijukʼkan ona lạgitʼ iń kũhrạukʼ kana. Unre sanamkoakʼ mon do udạsokʼa ar ti do lạbṛujokʼtakoa; onkoakʼ mon do latwagokʼa ar gunṭhi do nijor cabakʼtakoa. Probhu Isore menetʼ kana, ona do hijukʼkana; ar hoyokʼte hõ hoyokʼgea.’ ”

⁸ Probhu Isor do arhõe metadińạ,

⁹ “E manwa hopon, am do noa nạbi katha roṛme, Probhu Isore menetʼkana, ‘noa do tarwaṛe kana! Laser ar jhalkao akatʼ mitʼṭecʼ tarwaṛege!

¹⁰ Gogocʼ lạgitʼ ona do laser ocoakana, ar jhalkao akana ar bijli leka malkaokʼ kana.’ ” Israelkoko meneda, “Jihudạ reakʼ raj ṭheṅga iạte abo dobon rạskạkʼa; ona raj ṭheṅga do sanamakʼe nihạ̃t giḍi akada.”

¹¹ Probhu Isor meneda, “Tarwaṛe do jhalkao ocoakana jemon beoharokʼ; ar gogocʼicʼakʼ tire emokʼ lạgitʼ ona do laser ar jhalkao ocoakana.

¹² E manwa hopon, ragme ar homor halaṅme, ente ona tarwaṛe do ińren hoṛko upạrte ar Israelren sanam mukhiyạko upạrtehõ kana. Onko do ińren hoṛko sãote tarwaṛe ṭhenko soprot ocoakana. Onate am do koṛam ceṭagtam.

¹³ Noako biḍạu do hijukʼgea. Jihudạren raj jodi ińakʼ sạjạiye nihạ̃t gidikakʼ enḍekhan uni do cetʼe ṭikạu tahẽ daṛeakʼa?

¹⁴ “Onate E manwa hopon, am do nạbi katha roṛme ar ti thayoyme. Ona tarwaṛe do bar dhao, se pe dhaoge hecʼ ocoge. Noa do gocʼ ocokʼko lạgitʼ, hẽ ḍherko gocʼko lạgitʼ mitʼṭecʼ tarwaṛe kana; ona do beṛhaete onkoe gherao akatʼkoa.

¹⁵ Iń do onkoakʼ sanam nagraha reakʼ phaṭok duạrkore noa gogocʼ reakʼ tarwaṛeń dohoakada jemon onkoakʼ mon do udạs cabakʼtako ar ḍher hoṛko gujukʼ. Hẽ, ona tarwaṛe do bijli leka malkaokʼa; ona do gogocʼ lạgitʼge laser ocoakana.

¹⁶ E laser tarwaṛe, jojomti secʼ uyugme, ona tayom do leṅgati secʼge, ar jãhãsecʼgem samaṅ ontege uyugme.

¹⁷ Ińhõ tiyiń thayoya ar ińakʼ jaljalaokʼ edreń tirpit ocoytińạ. Iń Probhu Isorge noa katha doń meneda.”

¹⁸ Probhu Isor do ińe metadińa,

¹⁹ “E manwa hopon, Babel rajakʼ tarwaṛe calakʼ lạgitʼ barea horre cinhạ dohoyme, ona banar horge mitʼ disạm khon oḍok hijukʼa. Ar okare hor hạṭińente nagraha secʼ senakan onḍe do hor udug reakʼ khunṭi bidme.

²⁰ Tarwaṛe lạgitʼ Amonrenko do Raba nagraha upạrte calakʼ reakʼ mitʼṭen hor ar Jihudạ ar pạcrite esetʼ nagraha upạrte calakʼ lạgitʼ horre mitʼṭecʼ cinhạ dohoyme,

²¹ ente Babelren raj do onakin barea hor reakʼ etohopʼ ṭhen dobạṭiạreye teṅgo akana bhao ocoy lạgitʼ. Uni do sare aṛaga, ar acʼren debotako ṭhene kulijoṅkana ar jãhãn janwarkoakʼ inboroteye biḍạu aṭkara.

²² Uniyakʼ jojom ti reakʼ gulibãṭ do paṛao akana Jerusalem lạgitʼ, ona doe lạiyaekana lạṛhại andoṛ rakab lạgitʼ, phaṭok duạrko upạrte sobokʼ bhugạkʼakʼkoe jut aroe lạgitʼ, pinḍhạko upʼ rakab lạgitʼ, ghekʼrao buruńjko benao lạgitʼ.

²³ Jerusalemren okoe hoṛko do Babel raj tabere tahen lạgitʼko kiriạlen onko ṭhen noa gona-poṛa do ạuṛiyakʼge hoyokʼa, menkhan onkoakʼ dos reakʼ katha do onkoe disạ ocokoa are bondi idikoa.

²⁴ “Iń Probhu Isorgeń meneda, apeakʼ papko sodor akana; ar ona iạte apeakʼ ghạṭkope disạ ocoyetʼkana; ar ona iạtege apeakʼ ghạṭko do apeakʼ sanam kạmikore ńel ńamokʼkana, apepe disạ ocokʼkan iạte, ape do onko tirepe sapʼ ocokʼa.

²⁵ “E besonot ar Israelren dusṭạmi raj, amakʼ din do seṭer akana, amakʼ sạjại reakʼ okte do seṭer akana.

²⁶ Iń Probhu Isorgeń meneda, amakʼ dạhṛi raṛaetam, ar mukuṭ do bojtam. Ente cetʼleka tahẽkan onka do ar baṅ hoyokʼa. Usulakʼ do copodokʼa ar copodakʼ do usul ocokʼa.

²⁷ Dhaṅdhaser, dhaṅdhaser! Iń do noa jotogeń dhaṅdhasera! Ar sạriyakʼ reakʼ ạidạri okoeyakʼ menakʼtae uni ạuriye ruạṛ hijukʼ hạbicʼ noako do ar baṅ tahena. Iń do unige noakoń emaea.

²⁸ “E manwa hopon, am do nạbi katha roṛme, Amonrenko ar onkoakʼ henosta reaṅ do Probhu Isore meneda, ‘mitʼṭecʼ tarwaṛe, mitʼṭecʼ tarwaṛe do gogocʼ lạgitʼ bocʼ akana; ona do jhalkao akana makʼrao lạgitʼ ar bijli leka malkaokʼ lạgitʼ.

²⁹ E tarwaṛe onko do am reaṅ ạuṛi dorsonko ńeńelkanre hõ ar am reaṅ ạuṛiyakʼko guniyetʼkanre hõ okoeko gocʼ ocokʼ onko bedhorom bạṛicʼkoakʼ hoṭokʼ am dom giḍi ocokʼa; ente onkoakʼ din do hecʼ paṛao akana, onkoakʼ sạjại reakʼ okte do seṭer akana.

³⁰ E Amonirenko, apeakʼ tarwaṛe do khapre bhorao ruạṛkakʼpe. Ar oka ṭhạ̃irepe sirjạulen, aperen hapṛamkoakʼ ona disạmre iń do apeń bicạrpea.

³¹ Ińakʼ edre do ape cetanreń dula ar ape upạrte ińakʼ khĩs reakʼ seṅgeliń oṅa. Ar nonkan kurmutạha hoṛkoakʼ tireń soprotpea okoe do makʼrao kạmireko gạkhuṛge.

³² Ape do seṅgel lạgitʼ sahan lekagepe hoyokʼa. Apeakʼ mãyãm do apeakʼ disạmrege jorokʼa ar ape dope hiṛiń ocokʼa. Iń Probhu Isorge noa katha doń meneda.’ ”