Jakob 4 - সান্তালী বাইবেল

Isor gobolre tahen reaṅ

¹ Ape talare lạṛhại ar jhogṛa do oka khon hijuk kana? Okako rij roṅ apeakʼ hoṛmoreye lạṛhạikan ona khonge cetʼ onako do baṅ oḍok hijukʼkana?

² Ape dope lalocakʼ kana menkhan bape ńameda. Ape dope khũneda arpe lalocetʼkana, menkhan okaṭakʼpe khojkan ona do bape ńameda. Ape do jhogṛa arpe lạṛhại kana, enhõ apeakʼ do cetʼge baṅ tahenkana, ente ape do Isor ṭhen bape khojetʼkana.

³ Ape dope koeyetʼkanre hõ bape ńameda, ente bạṛicʼ monsubạ iạtepe koeyeda, jemon apeakʼ rij roṅ purạukʼtape.

⁴ E baṅ pạtiạukʼko, ape do cetʼ bape baḍaea, dhạrti tulucʼpe gatekʼ do Isorren bạiripe hoyokʼa mente? Onate jãhãe dhạrtiren gate hoyokʼe menjoṅkan khan uni do apnarte Isorren bạiriye hoyokʼ kana.

⁵ Ape do cetʼpe hudiseda, sonot sostorre ạuṛiyakʼge noa kathae meneda je, sonot Jiu, one Isor do aboakʼ ontorreye emakade, uni do aboakʼ bhokti ńam lạgitʼe koyokʼ hor akada mente?

⁶ Menkhan Isorakʼ daya do arhõ ḍhergea. Onate sonot sostorre ol menakʼa, “Isor do phulạukʼkanko upạrteye teṅgona, menkhan mạ̃hirko doe bhorakoa.”

⁷ Onate Isorakʼ gobolre tahenpe. Ar Soetan teṅgo daramepe, enḍekhan uni do ape ṭhen khone ńir pharakokʼa.

⁸ Isor ṭhen sorokʼpe, enḍekhan uni hõ ape ṭhene sorokʼa. E kạiyanko, ape do apnartege saphakʼpe. E bar monan hoṛko, apeakʼ ontor baṛe khạṭi dohoype.

⁹ Dukre do bhabnakʼpe ar hae haeyokʼre do rakʼjoṅpe. Apeakʼ landa do hae haete sodorpe ar rạskạ bodol do dukokʼpe.

¹⁰ Probhu Isor samaṅre nindhạnokʼpe, enḍekhan unigeye tul rakapʼpea.

¹¹ E boehako alope okta baṛaya. Okoe boeha upạrte kathae roṛ se boehawakʼ doskoe ńam baṛae uni do ạn upạrte kathae roṛa ar ạn-ạri reakʼ doskoe ḍunḍhạu baṛaea. Am do ạn-ạri reakʼ doskom ńam baṛae khan enḍekhan ona do bam manaoeda bickom ona reakʼem bicạreda.

¹² Eken mitʼ hoṛge menaea okoe do ạn-ạrikoe emokʼkan are bicạrkan. Unigeye rukhiyạ daṛeakʼa are marao daṛeakʼa. Am dom okoekante am aḍepaseren hoṛakʼ doskom ńam baṛayeda?

¹³ Ape modre adomkoko men botecʼkea, “Teheń baṅkhan gapa do phalna nagraha senkate mitʼ bochor bon khemaoa ar onḍe bạnij beparkate bon labjoṅa.”

¹⁴ Menkhan gapa cetʼ hoyokʼa ona do bape baḍaea. Apeakʼ jionge baṅ cetʼ kan? Kuṛhạkan cope, one oka do thoṛa ghạṛicʼ ńelokʼkan ar ona tayom do chanokʼkan.

¹⁵ Ona khon bickom apeakʼ do noa katha roṛ lek kana, “Probhu Isore menle khan ale do jiwetʼle tahena ar noa se hanale kạmiya.”

¹⁶ Menkhan ape do phulạu ar usul montepe perecʼ akana. Ar nonkan joto phulạuakʼ do bạṛicʼgea.

¹⁷ Onate bhage kạmi baḍaekate hõ okoe bae kạmi uni doe kạiyeda.