Jeheskel 12 - সান্তালী বাইবেল

Nạbi do asraye ńamakatʼ hoṛ leka

¹ Tayomte Probhu Isorakʼ noa katha do iń ṭhen hecʼena,

² “E Manwa hopon, am do mitʼṭen huhulkan jạtrenko talarem girobasokʼ kana. Onko do mẽtʼ menakʼgetakoa menkhan bako ńeńel kana, lutur menakʼgetakoa menkhan bako ańjomeda, ente onko do mitʼṭen huhulkan jạtren kanako.

³ “Onatege E manwa hopon, am do sạṅgińtem bondi idi ocokʼkana ar onkage amakʼ jinisko hõ samṭaotam ar onkoakʼ mẽtʼãhã samaṅte siń marsalrege oḍokokʼme; ar okare menam onḍe khon eṭakʼ jaegate calakʼme. Pasecʼ onko do mitʼṭen huhulkan jạtren hoṛ kanako menteko bujhạu daṛeakʼa.

⁴ Sạṅgińte bondi idi ocokʼ lạgitʼ amakʼ samṭaoakʼ jinisko do siń marsalrege onkoakʼ mẽtʼãhã samaṅtegem oḍok idiya. Ona tayom ạyupʼ jokhecʼ sạṅgińte bondi idi ocokʼ leka onkoakʼ mẽtʼãhã samaṅtem oḍokokʼa.

⁵ Onkoakʼ mẽtʼãhã samaṅrege pạcri bhit bhugạkʼkate ona talate jiniskom oḍok idiya.

⁶ Jinisko do onkoakʼ mẽtʼãhã samaṅrege amakʼ tarenrem ladejoṅa ar ńutrege onakom oḍok idiytama. Amakʼ mẽtʼãhã dom betʼ esetʼkatama jemon amakʼ disạm reakʼ ot alom ńelńam, ente Israel jạtrenko lạgitʼ am do mitʼṭecʼ cinhạ lekageń hoyocoakatʼmea.”

⁷ Iń okań hukum ocoyen ona lekage iń doń kạmikeda. Sạṅgińte bondi idi ocokʼ leka ińakʼ jinisko do siń marsalregeń oḍok ạgukeda. Ona tayom ạyupʼ jokhecʼ tite pạcri bhitiń la bhugạkʼkeda. Ar onkoakʼ mẽtʼãhã samaṅrege ińakʼ jinisko do tarenre ladekateń mohnḍayena.

⁸ Setakʼ jokhecʼ Probhu Isor do ińe metadińạ,

⁹ “E manwa hopon, huhulkan Israel jạtrenko do cetʼ bako kuliletʼmea, ‘cetʼem ceka kana mente?’

¹⁰ Am do onkom metakoa, Probhu Isore meneda, ‘Niạ cinhạ do Jerusalemren disạm cakʼlaoyicʼ ar onḍenko Israelko lạgitʼ kana.’

¹¹ Am do onkom metakoa, onko ṭhen do mitʼṭecʼ cinhạ kanam mente. Am cetʼ lekam cekaketʼ, onkore hõ onkage hoyokʼa. Onko do bondikate sạṅgiń disạmteko idi ocokʼa.

¹² “Onko talaren disạm cakʼlaoyicʼ do ńutre acʼakʼ jinisko tarenre ladekateye oḍokokʼa ar pạcri bhit do kholao bhugạgokʼa jemon ona talateye oḍok hecʼ daṛeakʼ. Uni do acʼakʼ mẽtʼe betʼ esetʼtaea jemon acʼakʼ disạm reakʼ ot bae ńelńam.

¹³ Iń do uni lạgitʼ jhạliń oḍaoa ar uni do ińakʼ pạsireye sabokʼa. Ar uni do Babelrenkoakʼ disạmteń idiyea, menkhan ona do bae ńela; uni do onḍegeye gujukʼa.

¹⁴ Uni beṛhaete sanamko, metakʼme uniren kạmiyạko ar uniren sanam lạṛhại phạdko do beṛhaeteń chirchạturkoa ar tarwaṛeteń lagakoa.

¹⁵ “Iń do tinre jạt jạtrenko ar disạm talareń chirchạturkoa unre onko doko baḍae daṛeakʼa ińkangeạń Probhu do Isor.

¹⁶ Menkhan onko talaren adom hoṛ do lạṛhạite, akalte ar mahamạri reakʼ ti khoniń bańcaokoa, jemon jãhãregeko calakʼ onḍege jạt jạtrenko talare akoakʼ joto hirkhạwakʼ kạmi reakʼ kathako aṅgoc. Onate onko doko baḍae daṛeakʼa, ińkangeạń Probhu Isor do.”

¹⁷ Ona tayom Probhu Isor do arhõe metadińạ,

¹⁸ “E manwa hopon, am do botorte thar tharaokʼ tulucʼ jom ar ńũiyme.

¹⁹ Ar disạmren hoṛkom metakoa, Israel disạm reakʼ Jerusalemren hoṛko reaṅ Probhu Isor doe meneda, ‘onko do botor botorte akoakʼ jomakʼko joma ar nisạsate dakʼko ńũiya, ente onḍenko hoṛkoakʼ santao khạtirte onkoakʼ disạm do ujạṛokʼa.

²⁰ Hoṛte perecʼ nagrahako do dhaṅdhaserokʼa ar disạm do ujạṛokʼa. Ar unrepe baḍae daṛeakʼa, ińkangeạń Probhu Isor do.’ ”

²¹ Ona tayom Probhu Isor do ińe metadińạ,

²² “E Manwa hopon, Israel disạmre noa do cetʼ lekan katha kana, ‘din do parom calakʼ kana ar mimitʼ dorsonko do ạuṛiyakʼ hoyokʼ kana?’

²³ Onkom metakoa Probhu Isore menetʼ kana, ‘ińge ona calao hijukʼkan katha doń bạtil gotʼkakʼa; Israelakʼ ona katha do ar okoehõ bako roṛa.’ Ona bodolte onkope metakoa, ‘din seṭer akana, ńitokʼ do mimitʼ dorsonko sạriyagokʼa.

²⁴ Israelren hoṛko talare eṛe dorson ar kusi ocokʼ reakʼ gona-poṛa do ar baṅ tahena.

²⁵ Unre iń Probhu Isor okaṭakʼ iń roṛ onage purạukʼa, ar baṅ bilomokʼa. E huhulkan jạtrenko, iń okań roṛetʼ ona do apeakʼ okteregeń purạu ocoya. Iń Probhu Isorge noa katha doń meneda.’ ”

²⁶ Tayomte Probhu Isor do ińe metadińạ,

²⁷ “E manwa hopon, Israelkoko meneda, am okaṭakʼ dorsonem ńelakatʼ ona do ńitʼ khon ḍher bochor tayom reakʼ katha kana, ar okaṭakʼ nạbi katham roṛetʼ ona do tayom daramakʼko reaṅ kana.

²⁸ Onate onkom metakoa, Probhu Isore menetʼ kana, ‘ińakʼ jãhãn kathage purạukʼ do baṅ bilomokʼa; iń okań men ona doń hoeocoygea. Iń Probhu Isorge noa katha doń meneda.’ ”