Jeheskel 2 - সান্তালী বাইবেল

Jeheskele hoho ocokʼkan

¹ Uni do ińe metadińạ, “E manwa hopon, ma teṅgokʼme; iń do am tulucʼ iń galmaraoa.”

² Uni tinre kathae roroṛkan tahẽkana unre Isorren Jiu do ińreye boloyena ar ińakʼ jaṅgateye teṅgo ocokedińa ar uni do iń tulucʼ galmarao in ańjomkedea.

³ Uniye metadińạ, “E manwa hopon, am do Israelko ṭhen, metakʼme okoe iń upạrteko huletʼkan onko jạtrenko ṭheniń koletʼmea; onko ar akoren hapṛamko do teheń hạbicʼ iń upạrteko huletʼkana.

⁴ Okoe ṭheniń koletʼme onko hoṛ do ṭheṭamu ar keṭecʼ monan hoṛkanako. Ar am do Probhu Isorakʼ katham galmarao akoa.

⁵ Onko do amakʼ katha bako ańjoma, ente onko do huhul jạtren kanako; enhõ onko doko baḍae daṛeakʼa, onko talare mitʼṭecʼ nạbi do menaegea.

⁶ Menkhan E manwa hopon, am do onko ar onkoakʼ kathate alom botorokʼa. Onko do seṅgel siń ar jạnumko leka am beṛhaeteko tahẽlenrehõ ar kidiń kaṭkom talare menamre hõ am do alom botorokʼa. Onko ńelte se onkoakʼ katha ańjomte hõ alogem botorokʼa; ente onko do huhul jạtrenko kanako.

⁷ Ar huhul jạtren kanteko ińakʼ katha do ohoko ańjomlea, menkhan baṅ doko ańjom ar baṅ do bako ańjom am do ińakʼ katham lạiyakoa.

⁸ E manwa hopon, iń okań metam ona ańjomme. Am do onko huhulkan jạtrenko leka do alom hoyokʼa. Ma cahabme, ar okań emamkan ona jomme.”

⁹ Unre beṅgetʼkateń ńelkeda iń secʼ mitʼṭecʼ ti do tiạr akana. Ar onare mitʼṭecʼ guṛhe puthi menakʼa.

¹⁰ Uni do iń samaṅre onae oṭakʼkeda. Ona reakʼ banarsage homor halaṅ, kũhrạukʼ ar hae haeyokʼ reakʼ kathako ol tahẽkana.