Jeheskel 19 - সান্তালী বাইবেল

Israelren disạm cakʼlaoicʼ lạgitʼ duk sodor

¹ Probhu Isor do ińe metadińạ, “Am do Israelren disạm cakʼlaoyicʼ lạgitʼ homor halaṅme ar roṛme,

² ‘Dhạcri kulko talare amren eṅgam do soros utạr kule tahẽkana. Uni do juạn dhạcri kulko talareye giticʼkokʼ kan tahẽkana; ar acʼren hoponkoe jotonetʼko tahẽkana.

³ Uniren mitʼṭen hopon doe harayente daṛeanicʼ dhạcri kule hoyena. Uni do janwarko sendrae cetʼkeda ar manwa jomkoe ehopʼena.

⁴ Jạt jạtrenko do uni reaṅko ańjomkeda; Uni do onkoakʼ khạnreye sapʼena. Onko do mũre nakolkate Misor disạmteko idikedea.

⁵ “ ‘Uni kul doe ńelkeda acʼakʼ as do baṅ purạulena; ar okaṭakʼe khojkan tahẽkan ona hõ baṅ hoylentaea; unre uni do acʼren ar mitʼṭen hopon daṛeanicʼe hoyocokedea.

⁶ Uni hopon do dhạcri kulko talare ạcur baṛaete mitʼṭen daṛeanicʼ dhạcri kule hoyena. Uni do janwarko sendrae cetʼkeda ar manwako jojome ehopʼena.

⁷ Uni do onkoakʼ gaṛkoe rạputʼkeda ar sanam nagrahakoe dhaṅdhaserkeda. Uniyakʼ hạnḍrạukʼ reakʼ aṛaṅte disạmren hoṛko botorena.

⁸ Unre uni beṛhaeten jạtrenko do uni upạrteko rakapʼ hecʼena. Onko do uni lạgitʼ jhạliko oḍaokeda, ar uni do onkoakʼ khạnreye sapʼena.

⁹ Onko do mũreko nakolkedete pińjrạreko bhoraokadea ar Babelren raj ṭhenko idikedea. Onko do gaṛreko aṭkao dohokadea; Israel reakʼ burukore uniyakʼ hạnḍrạukʼ reakʼ aṛaṅ do ar baṅ ańjomlena.

¹⁰ “ ‘Amren eṅgam do dakʼ aṛere rohoe akan mitʼṭecʼ darkha nạ̃ṛĩ lekanae; aema dakʼe ńametʼ tahẽkante onare do ḍạr perecʼ jo tahẽkana.

¹¹ Ona reakʼ kahleko do keṭecʼge tahẽkana, disạm cakʼlaoicʼakʼ ḍanṭao reakʼ ṭheṅga leka. Ona nạ̃ṛĩ do cetante rakapʼente rimile tiyokʼkeda; onate sakamte perecʼ nạ̃ṛĩko do nońjorre paṛaoena.

¹² Menkhan Probhu Isor do edre onae or totʼketʼte otreye giḍikada. Puruạ reakʼ hoete ona do rohoṛena, ona reakʼ jo do goso ńurena; uniyakʼ keṭecʼ ḍạrko do rạputʼente rohoṛena, ar seṅgel do onae jomkeda.

¹³ Ona do ńitokʼ hahaṅkarre, rohoṛre, khaṅgoṭ disạmre rohoe akana.

¹⁴ Ona reakʼ mul nạ̃ṛĩ khon seṅgel do oḍokena; ar ona reakʼ ḍạr ar jokoe jomkeda. Disạm cakʼlaokoakʼ ṭheṅga lạgitʼ onare mitʼṭecʼ ḍạr hõ baṅ tahelena. “Noa do mitʼṭecʼ homor halaṅ kana; duk reakʼ sereń lekate noa do beoharokʼa.”