Jeheskel 14 - সান্তালী বাইবেল

Boṅga sewawako iạte Israelkoakʼ sạjại

¹ Israelren adom murubbiko do iń ṭhen hecʼkate iń samaṅreko duṛupʼena.

² Unre Probhu Isorakʼ niạ katha do iń ṭhen sodorena,

³ “E manwa hopon, noko hoṛ do akoakʼ ontorre boṅga muṭhạnko bạisạu akawante kạire ńurokʼ lekan jinis ako samaṅreko dohoakada. Ona iạte iń ṭhen jãhãnakʼ reakʼko kulijoṅ khan onko do cetʼge bạń roṛ ruạṛakoa.

⁴ Onate onkom metakoa, Probhu Isore meneda, ‘jãhãe Israel acʼakʼ ontorre boṅga muṭhạn bạisạu iạte kạire ńurokʼ lekan jinis apnar samaṅreye dohoy ar ona tayom nạbi ṭhene hijukʼ, enḍekhan iń Probhu Isorge uniren ḍher boṅga muṭhạnko iạteń roṛ ruạṛaea.

⁵ Israelkoakʼ ontor ńam ruạṛ lạgitʼge iń do noań onkaea, ente onko jotoge akoren boṅga muṭhạnko lạgitʼ ińko bạgi akadińạ.

⁶ “Ona iạte am do onkom metakoa, Probhu Isore menetʼ kana, ‘mon ạcurtape. Aperen boṅga muṭhạnko khon ruạṛokʼpe ar hirkhạwakʼ kạmiko bạgiype.

⁷ Jãhãe Israel hoṛ se Israel disạmre girobasokʼ kan jãhãe bidisiạ hoṛ iń ṭhen khone begarokʼ ar acʼakʼ monre boṅga muṭhạne bạisạute kạire ńurokʼ lekan jinis uni samaṅreye dohoy ar ona tayom iń ṭhen kulijoṅ lạgitʼ jãhãe nạbi ṭhene hijukʼ, enḍekhan iń Probhu Isorge uni doń roṛ ruạṛaea.

⁸ Iń do uni hoṛ upạrteń teṅgona ar uni do mitʼṭecʼ cinhạ ar mitʼṭecʼ kạhtukgeń hoeocoyea. Ar ińren hoṛko tala khon uniń ocokʼ giḍikaea. Ar unrepe baḍae daṛeakʼa, ińkangeạń Probhu Isor do.

⁹ “ ‘Ar uni nạbi jãhãnakʼe roṛ ruạṛae enḍekhan baḍaeme, iń Probhu Isorge roṛ ruạṛ emokʼ lạgitʼ uniń bulạu akadea. Ona tayom uni nạbi upạrte tiyiń tultińạ ar ińren hoṛ Israelko tala khoniń marao giḍikaea.

¹⁰ Unkin bana hoṛge behok reakʼ sạjạikin ńama; uni nạbi ar solha hatao lạgitʼe hecʼakan hoṛ banarge soman sạjạikin ńama.

¹¹ Unre Israelko do iń ṭhen khon bạṛicʼ horte bako calakʼa ar onkoakʼ sanam ghạṭkote apnar do bako besaphakʼa. Onko do ińren hoṛko hoyokʼa ar iń do onkoren Isorgeń hoyokʼa. Iń Probhu Isorge noa katha doń meneda.’ ”

Noha, Daniel ar Job

¹² Ona tayom Probhu Isor do ińe metadińa,

¹³ “E manwa hopon, jãhã disạmren bepạtiạrakʼko kạmite iń reaṅko kại, ar iń do onko upạrte ińakʼ tiyiń tiyạrte ona lạgitʼ piṭhạ reakʼ jogao iń bond ocoy, ar onate akaliń kolte manwako ar janwarkoń maraoko,

¹⁴ ar onko pene hoṛ, metakʼme Noha, Daniel ar Jobge, ona talareko tahen, enḍekhan, onko hõ akoakʼ dhorom iạte eken akoakʼ jiwigeko rukhiyạ daṛeketakoa. Iń Probhu Isorge noa katha doń meneda.

¹⁵ “Iń do ona disạmre bir janwarkoń dãṛã ạcur ocoko ar onko do onako jarkhar ar ona do nonkan ujạṛakʼ hoyokʼ, onko janwarko iạte onkate cele hõ bako parom sen daṛeakʼ,

¹⁶ enḍekhan iń ńutumteń kiriạkʼ kana, onko pene hoṛ onḍeko tahẽlenre hõ onko do akoren gidrạko hõ ohoko rukhiyạ daṛelekoa. Onko do eken apnartetʼko rukhiyạ daṛekokʼa menkhan disạm do ujạṛ utạrakʼ hoykokʼa.

¹⁷ “Iń do ona disạm upạrte tarwaṛe ạgukateń men, ‘disạm reakʼ sanam ṭhạ̃ire lạṛhại hoyokʼma,’ ar iń do onaren hoṛko ar janwarkoń gocʼko.

¹⁸ enḍekhan iń ńutumteń kiriạkʼ kana, ona talare onko pene hoṛko tahẽlenre hõ onko do akoren gidrạko hõ ohoko rukhiyạ daṛelekoa. Onko do eken apnartetʼko rukhiyạ daṛekokʼa.

¹⁹ “Ar iń do ona disạm talare mahamạriń kol ar onaren manwa ar janwarkoń gocʼ cabakote ińakʼ edre onko cetanreń dultiń,

²⁰ enḍekhan iń ńutumte kiriạkateń meneda, Noha, Daniel ar Jobge ona talareko tahẽlenre hõ onko do akoren hopon se hoponerako hõ ohoko rukhiyạ daṛelekoa. Onkoakʼ dhorom iạte onko do eken apnartetʼgeko rukhiyạ daṛekokʼa.

²¹ “Ńitokʼ iń Probhu Isorgeń menetʼ kana, iń do tinre Jerusalemren manwa ar janwarko gocʼko lạgitʼ uni upạrte lạṛhại, akal, bir janwarko ar mahamạri noa ponea botoranakʼ sạjạiyiń kola unre tinạkʼ artetʼ bạṛicʼ hoyokʼa!

²² Enhõ onḍe adomko do jiwetʼko tahena ar onko doko oḍok ocokʼa. Onko do ape ṭhenko hijukʼa, ar tinre onkoakʼ bạṛicʼ sobhab ar kạmikope ńela unre Jerusalem cetanre muhiniń ạguiyre ape do jiwi raṛecʼpe ńama.

²³ Onkoakʼ sobhab ar kạmiko ńelte ape do jiwi raṛecʼpe ńama arpe bujhạu daṛeakʼa, ạuṛiyakʼte iń do jãhãnakʼ bạń cekaya mente. Ar iń Probhu Isorge noa katha doń menetʼkana.”