Jeheskel 10 - সান্তালী বাইবেল

Probhu Isorakʼ ṭhonok do mundile bạgiyakʼkana

¹ Ona tayom beṅgetʼkateń ńelkeda, ar Kerubkoakʼ bohokʼ cetan secʼre okaṭakʼ aṭetʼ tahẽkan ona cetanre nilkanto dhiri reakʼ siṅghạson lekań ńel ńamkeda.

² Probhu Isor do mĩhĩ musnạ kicricʼe horokʼ akatʼ hoṛe metadea, “Kerubko latarre okaṭakʼ pạihạ̃ko menakʼ am do onako talare calakʼme. Ar onko Kerubko talare tahẽkate am do ańjlete perecʼ aṅgra seṅgel hataome ar nagraha cetanre chiṭiạugotʼkam.” Ińakʼ mẽtʼãhã samaṅrege uni hoṛ do onḍeye boloyena.

³ Unre Kerubko do mundil reakʼ dạkhin secʼreko teṅgo akan tahẽkana, ar bhitri raca do rimilte perecʼena.

⁴ Un jokhecʼ Probhu Isorakʼ ṭhonok do Kerubko khon rakapʼkate mundil reakʼ duạr ganaḍe secʼ senena. Ar mundil oṛakʼ do rimilte perecʼena, unre Probhu Isorakʼ ṭhonok reakʼ marsalte raca do perecʼena.

⁵ Kerubkoakʼ phạ̃kṛạ̃kʼ reakʼ saḍe do raca hạbicʼ ańjomokʼkan tahẽkana; ona saḍe do phạdkoren Probhu Isorakʼ roroṛkan aṛaṅ lekage tahẽkana.

⁶ Probhu Isor do tinre mĩhĩ mushnạ kicricʼ horokʼ akatʼ hoṛ noae hukumade tahẽkana, “Am do Kerubko talare pạihạ̃ khon seṅgel hataome,” Unre uni hoṛ do bhitrite bolokate mitʼṭecʼ pạihạ̃ aṛereye teṅgoyena.

^7-8 Kerubkoakʼ phạ̃kṛạ̃kʼ latarre manwa ti leka tahẽkana, onate Kerubko modre mitʼṭecʼ do ạkin tala reakʼ seṅgel secʼ tiye tiyạrkeda. Uni do thoṛa seṅgel hataokate one mĩhĩ mushnạ kicricʼe horokʼ akatʼ hoṛakʼ tireye caladea. Ar uni do ona hataokateye oḍok calaoena.

^9-10 Ona tayom iń do Kerubko secʼ iń beṅgetʼketʼ khan onko aṛere mitʼṭecʼkate jotote ponea pạihạ̃ń ńel ńamkeda; pạihạ̃ko do Boidurjomoni dhiri leka jhak jhakaokʼkan tahẽkana. Ona ponea pạihạ̃ do ńelokʼte mitʼ muṭhạnge tahẽkana; mitʼṭecʼ pạihạ̃ bhitrire ar mitʼṭecʼ pạihạ̃ menakʼ leka.

¹¹ Ar calakʼ jokhecʼ ona pạihạ̃ko do beṛhaete jãhã secʼge sojhete calakʼkan tahẽkana; ar eṭakʼ secʼ do baṅ ạcurokʼkan tahẽkana. Ar onako do Kerubkoakʼ bohokʼ oka secʼre tahenkan tahẽkan ontege calakʼkan tahẽkana; ar calakʼ jokhecʼ do baṅ ruạṛkan tahẽkana.

¹² Onkoakʼ ponea pạihạ̃re, goṭa hoṛmore, deare, tire ar phạ̃kṛạ̃kʼko beṛhaete do mẽtʼkote perecʼ tahẽkana.

¹³ Ińiń ańjomkeda pạihạ̃ko do “ạcurokʼ pạihạ̃” mente ńum ocokʼkana.

¹⁴ Onko mimitʼkoakʼ do poneakate mẽtʼãhã tahẽkana, pạhilakʼ do Kerub leka, dosarakʼ do manwa leka, tesarakʼ do dhạcri kul leka ar ponakʼ do pajhaṛ leka.

¹⁵ Ona tayom onko Kerubko do cetan secʼko rakapʼena. Nokoge onko jiwetʼ jiwiyanko, okoe do Kebar gaḍa aṛereń ńelletʼko.

¹⁶ Kerubko tinreko calakʼkan tahẽkana unre onko aṛe reakʼ pạihạ̃ko hõ calakʼkan tahẽkana; Kerubko do tinre ot bạgikate coṭte rakabokʼ lạgitʼ phạ̃kṛạ̃kʼko lap lapayetʼ tahẽkana unre pạihạ̃ko do onko aṛerege tahenkan tahena.

¹⁷ Kerubkoko teṅgolen khan onako hõ teṅgokʼkan tahẽkana ar Kerubko rakapʼlen khan onko sãote pạihạ̃ko hõ rakabokʼkan tahẽkana, ente onko jiwetʼ jiwiyankoakʼ jiu do onakore tahẽkana.

¹⁸ Ona tayom Probhu Isorakʼ ṭhonok do mundil reakʼ duạr ganaḍe cetan khon calaoente Kerubko cetanre thamgạḍiyena.

¹⁹ Ińakʼ mẽtʼãhã samaṅrege Kerubko do phạ̃kṛạ̃kʼko lap lapaketʼte cetante rakabokʼko ehopʼena, ar pạihạ̃ko hõ onko sãote sãote calao idiyena. Onko do mundil oṛakʼ reakʼ purub phaṭok duạr bolokʼ horre senkateko teṅgoyena; ar Israelren Isorakʼ ṭhonok do onko cetanre tahẽyena.

²⁰ Noko jiwetʼ jiwiyanko do Kebar gaḍa aṛere Israelren Isorakʼ siṅghạson latarreń ńelletʼkoa, ar onko jeko Kerubko kan ona doń bujhạu daṛeada.

²¹ Onko mimitʼkoakʼ do poneakate mẽtʼãhã ar poneakate phạ̃kṛạ̃kʼ tahẽkana ar onkoakʼ phạ̃kṛạ̃kʼ latarre do manwa ti leka tahẽkana.

²² Kebar gaḍa aṛere iń cetʼ lekań ńelletʼ onkage onkoakʼ mẽtʼãhã do tahẽkana. Onko mimitʼko do samaṅ secʼ sojheteko calakʼ kan tahẽkana.