Jeheskel 20 - সান্তালী বাইবেল

Israelko do Luluṭko kanako

¹ Eaeakʼ bochor reakʼ mõṛẽakʼ cando reakʼ gelakʼ dinre Israelren adom murubbiko do Probhu Isorakʼ sana baḍae lạgitʼ iń ṭhen hecʼkateko duṛupʼena.

² Unre Probhu Isorakʼ noa katha do iń ṭhen hecʼena,

³ “E manwa hopon, am do Israelren murubbikom metakoa, Probhu Isore meneda, ‘ape do cetʼ iń ṭhen kulijoṅ lạgitʼpe hecʼakana? Ińakʼ ńutumteń menetʼkana, iń do bạń baḍae ocopea.’

⁴ “E manwa hopon, am do cetʼ onkom bicạrkoa? Enḍekhan onkoren hapṛamkoakʼ bạṛicʼ colon reakʼ katha baṛe baḍae ocokome.

⁵ Onkom metakoa, Probhu Isore meneda, ‘oka hilokʼ Israeliń bachaolede enhilokʼ Jakob bõsren hoṛko ṭheniń kiriạlena ar Misorre onko ṭheniń sodorlena. Iń do kiriạkate onkoń metatʼko tahẽkana, ińkangeạń onkoren Probhu Isor do.

⁶ Enhilokʼ onko ṭhen arhoń kiriạlena, Misor disạm khon onkoń oḍok ạgukoa ar onko lạgitʼ okaṭakʼ disạmiń ṭhik dohoakatʼ ona disạmteń idikoa. Onḍe do toa ar dumur rasa ar jãhãnakʼ reakʼ okulạnge bạnukʼa; ona do sanam disạmko khon sorosgea.

⁷ Onkoń metatʼko tahẽkana, okoe hirkhạwan boṅga muṭhạnko mońjko bujhạuletʼko onko do jemonko sạṅgiń giḍikako ar Misorren boṅgako hotete apnartetʼ hõ aloko besaphakʼ, ente iń kangeạń onkoren Probhu Isor do.

⁸ “ ‘Menkhan onko do iń upạrteko hulkeda, ińakʼ katha ańjom do bako rạjilena. Okoe hirkhạwan boṅga murhutʼko bhageko hudisetʼko tahẽkan onko do bako sạṅgiń giḍiletʼkoa ar Misorren boṅga muṭhạnko hõ bako bạgiyatʼkoa. Onatege ińiń menkeda Misorre onko cetanre ińakʼ edre ar khĩs do onkoreń dula.

⁹ Menkhan ińakʼ ńutum rukhiyại tiń lạgitʼ ona do bạń onka akada, jemon okoe jạtrenko talareko girobasokʼ kan tahẽkan onko ṭhen ińakʼ ńutum besonotakʼ alo hoyokʼ. Misor disạm khon Israelko oḍok ạgukate onko jạtrenkoakʼ mẽtʼ samaṅre Israelko ṭhen ińtetʼ geń sodorena.

¹⁰ Misor khon onko do hahaṅkarteń oḍok ạguketʼkoa.

¹¹ Onko do ińakʼ niạmkoń ematʼkoa ar ińakʼ ạn-ạrikoń baḍae ocoketʼkoa; ar okoe onae manaoa uni do ona hotetege jione ńama.

¹² Iń ar onko talare cinhạ lekate jirạukʼmãhãń ematʼkoa jemonko baḍae daṛeakʼ je, iń Probhu Isorge iń ńutumteń begar dohoakatʼkoa mente.

¹³ “Menkhan Israelren hoṛko do hahaṅkarre iń upạrteko hulkeda. Onko do ińakʼ niạm bako manaoleda ar ińakʼ okaṭakʼ ạn-ạri manao hotete manwa jionko ńam ona doko nihạ̃t giḍikada; ar iń emakʼ jirạukʼmãhã reakʼ sonottetʼ hõ bako rukhiyạleda. Onatege iń doń menkeda, onko cetanre ińakʼ edreń dulakote hahaṅkarrege onko doń marao giḍikakoa.

¹⁴ Menkhan ińakʼ ńutum rukhiyại tiń lạgitʼ iń do ona bạń onkaleda, jemon okoe jạtrenko samaṅre onkoń oḍok giḍiletʼko onko ṭhen ińakʼ ńutum besonotakʼ alo hoyokʼtiń.

¹⁵ Ona chaḍa ona hahaṅkarrege onko ṭheniń kiriạyena, iń emakʼ disạmge one okaṭakʼ disạmre toa, dumur rasa ar jãhãnakʼ reakʼ okulạnge bạnukʼ, okaṭakʼ disạm do sanam disạmko khon soros utạrge ona disạmte do bạń idikoa.

¹⁶ Onko do ińakʼ ạn-ạriko nihạ̃t giḍiakada ar ińakʼ niạmko bạgi giḍiakada ar iń emakʼ jirạukʼ mãhãko reakʼ sonottetʼ do bako rukhiyạ akada, ente onkoakʼ ontor do boṅgako secʼge orokʼ kan tahẽkantakoa.

¹⁷ Enhõ iń do daya reakʼ mẽtʼteń ńelketʼkote hahaṅkarre bạń marao utạrletʼkoa.

¹⁸ Onḍe onkoren hoponko ar hoponerakoń metatʼkoa, onko jemon akoren hapṛamko leka aloko kạmi, onkoakʼ colon leka aloko calakʼma ar onkoren boṅga muṭhạnkote apnartetʼ aloko besaphakʼma.

¹⁹ Iń do arhõń metatʼkoa, iń kangeạń onkoren Probhu Isor do, onate jemon ińakʼ niạmko pańjae ar ińakʼ ạn-ạri lekako taṛam.

²⁰ Onko do ińakʼ jirạukʼmãhã reakʼ sonottetʼ jemonko rukhiyạ dohoy; onate iń ar onko talare ona do mitʼṭecʼ cinhạ leka tahena, ar onko doko baḍae daṛeakʼa, iń kangeạń onkoren Probhu Isor do.

²¹ “ ‘Menkhan onko hoponko ar hoponerako do iń upạrteko hulkeda. Onko do ińakʼ niạm bako manaoleda ar okaṭakʼ ạn-ạri palon hotete manwa do jionko ńam onko do ińakʼ ona ạn-ạri manao secʼ do bako moneyada; onko do iń emakʼ jirạukʼ mãhãko reakʼ sonottetʼ bako rukhiyạleda. Onate onkoń metatʼkoa hahaṅkarre onko cetanre ińakʼ edreń dulakoa.

²² Menkhan ińakʼ ti doń ocokʼketʼtińạ ar ińakʼ ńutum rukhiyại lạgitʼ ona do bạń onkaleda jemon sanam jạtrenko samaṅre onkoń oḍok ạguletʼko tahẽkan onko ṭhen ińakʼ ńutum do besonotakʼ alo hoyokʼ.

²³ Ona chaḍa hahaṅkarre iń do onko ṭheniń kiriạlena, aema jạtrenko ar disạmko talare onkoń chirchạturkoa,

²⁴ ente onko do ińakʼ ạn-ạri bako manaoleda, ińakʼ niạmko nihạ̃t giḍiakada, iń emakʼ jirạukʼ mãhã reakʼ sonottetʼ bako rukhiyạleda, ar akoren hapṛamkoren boṅga murhutʼkoge bhageko hudiseketʼkoa.

²⁵ Ona iạte okaṭakʼ bhageakʼ baṅkan ar okaṭakʼ niạm hotete jion bako ńam onako reakʼ tireń aṛakʼ giḍikatʼkoa.

²⁶ Pạhilko janam akan hoponko do seṅgelreko khadleketʼkoa, ar ona hoteteń bhõnḍ ocowatʼkoa jemoniń marao utạrko. Unre onko doko baḍae daṛeakʼa je, iń kangeạń Probhu Isor do.’

²⁷ “Onatege E manwa hopon, am do Israelkom metakoa, Probhu Isore meneda, ‘aperen hapṛamko do bepạtiạu reakʼ kạmikote ińko henosta akadińạ.

²⁸ Okaṭakʼ disạm emako reakʼ iń kiriạlen onḍe idiko tayom onko do jãhãrege usul buru ar hạriạṛ dare buṭạko ńelketʼ onḍege janwarko samaṅketʼkoa. Onko do samaṅokʼ reakʼ porobkote ińko khĩs ocokedińạ.

²⁹ Unre iń do onkoń kuliketʼkoa ona usul ṭhạ̃itepe rakapʼ calakʼkan ona do cetʼkana?’ ” Teheń hõ onako ṭhạ̃i reakʼ ńutum do Bamah, metakʼme “Than boṭkocʼ.” ńutumtege menakʼa.

Bicạr ar bańcao reakʼ

³⁰ Onatege Probhu Isor do ińe metadińạ, “Am do Israelkom metakoa, Probhu Isore menetʼkana, ‘ape do cetʼ aperen hapṛamko leka apnartetʼpe bhonḍokʼa ar onkoren hirkhạwan muṭhạnkope sewawakoa?

³¹ Teheń hạbicʼ ape do aperen boṅgako ṭhen aperen hopon ar hoponerako seṅgelrepe samaṅetʼkote onko boṅgako hotete apnartetʼpe bhonḍokʼ kana. E Israelko, iń do cetʼ ape hoteteń kuli ocokʼa? Iń ńutumteń kiriạkʼ kana, oka lekate hõ ińakʼ monsubạ do bạń baḍae ocopea.

³² “ ‘Ape dope menetʼ kana, dhạrtiren eṭakʼ jạtren hoṛko lekape hoyokʼa okoe do kaṭ ar dhiri reakʼko pujạwakʼkan. Menkhan apeakʼ monre oka menakʼ ona do tishõ baṅ hoyokʼa.

³³ Iń Probhu Isorge ińakʼ ńutumte kiriạkateń meneda, ińakʼ daṛeanakʼ ti tiyạrkate edreń dulapete ape cetanreń rajokʼa.

³⁴ Ińakʼ daṛeanakʼ ti tiyạrkate ar ińakʼ edre dul hotete aema jạtrenko tala khoniń ạgupea ar okako disạmrepe pasnao ocolen onḍe khon arhoń jarwapea.

³⁵ Jạt jạtrenkoakʼ hahaṅkarteń idipea ar onḍege ape tulucʼ samka sạṭi reakʼ bicạriń phanḍaoa.

³⁶ Misor disạm reakʼ hahaṅkarre aperen hapṛamko cetʼlekań bicạrletʼko onkage ape hõń bicạrpea.

³⁷ Ińakʼ ṭheṅga latarteń sen parom ocopea; ar ińakʼ bondobos reakʼ tonolreń aderpea.

³⁸ Ape modre okoe iń upạrteko hul onko doń sạṅgiń giḍikakoa. Ar onko okaṭakʼ disạmreko girobasokʼkan onḍe khoniń oḍok ạgukorehõ onko do Israel disạmre bako bolo daṛeakʼa. Unre apepe baḍae daṛeakʼa, iń kangeạń Probhu Isor do.

³⁹ “ ‘E Israelko, iń Probhu Isorgeń menetʼkana, Do calakʼpe, ar senkate aperen boṅgako sewawakope. Menkhan tayomte khạṭige ińakʼ kathape ańjoma ar unre apeakʼ sandes ar boṅgakote ińakʼ sonot ńutum do ar bape besonota.

⁴⁰ Unre disạm talare ińakʼ sonot burure, Israel reakʼ usul burure, Israelren sanam hoṛ do ińko sewawạńạ ar iń do onḍe onkoń ataṅkoa. Onḍe iń do apeakʼ joto lekanakʼ sonot samaṅokʼakʼ, dan ar bhage bhage sandeskoń ataṅtapea.

⁴¹ Iń do boṅgan hoṛ jạtrenko tala khon tinreń oḍok ạgupea ar okako disạmrepe pasnao akan onḍe khoniń jarwapea unre jut so mosola lekate apeń ataṅpea. Unre ape hotete jạt jạtrenko baḍae daṛeakʼa iń kangeạń sonoticʼ do.

⁴² Aperen hapṛamko ṭhen oka disạm emako reakʼ iń gokʼletʼ ona Israel disạmre apeń idipe tayom apepe baḍae daṛeakʼa, iń kangeạń Probhu Isor do.

⁴³ Onḍe apeakʼ lahateakʼ colon reakʼ katha ar okako kạmi hotete apnartetʼpe bhonḍlen onakope disạya ar apeakʼ sanam bạṛicʼ kạmiko iạte apnartetʼpe hirkhạjoṅa.

⁴⁴ E Israelko, iń do apeakʼ bạṛicʼ colon ar bạṛicʼ kạmi lekate ape sãote do bạń beohara, menkhan ińakʼ ńutum rukhiyại tiń lạgitʼ ape sãote bhageń beohara. Ar unrepe baḍae daṛeakʼa, iń kangeạń Probhu Isor do.’ Iń Probhu Isorge noa katha doń meneda.”

Dạkhin disạm upạrte nạbi katha

⁴⁵ Probhu Isor do arhõe metadińạ,

⁴⁶ “E manwa hopon, amakʼ mẽtʼãhã do dạkhin secʼ samaṅtam ar ona disạm upạrte katha roṛme ar onḍenakʼ bir upạrte nạbi katha roṛme.

⁴⁷ Ar dạkhin reakʼ bir do ińakʼ katha ańjom lạgitʼ metaeme. Unim metaea, Probhu Isore meneda, ‘iń do amre seṅgeliń salgaoa ar ona do amakʼ sanam berel ar rohoṛ dare nạ̃ṛĩkoe joma. Ona jolokʼkan seṅgel do bạṅ ĩṛĩjokʼa ar dạkhin khon utạr hạbicʼ sanam hoṛ do ona reakʼ lepʼteko khạurạkʼa.

⁴⁸ Ar sanam manwa jạtrenko ńela, iń Probhu Isorge ona doń salgao akada; ona do baṅ ĩṛĩjokʼa.’ ”

⁴⁹ Unre ińiń menkeda, “E Probhu Isor, hoṛko iń reaṅko meneda, iń do eken phenkote noa doń roṛeda.”