Jeheskel 18 - সান্তালী বাইবেল

Kạkạiyicʼ doe gujukʼgea

¹ Probhu Isor do ińe metadińạ,

² “Israel disạmre oka kạhtukpe menetʼkan ona reakʼ mane do cetʼkana, ‘Apatko jojo darkha joko jomkeda ar hoponkoakʼ ḍaṭa do khuruyen takoa?

³ “Ińakʼ ńutumteń kiriạkʼ kana, Israelre noa katha do ar baṅ roṛogokʼa.

⁴ Jiwetʼ sanam hoṛge ińren kanako, apat ar hopon banarge ińren kanakin. Jãhãegeye kại unigeye gujukʼa.

⁵ “Jãhãe dhorom hoṛ hok ar ṭhikakʼe kạmi khan-

⁶ ar buru cetan reakʼ than boṭkocʼkore bae jom-ńũi khan, se Israelkoren jãhãn boṅga muṭhạnko bae ḍobokʼako khan, ar aḍepaseren hoṛren oṛakʼ hoṛ bae bạṛicʼede khan, se candoteakʼ hoyokʼkantae maejiu sãote bae giticʼmidokʼ khan,

⁷ ar okoehõ bae santaoetʼko bickom rin akatʼ hoṛ do bondhoke ruạṛkatae kan, ar bae kombṛoyetʼkan, menkhan reṅgecʼ hoṛko jomakʼe emakokan ar laṅgaṭkoe kicricʼetʼko,

⁸ ar sudte ṭaka bae emako, behokakʼ khon acʼakʼ tiye akoṭetʼtae ar hoṛko talare hok reakʼe bicạretʼkan,

⁹ ar ińakʼ niạm lekateye calakʼkan ar pạtiạr salakʼ ińakʼ ạn-ạrikoe palonetʼkan, enḍekhan uni hoṛ do sạrigeye dhoromgea; ar khạṭigeye bańcaokʼa. Iń Probhu Isorge noa katha doń meneda.

^10-11 “Menkhan, uni hoṛren do mitʼṭen sasantaoicʼ hopon menaetae. Uni doe mãyãm jokʼroyicʼkan ar eṭakʼ bạṛicʼakʼkoe kạmikan one uniren apat do tishõ onka bae kạmiakatʼ. Uni do buru reakʼ than boṭkocʼkoreye jom-ńũiyetʼkan, ar aḍepaseren hoṛren maejiue bạṛicʼede,

¹² uni do reṅgecʼ ar laṅgaṭkoe santaoetʼko are kombṛoyetʼkan ar bondhok jinisko bae ruạṛkatako kan, uni do boṅgakoe sewawakokante hirkhạwakʼe kạmikan;

¹³ uni do sudte ṭaka dhare emokʼkan ar bạ̃ṛti sude hataoetʼkan, enḍekhan uni hopon do cetʼ jiwetʼe tahena? Uni do jiwetʼ bae tahena. Uni do noa hirkhạwakʼe kạmi akatʼte khạṭigeye gujukʼa. Uni do acʼakʼ gujukʼ lạgitʼ apnarge dạyireye paṛaokʼa.

¹⁴ “Menkhan, uni hoṛren mitʼṭen hopon menaetae, ar uni do acʼren apattetʼakʼ sanam kạiko ńelkatere hõ onka bae kạmikan,

^15-16 uni do buru coṭ reakʼ than boṭkocʼkore bae jom-ńũiyetʼkan ar Israelren boṅgako bae sewawako kan, uni do aḍepaseren maejiu hõ bae bạṛicʼede ar okoehõ bae santaoetʼko, uni do rin iạte jãhãn bondhok bae hataoetʼ, ar bae kombṛoyetʼ ar reṅgecʼ hoṛ jomakʼe emaekan ar laṅgaṭicʼe kicricʼede,

¹⁷ ar reṅgecʼ orecʼko bae santaoetʼko ar jãhãn sudge bae hataoetʼ, menkhan ińakʼ ạn-ạriko lekae calakʼkan ar ińakʼ niạmkoe manaoetʼ, enḍekhan uni do apattetʼakʼ kại iạte bae gujukʼa; bickom khạṭigeye bańcaokʼa.

¹⁸ Menkhan uniren apattetʼ do apnarakʼ kại iạtegeye gujukʼa, ente uni do jor julumkate ṭakae ạdạiyetʼ tahẽkana, boehawakʼ jiniskoe kombṛoyetʼ tahẽkana ar acʼren hoṛko talare behokakʼe kạmiyetʼ tahẽkana.

¹⁹ “Enhõ ape dope meneda, ‘apatakʼ dos iạte hopon do cedakʼ sạjại bae ńama?’ Uni hopon do hok ar dhorom reakʼe kạmi akada ar ińakʼ sanam niạmko joton salakʼe palon akada, onate khạṭige uni doe bańcaokʼa.

²⁰ Okoeye kại uni do khạṭigeye gujukʼa. Hopon do apatakʼ dos iạte sạjại ohoe ńamlea ar apat hõ hoponakʼ dos iạte bae sạjại ocokʼa. Dhorom hoṛ do acʼakʼ dhorom kạmi reakʼ joe ńama ar bạṛicʼ hoṛ do acʼakʼ dusṭạmi reakʼ jogeye ńama.

²¹ Menkhan mitʼṭen dusṭạmi hoṛ do acʼakʼ sanam kại khon ruạṛkate ińakʼ ạn-ạrikoe palonte hok ar dhorom reakʼe kạmi enḍekhan khạṭige uni doe bańcaokʼa, ar bae gujukʼa.

²² Uni okakoe kạmi akatʼ ona do ar bạń disạ dohokʼtaea. Ar dhorom reakʼ okakoe kạmi akatʼ ona iạte uni doe bańcaokʼa.

²³ Dusṭạmi hoṛakʼ gujukʼ iạte cetʼ iń doń kusikʼ kana? Bickom tinre uni do acʼakʼ bạṛicʼakʼ hor khon ruạṛkateye bańcaokʼa unrege iń doń kusikʼa.

²⁴ “Menkhan mitʼṭen hoṛ do acʼakʼ dhorom khon ruạṛkateye kại ar dusṭạmi hoṛko leka bạṛicʼakʼe kạmi enḍekhan uni do cetʼ jiwetʼe tahena? Unre uniyakʼ dhorom kạmi do ar bạń disạitaea. Uni do acʼakʼ bepạtiạr ar kại iạtege khạṭigeye gujukʼa.

²⁵ “Enhõ ape dope menetʼkana, ‘Probhu Isorakʼ hor do ṭhikakʼ baṅkana.’ E Israelko, ańjompe. Ińakʼ hor do cetʼ behok reakʼ hor kana? Ona do baṅa, bickom apeakʼ kangea behok reakʼ hor do.

²⁶ Mitʼṭen dhorom hoṛ acʼakʼ dhorom khon ruạṛkateye kại are gujukʼ, enḍekhan uni do acʼakʼ kại gunạkʼteye gujukʼa.

²⁷ Menkhan mitʼṭen dusṭạmi hoṛ acʼakʼ dusṭạmi khon ruạṛkate hok ar dhorom reakʼe kạmi, uni do acʼakʼ jiwiye bańcaotaea.

²⁸ Uni do acʼakʼ behok reakʼ katha hudiskate ona khone ruạṛ akante khạṭigeye bańcaokʼa, ar bae gujukʼa.

²⁹ Enhõ apepe menetʼ kana, ‘Probhu Isorakʼ hor ṭhikakʼ do baṅkana.’ E Israelko, ińakʼ do cetʼ behok reakʼ hor kana? Behok reakʼ hor do apeakʼ kangea.

³⁰ “Ona iạte E Israelko, iń do ape mimitʼko apeakʼ colon lekateń bicạrpea. Ape do ruạṛpe, ar sanam behokakʼ kạmi khon mon ạcurtape; enḍekhan apeakʼ kại iạte ohope maraolena.

³¹ Apeakʼ sanam ghạṭko ape khoniń sạṅgiń giḍikatapea ar apeakʼ mon ar ontor do nãwãte benao rakabtape. Cedakʼpe gujukʼa?

³² Okoeyakʼ gujukʼtehõ iń do bạń kusikʼ kana. Ape do mon ạcurkate bańcaokʼpe. Iń Probhu Isorge noa katha doń meneda.”