Jeheskel 17 - সান্তালী বাইবেল

Barea pajhaṛ ar mitʼṭecʼ nạ̃ṛĩ

¹ Probhu Isorakʼ noa katha do iń ṭhen sodorena,

² “E manwa hopon, phen hotete Israelko lạiyakome,

^3-4 Probhu Isore meneda, ‘Roṅ beroṅ jhạl jhạl ilte perecʼ phạ̃kṛạ̃kʼante mitʼṭen maraṅ okocʼ pajhaṛ do Lebanonre hecʼkateye apʼena. Ar onḍenakʼ mitʼṭecʼ debdạru dare reakʼ coṭ utạr ḍạr reakʼ bale ḍoge ṭuṅgạcʼketʼte beparikoakʼ disạmte idikate beparikoakʼ nagrahareye rohoekeda.

⁵ Ona tayom uni do disom reakʼ pohako khon mitʼṭecʼ hataokate, gobrao hasareye rohoekeda. Ar aema dakʼ aṛere ona do sũṛũsucʼ dare lekae rohoekeda.

⁶ Ona kahle do harayente alag balag otre pasnao idiyente mitʼṭecʼ nạ̃ṛĩ leka hoyena. Ar ona nạ̃ṛĩ reakʼ bale ḍog do uni pajhạṛ secʼge lawer idiyena, ar ona reakʼ rehetʼko do ot bhitri hạbicʼge. Nonkate ona do mitʼṭecʼ darkha nạ̃ṛĩ hoyena ar ona reakʼ kahleko oḍokente onare sakamkote perecʼena.

⁷ “ ‘Menkhan onḍe do napṛakʼ napṛakʼ phạ̃kṛạ̃kʼan ar aema ilan mitʼṭen eṭakʼicʼ pajhaṛe tahẽkana. Ar ona nạ̃ṛĩ do onḍe khon dakʼ ńam lạgitʼ acʼakʼ rehetʼko ar ḍogko uni pajhaṛ secʼe lawerkeda.

⁸ Aema dakʼ aṛe reakʼ bhage hasare uni doe rohoe ocoakan tahẽkana jemon uni do bale ḍogkoe oḍok ocoyte, joye sapʼ ocoy ar mońj okocʼ nạ̃ṛĩ hoyokʼ.’

⁹ “Am do onkom metakoa, Probhu Isore meneda, ‘uni do cetʼe hara rakabokʼgea? Cetʼ uni do ona reakʼ rehetʼ bae or toda ar ona reakʼ thopako bae geda jemon rohoṛokʼ ar nãwã sagenakʼ sanam sakamko tolmojokʼ? Ar ona reakʼ rehetʼ sudhạ or totʼ giḍikakʼ lạgitʼ ḍher hoṛakʼ jạruṛ do baṅ lagaokʼa.

¹⁰ Uni do mońjteye rohoe lenrehõ jiwetʼ do bae tahena. Ar okaṭakʼ jumireye hara rakapʼlen onḍe uni do puruạ reakʼ hoe iạteye tolmocʼ utạrokʼa.’ ”

¹¹ Ona tayom Probhu Isor do ińe metadińạ,

¹² “Noko huhulkan jạtrenkom metakoa, ‘cetʼ noako reakʼ manetetʼ do bape bujhạueda? Babelren raj do Jerusalemte hecʼkate onaren raj ar onaren mukhiyạkoe hataoketʼkote Babelteye idiketʼkoa.

^13-14 Ona tayom uni do raj gharońjren mitʼ hoṛ tulucʼ bondobose bandhaoketʼte acʼ tabere tahen lạgitʼe kiriạ ocokedea. Uni do disạmren asol asol hoṛko sapʼkateye idiketʼkoa jemon ona rajosṭi do acʼ tabereye doho daṛeakʼ ar ona do daṛeanakʼ alo hoyokʼ menkhan bondobos lekate ṭikạu tahen.

¹⁵ Menkhan uni disạm cakʼlaoyicʼ do sadom ar mitʼṭen maraṅ lạṛhại phạdko ńamko lạgitʼ Misorte goḍete kolkedete Babelren raj upạrteye hulkeda. Uni do cetʼe jitạukʼgea? Okoe nonkanakʼe kạmi uni do cetʼ rehaeye ńamgea? Kiriạ teakʼe rạputʼ lekhan uni do cetʼ rukhiyại ńamgea?

¹⁶ “ ‘Iń Probhu Isorge ińakʼ ńutumte kiriạkateń menetʼkana, Khạṭige uni do uni rajakʼ ṭhạ̃ire, okoe uniye rajkede, one uniyakʼ kathae neṅghaoketʼ, one uniyakʼ bondobose rạputʼketʼ, uni ṭhenge, metakʼme Babelreye gujukʼa.

¹⁷ Pharao do acʼren maraṅ lạṛhại phạdko ar aema gadel hoṛkoante lạṛhạire do bae goṛoaea. pinḍhạko upʼ rakabre ar gherao bhitko benaore aema hoṛko gocʼko lạgitʼ.

¹⁸ Ente uni do bondobose rạputʼakada ar kiriại neṅghao akada. Uni tabere tahen reakʼe bondobosletʼre hõ noae kạmi akatʼte rehay do bae ńama.

¹⁹ “ ‘Iń Probhu Isor do ińakʼ ńutumte kiriạkateń menetʼkana, uni do iń ńutumte kiriạkate onae neṅghao akada ar iń tabere tahen reakʼ bondobose rạputʼ akatʼte ona reakʼ kuṛạiyiń emaea.

²⁰ Iń do uni lạgitʼ jhạliń oḍaoa ar uni do ińakʼ pạsireye sabokʼa. Ar ińreye bepạtiạr akante uni do Babelteń idiyea ar onḍegeń sạjạiyea.

²¹ Uniren lạṛhại phạdkoren soros utạrko do lạṛhạiteko gujukʼa ar sarecʼ lạṛhại phạdko do beṛhaeteko chirchạturokʼa. Ar unrepe baḍae daṛeakʼa, iń Probhu Isorge noa katha doń meneda.’ ”

²² Probhu Isore menetʼkana, “Ińge debdạru dare reakʼ coṭ agal khon bale ḍog hataokate buru muthnireń rohoea.

²³ Israel reakʼ usul buru cetanre ona khon ḍạrko oḍokokʼa ar jo bahakʼa; ar ona do mitʼṭecʼ napae okocʼ debdạru dare hoyokʼa. Joto lekan cẽṛẽko do ona reakʼ ḍạrre tukạko benaoa ar ona reakʼ umulreko tahena.

²⁴ Onate ṭạnḍi reakʼ sanam darekoko baḍae daṛeakʼa, iń Probhu Isorge usul dare doń pheḍle ocoya ar pheḍle dare doń usula. Ińge hạriạṛ darekoń rohoṛ ocoya ar rohoṛ dare doń jiwetʼ ocoya. “Iń Probhu Isorge noa katha doń meneda ar iń do onań onkaea.”