Jeheskel 16 - সান্তালী বাইবেল

Obiswạsi Jerusalem

¹ Probhu Isor do ińe metadińạ,

² “E manwa hopon, Jerusalem do acʼakʼ hirkhạwakʼko kạmi reaṅ baḍae ocoyem.

³ Am dom mena, Probhu Isor do Jerusaleme metaekana, ‘amakʼ oṛakʼ ar amakʼ janam ṭhạ̃i do Kananren hoṛkoakʼ disạm khonakʼ kana; amren ạpum doe hoyokʼ kana Amori ar eṅgam do Hitti hoṛge.

⁴ Ar oka hilokʼem janamlen enhilokʼ amakʼ bukạ do bako getʼletʼtama, dakʼte hõ bako ạrupʼ saphaletʼmea, hoṛmore buluṅ hõ bako gasaoatʼme tahẽkana ar kicricʼte hõ bako oyoletʼmea.

⁵ Okoe hõ mãyãte bako beṅgetʼatʼme tahẽkana ar amre noako cekae lạgitʼ okoeyakʼ monre hõ daya do baṅ hecʼatʼko tahẽkana. Bickom ṭạnḍiregem giḍi ocoakan tahẽkana, ente oka hilokʼem janamlen enhilokʼ am dom hirkhạ ocolena.

⁶ “‘Iń do am aṛeteń parom calakʼkan tahẽkan jokhecʼ amakʼ mãyãmrege khạṛupạṭukʼ kaniń ńelketʼmea. Ar unreń hukumatʼmea jemon amakʼ mãyãmrege jiwetʼem tahen.

⁷ Am do khet reakʼ cara lekageń hara ocoketʼmea. Arem hara juạnena, amakʼ bạ̃skin hõ harayena, upʼ hõ harayentama, menkhan am do uluṅge ar begor kicricʼtem tahẽkana.

⁸ “ ‘Iń do am aṛeteń parom calakʼkan tahẽkanre am secʼ beṅgetʼkateń ńelkeda, amakʼ do dulạṛokʼ reakʼ okte hoyakantama; ona iạte ińakʼ kicricʼ reakʼ hĩs am cetanreń dapalketʼte amakʼ uluṅiń esetʼketʼtama. Iń do am ṭheniń kiriạyena ar am tulucʼ baplakʼ reakʼ iń bondoboskeda, ar onate ińrenem hoyena.

⁹ Iń doń umketʼmea ar am khon mãyãmiń ạrupʼ giḍikada ar hoṛmore sunumiń ojokʼatʼmea.

¹⁰ Ar likhon goṛhon kicricʼteń oyokatʼmea ar jaṅgare do takʼhas harta reakʼ mońj okocʼ panahiń horokʼatʼmea. Iń do mĩhĩ musnạ kicricʼteń bedhaoketʼmea ar lumạṅ sutạm reakʼ kicricʼteń bandekatʼmea.

¹¹ Gohonakoteń sajaoketʼmea; tire sakom, hoṭokʼre mala,

¹² mũre mạkṛi, luturre pagra ar bohokʼre do napae okocʼ mitʼṭecʼ mukuṭiń horokʼakʼmea.

¹³ Nonkate am do sona ar rupạtem saj ocoyena; amakʼ kicricʼko do mĩhĩ musnạ ar lumạṅ reakʼ likhon goṛhon kicricʼko tahẽkana. Amakʼ jomakʼ do mĩhĩ moeda, dumur rasa ar jạitun reakʼ sunumge tahẽkana. Am do ạḍitetʼem mońjena ar rạni hudạm ńamkeda.

¹⁴ Amakʼ mońj iạte amakʼ ńutum do boṅgan hoṛ jạtrenko talare pasnaoentama, ar am sajketʼme reakʼ purạ mahttoge ińakʼ tahẽkana. Iń Probhu Isorge noa katha doń meneda.

¹⁵ “ ‘Menkhan am dom namḍakente amakʼ mońjtetʼrem bhorsayena arem laṭghaṭkeda. Ar jãhãege am aṛeteko parom calakʼkan tahẽkan uni sãotegem laṭghaṭetʼ tahẽkana ar amakʼ mońjtetʼ do uniyakʼge hoyokʼkan tahẽkana.

¹⁶ Am do amakʼ kicricʼkom hataoketʼte onol bonol boṭkocʼ thankom sajao benaoana ar onakorem laṭghaṭkeda. Menkhan amakʼ onkan kạmi do lek baṅ tahẽkantama.

¹⁷ Ińakʼ sona-rupạte benaoakʼ gohnako, okaṭakʼ iń ematʼme tahẽkan, ona napae okocʼ gohnakote am lạgitʼ herel boṅga muṭhạnem benaoana ar onako sãotem loṭghuṭiyetʼ tahẽkana.

¹⁸ Am do likhon goṛhon kicricʼkom horokʼetʼ tahẽkana ar onko boṅga samaṅre ińakʼ sunum ar dhupem jeretʼetʼ tahẽkana.

¹⁹ Amakʼ jomakʼ lạgitʼ okaṭakʼ mĩhĩ moeda, jạitun sunum ar dumur rasakoń ematʼme tahẽkan ona do onko samaṅre jut so mosola lekam dohoyetʼ tahẽkana, arem onka idikeda. Iń Probhu Isorge noa katha doń menetʼ kana.

²⁰ “ ‘Amren okoe hopon ar hoponerako iń lạgitʼ kukhirem janametʼko onko do jomakʼ lekate boṅgako ńutumtem samaṅ akatʼkoa. Amakʼ loṭghuṭi reakʼ kạmi do cetʼ ḍherge baṅ tahẽkana?

²¹ Am do arhõ amren hopon ar hoponerako boṅga muṭhạnko ńutumtem teṅgenketʼkote seṅgelrem khadleketʼkoa.

²² Ar amakʼ sanam hirkhạwakʼkote ar amakʼ laṭghaṭkote amakʼ kuṛi jokhecʼ reakʼ din do bam disạleda, bạṛicʼakʼ kạmi ar amakʼ loṭghuṭi talare am do amakʼ gidrạ pạṛiạ reakʼ katha hõ bam disạleda one tinre uluṅge ar eken hoṛmo apnarakʼ mãyãm cetanrem khạṛupạtu baṛaekan tahẽkan.

^23-24 “ ‘Hae, hae am do! Amakʼ noako dusṭạmi tayom hõ apnar lạgitʼ nagraha reakʼ mitʼke mitʼ phaelao ṭhạ̃ikore mitʼṭenkate boṅga muṭhạnem banao akawana.

²⁵ Dobạṭiạkore hõ boṅga muṭhạnko benaokate amakʼ mońjtetʼ do hirkhawakʼgem hoyoco akada. Ar jãhãege am aṛeteye parom senakan unige amakʼ hoṛmom danaekan tahẽkante amakʼ loṭghuṭi reakʼ kạmim ḍher akatʼtama.

²⁶ Amren sor peṛa Misorrenko sãote hõm lạṭghaṭ akada ar amakʼ loṭghuṭi reakʼ kạmim ḍher idiyetʼte ińem khĩs ocoakadińạ.

²⁷ Ona iạte iń do am upạrte ińakʼ tiyiń tiyạrketʼte amakʼ sompottiń ạdhi akatʼtama. Amren bạiriko, metakʼme Philisṭikoren hoponerako, okoe do amakʼ hirkhạwakʼ sobhab iạtem lajao ocoakan onkoakʼ tireń soprot akatʼmea.

²⁸ Asurrenko sãote hõm loṭghuṭi akada, ente bam tirpitokʼkan tahẽkana; menkhan am do enrehõ bam tirpitlena.

²⁹ Ona tayom hõ am do amakʼ laṭghaṭem ḍher idiketʼtama ar bạnijkoakʼ disạm Babel sãote hõm laṭghaṭkeda, menkhan enhõ bam tirpitlena.

³⁰ “ ‘Iń Probhu Isorgeń meneda, am dom nicạṛ monan kana, ente mitʼṭen besorom kusumbi ạimại lekage noakom kạmikana.

³¹ Am do kulhi mucạtʼ dobạṭiạkore than ghuṭukom benao joṅkana ar loṭghuṭi kạmikate hõ amakʼ kuṛại dom nihạ̃t giḍikakʼ kana.

³² Am dom laṭghaṭicʼ era kana, am do amren jãwãe khon bin oprom hoṛge ḍherem kusiyako kana.

³³ Sanam kusumbikoge kuṛại doko ńamgea, menkhan am do amren sanam dulạṛiạko kuṛạiyem emako kana. Am sãote laṭghaṭ lạgitʼ jemon sanam ṭhạ̃i khon am ṭhenko hijukʼ ona iạte onko do ghusem emako kana.

³⁴ Onatege eṭakʼ kusumbiko khon am dom judạgea; am tulucʼ laṭghaṭ lạgitʼ cele hõ bako hecʼam kana. Ente am dom judạgea, ar ṭaka do bam hataoeda menkhan amge ṭakam emako kana.’ ”

³⁵ E laṭghaṭicʼ maejiu, Probhu Isorakʼ katha ańjomme.

³⁶ Probhu Isore menetʼkana, “Laṭghaṭ kạmire am do amakʼ lajaoakʼem udukʼ akokante amakʼ uluṅ do amren dulạṛiạko ṭhenem sodoretʼkana. Amakʼ sanam hirkhạwakʼ boṅga muṭhạn lạgitʼ ar onko ńutumte amren hopon ar hoponerakoakʼ oka mãyãmem emakatʼ,

³⁷ ona iạte amren onko sanam dulạṛiạkoń jarwakoa one okoeko tulucʼem rạskạ mitʼlen. One okoeyem dulạṛletʼko tahẽkan ar okoeyem hirkhạwako kan tahẽkan onko sanamkoń jarwakoa. Iń do beṛhae khon am upạrteń jarwakoa ar onko samaṅre amakʼ kicricʼ iń bhạnduṛtama jemon onko do amakʼ lajaoteakʼko ńel daṛeatam.

³⁸ Okoe maejiuko laṭghaṭetʼkan ar okoe mãyãmko joroyetʼkan onko okaṭakʼ sạjạiko ńam am hõ ona sạjạigeń emama. Ińakʼ edre ar mon reakʼ jaljalao iạte am do gujukʼ sạjạiyiń emama.

³⁹ Ona tayom do amren dulạṛiạkoakʼ tireń soprotmea; onko do amren boṅga muṭhạnkoakʼ duṛupʼakʼko marao giḍikakʼa. Onko do amakʼ kicricʼko bhạnduṛtama ar amakʼ mońj mońj gohnako hataoa ar am do uluṅ ar laṅgaṭgeko bạgi oṭowama.

⁴⁰ Ar am upạrte mitʼ dol hoṛko uskạukoa; ar onko do dhiriteko tiń gocʼmea ar onkoakʼ tarwaṛeteko kaṭra kuṭrạmea.

⁴¹ Onko do amakʼ oṛakʼ-duạrko jeredtama ar ḍher maejiuko samaṅre amiń sạjạimea. Nonkate iń do amakʼ laṭghaṭiń mokoń ocoytama; ar amren dulạṛiạko do ṭaka poesa ar bam emakoa.

⁴² Ona tayom am cetanre ińakʼ edre ar mon reakʼ khĩs do thirokʼtińạ. Ariń thirokʼa, ar bạń edrekʼa.

⁴³ “Am do amakʼ kuṛi pạṛiạ reakʼ dinko bam disạleda, bickom noako kạmikate ińem ạṛis ocokedińạ; ona iạte ińhõ amakʼ kuṛạiyiń emkatama. Amakʼ eṭakʼ sanam bạṛicʼakʼ kạmi sãote noa hirkhạwanakʼ kạmi hõ cetʼ bam juṭucʼ akawada?

⁴⁴ “Hoṛko do am reaṅ noa kathako mena, ‘Eṅgattetʼ cetʼleka hoponera hõ onkage.’

⁴⁵ Am do uni eṅgat hoṛren hoponera kanam, okoe acʼren jãwãe ar gidrạkoe hirkhạwatʼko; ar am do onkan kuṛi boeharen kuṛi boeha kanam, okoe ạkinren jãwãe ar gidrạko kin hirkhạwatʼko. Eṅgam do Hitti maejiue tahẽkana ar ạpum do Amori hoṛge.

⁴⁶ Ar ạjim do Samariạ kanae; one uni am khon utạr secʼre acʼren hoponerako sãoteye tahẽnkan. Amren bokom kuṛi Sodom; one uni do acʼren hoponerako sãote dạkhinreye tahẽnkan.

⁴⁷ Enrehõ am do unkinakʼ horkore taṛamte ar unkinakʼ hirkhạwakʼko leka kạmite do bam tirpitlena, bickom eken thoṛa ghạṛitege amakʼ sanam horkore unkin khon hõ bạ̃ṛtigem kharapena.

⁴⁸ Ińakʼ katha do sạrikana je, am ar amren hoponerako okaṭakʼpe kạmiakatʼ amren boeha kuṛi Sodom ar uniren hoponerako do tishõ onka bako kạmi akada. Iń Probhu Isorge noa katha doń meneda.

⁴⁹ “Amren boeha kuṛi Sodomakʼ do noa kại tahẽkana, uni ar hoponerako do bạḍại tahẽkantakoa, ente onko do ḍher jomakʼ tahẽkantakoa ar khạtirjomako girobasokʼkan tahẽkana, menkhan onko do reṅgecʼ ar laṅgaṭ hoṛ bako goṛoako kan tahẽkana.

⁵⁰ Onko do bạḍạite perecʼko ar iń samaṅre hirkhạwakʼko kạmikan tahẽkana. Onate am cetʼ lekam ńeletʼkan onkage onko hõń sạṅgiń akatʼkoa.

⁵¹ Am okakom kại akatʼ ona reakʼ adha hõ Samariạ do bae onka akada. Am do unkin khon hõ ḍher hirkhạwakʼ kạmikom kạmi akada. Ar amem kạmikan ńelte amren boeha kuṛikin do dhoromkin hudisokʼ kana.

⁵² Amakʼ be-sonman do amge asen baṛae hoyokʼtama, ente amakʼ kạmiko do amren boeha kuṛikin secʼ gohae emetʼkana. Amakʼ kại do unkin khon hõ ḍher hirkhạwanakʼ kante am khon dhoromgekin hudisokʼkana. Onate am do lajaokʼme ar amakʼ be-sonman asen baṛaeme, ente am do amren boeha kuṛikin dhorom mentem sạbud ocoyetʼkinạ.

⁵³ “Iń do Sodom ar uniren hoponerako, Samariạ ar uniren hoponerako ar onko sãote amakʼ dosa hõ pạhil lekań ạcur ruạṛa.

⁵⁴ Onate am do amakʼ bemanotem dipil baṛaea ar amem kạmi akatʼ sanamakʼ iạtem lajao ocokʼa.

⁵⁵ Ar amren boeha kuṛikin Sodom ar uniren hoponerako do akoakʼ pạhil dosateko ruạṛokʼa ar Samariạ ar uniren hoponerako hõ akoakʼ lahateakʼ dosateko ruạṛokʼa.

⁵⁶ Am do amakʼ bạḍại reakʼ dinre amren boeha kuṛi Sodom dom landa-dhutʼaekan tahẽkana;

⁵⁷ ar unre amakʼ dusṭạmiko do baṅ sodor akan tahẽkantama. Ńitokʼ Aramren hoponerako ar uni aḍepaserenko, Philisṭi hoponerako, metakʼme am beṛhaeten okoe do amko hirkhạwamkan onko jotoge amko landa-dhutʼam kana.

⁵⁸ Am do amakʼ nilạjiạ ar amakʼ hirkhạwakʼ reakʼ kuṛạigem dipil baṛaea. Iń Probhu Isorge noa doń meneda.

⁵⁹ “Amakʼ kạmi lekage am sãoteń beohara, ente ińakʼ bondobosem rạputʼ akatʼte ińakʼ kiriạwakʼem nihạ̃t giḍi akada.

⁶⁰ Enhõ amakʼ thoṛa umerre am lạgitʼ oka bondobosiń doholetʼ ona doń disạigea ar am lạgitʼ mitʼṭecʼ jaejug reakʼ bondobosiń bandhaoa.

⁶¹ Amren hoponera lekate am khon maraṅicʼ ar am khon huḍińicʼ boeha kuṛikiniń emama ar am do unkinem ataṅkinạ, unkin do amakʼ bondobos talare bạnukʼkinạ. Unre am do amakʼ colon reakʼ katham disạiya arem lajaokʼa.

⁶² Am lạgitʼ ińakʼ bondobosiń bạisạua, arem baḍae daṛeakʼa, ińkangeạń Probhu Isor do.

⁶³ Iń do tinre amakʼ sanam behokakʼ iń ikại tama unre am do onako behok reakʼ katha disạitem lajaokʼa ar amakʼ bemanot iạte tishõ moca do bam jhijtama. Iń Probhu Isorge noa katha doń meneda.”