Jeheskel 13 - সান্তালী বাইবেল

Eṛe nạbiko upạrte nạbi katha

¹ Ona tayom Probhu Isor do ińe metadińạ,

² “E manwa hopon, Israelren okoe nạbiko do ńitokʼ kathako roṛetʼkan onko upạrte am do nạbi lekage katha roṛme. Okoe akoakʼ mongoṛa katha lekako nạbiyetʼkan onkom metakoa jemon onko do Probhu Isorakʼ kathako ańjom.

³ Probhu Isore meneda, ‘Hae, onko bebuj nạbiko do, okoe do jãhãn dorson baṅ ńamkate hõ ạuṛiyakʼte nạbi kathako roṛetʼkan.

⁴ E Israel, amren nạbiko do dhaṅdhaser talare toyo lekan kanako.

⁵ Onko do Israel jạtrenkoakʼ pạcri bhit jut aroe lạgitʼ onḍe do bako rakapʼ akana jemon Probhu Isorakʼ dinre lạṛhại oktere ona do kajakte teṅgo akae tahen.

⁶ Onkoakʼ dorson do eṛegea ar onkoakʼ gona-poṛa hõ sạriyakʼ do baṅkana. Onkoko meneda, iń do noa kathań meneda, onko do bạń kol akatʼkoa; enhõ onko doko asokʼkana onkoakʼ katha do purạukʼtakoa.

⁷ Onko do cetʼ eṛe dorson bako ńeleda ar eṛe gona-poṛa bako kạmiyetʼ kana? Onko doko meneda, iń do noa kathań meneda, menkhan iń do bạń roṛakada.

⁸ “ ‘Iń Probhu Isorgeń meneda, onkoakʼ eṛe katha ar eṛe dorson lạgitʼ iń do onko upạrte minạńa.

⁹ Ińakʼ ti do onko nạbiko upạrte rakabokʼa okoe do eṛe dorsonko ńeletʼkan ar eṛeyakʼko gona-poṛayetʼkan. Ińren hoṛkoakʼ somajre onkoakʼ ńutum do baṅ tahena, ar Israel disạmre hõ onko do bako ruạṛ hecʼ daṛeakʼa. Ar unrepe baḍae daṛeakʼa, iń kangeạń Probhu Isor do.

¹⁰ “ ‘Tinre jãhãn suluk baṅ tahena unre nạbikoko mena, suluk menakʼgea, ar nonkate onko do ińren hoṛko bạṛicʼ horteko idikoa. Onko do hoṛko gathao rakapʼ akatʼ nonkan pạcri bhit cetanre cunteko potao akada one oka do kajakakʼ baṅkan.

¹¹ Ona iạte okoe noako kạmikan onkom metakoa, ona pạcri bhit do lạnduṛokʼa. Jhar jhare daga ar lạṭu lạṭu arelko ńurokʼa ar birbão hoeko hijukʼa.

¹² Ona pạcri bhit tinre lạnduṛ ńurokʼa unre hoṛko do cetʼ bako kulikoa, okaṭakʼ pạcri bhit do cunteko potao esetʼletʼ ona cun do okayena?

¹³ “ ‘Iń do edrete ińakʼ birbão hoeyiń hoeocoya. Ińakʼ edre ar khĩste lạṭu lạṭu arel ar jhar jhar dakte onań marao giḍikakʼa.

¹⁴ Nạbiko okaṭakʼ pạcri bhit do cunteko potao esetʼletʼ ona do rạputʼkate hasa sãoteń milạu gotʼkakʼa jemon ona reakʼ rehetʼ do oṭakʼge tahen. Ar ona rạputʼ ńurokʼ jokhecʼ onko hõ ona talareko marao utạrokʼa. Ar unreko baḍae daṛeakʼa, iń kangeạń Probhu Isor do.

¹⁵ Ona pạcri bhit ar ona okoe cunteye potao esetʼ akatʼ onko cetanre iń do ińakʼ edreń dula. Iń do hoṛkoń metakoa, ona pạcri bhit hõ bạnukʼa ar okoe cunte onako potaoletʼ tahẽkan,

¹⁶ metakʼme Israelren onko nạbiko okoe do Jerusalemren hoṛko ṭhenko roṛletʼ ar suluk baṅ tahẽkanrehõ suluk reakʼ dorsonko ńelletʼ onko hõ bạnukʼkoa. Iń Probhu Isorge noa katha doń meneda.’ ”

¹⁷ Ona tayom Probhu Isor do ińe metadińạ, “E manwa hopon, am jạtren okoe maejiuko do nạbi lekate akoakʼ benaoakʼ kathako roṛetʼkan ńitokʼ onko upạrte teṅgokʼme. Am do onko upạrte noa katha roṛme,

¹⁸ Probhu Isor doe menetʼkana, ‘Hae maejiuko! Ape ma hoṛkoakʼ tire lạgitʼ tạbijko ar bohokʼ ṭuṭuri lạgitʼ eṭakʼ eṭakʼ jokha reakʼ kicricʼkope benaoeda jemon hoṛkope bos daṛeako. Ape do cetʼ ińren hoṛkoakʼ jiwipe hataoetʼtakoa ar apnarakʼ jiwi dope rukhiyạkana?

¹⁹ Mitʼ bar cuputʼ jao ar mitʼ bar goṭecʼ piṭhạ lạgitʼ ape do ińren hoṛko samaṅre ińpe besonot akadińạ. Ińren hoṛko, okoe do eṛe kathako ańjometʼ, onko ṭhen eṛe katha roṛkate okoe do gujukʼ lekko baṅkan onkope gocʼ ocoakatʼkoa ar okoe jiwetʼ tahen lekko baṅkan onko do jiwetʼpe doho akatʼkoa.

²⁰ “ ‘Ona iạte iń Probhu Isorgeń menetʼ kana, ape okoe do tạbijkote cẽṛẽ leka hoṛkope sapʼetʼko iń doń onko upạrte minạńa. Apeakʼ ti khon onakoń topakʼ giḍikakʼa. Ar cẽṛẽ leka okoepe sapʼetʼko onko doń aṛakʼkakoa.

²¹ Apeakʼ bohokʼ reakʼ ṭuṭuri kicricʼkoń oṛejtapea ar apeakʼ ti khon ińren hoṛkoń bańcaokoa; onko do apeakʼ tire sikạr leka ar do bako sabokʼa. Ar unrepe baḍae daṛeakʼa, iń kangeạń Probhu Isor do.

²² Okoe dhorom hoṛko bạń duk ocoakawatʼko, ape do eṛe kathate onkope as chuṭạu ocoakatʼkoa ar dusṭạmi hoṛ dope cehao akatʼkoa jemon onko do jiwi bańcaotako lạgitʼ bạṛicʼ hor khon aloko ruạṛ hijukʼ.

²³ Ona iạte eṛe dorson do bape ńela ar gona-poṛa hõ bape gona-poṛaoa. Apeakʼ ti khon ińren hoṛkoń bańcaokoa. Unre apepe baḍae daṛeakʼa, iń kangeạń Probhu Isor do.’ ”