Ibriko 7 - সান্তালী বাইবেল

¹ Nui Melkisedek do Salemren raj ar maraṅ Isorren naekeye tahẽkana. Abraham do tinre rapajko bhagaokateye ruạṛ hijukʼkan tahẽkana unre nui Melkisedek tulucʼe ńapamlena. Ar Melkisedek do Abrahame bhorade tahẽkana,

² ar Abraham do joto jinisko reakʼ gel hĩs khon mitʼ hĩs do uniye emade tahẽkana. Melkisedek reakʼ mane do hoyokʼ kana dhoromren raj. Ar Melkisedek do Salemren hõ raje tahẽkana, ar ona reakʼ mane do hoyokʼ kana sulukren raj.

³ Melkisedek do eṅgat-apat se jãhãn bõs budạge baṅ tahẽkantaea. Isorren Hopon leka uniyakʼ jion reakʼ etohopʼ hõ baṅ tahẽkana, ar mucạtʼ hõ baṅ tahẽkana; uni do jaejug hạbicʼren naeke kanae.

⁴ Ado ma ńelpe, Melkisedek do tinạkʼe maraṅa; aboren ạgil hapṛam Abraham hõ sanamakʼ reakʼ gel hạṭiń reakʼ mitʼ hạṭiń uniye emade tahẽkana.

⁵ Lewi bõsko modre okoe do naekeko baṅkan, Israelko ṭhen khon, metakʼme onkoren boehako ṭhen khon ạn lekate gel hạṭiń reakʼ mitʼ hạṭiń hatao reakʼ hukum menakʼtakoa. Noko boehako do Abrahamren bõsko hoylenre hõ ona onkae hoyokʼtakoa.

⁶ Menkhan nui Melkisedek do Lewi bõsrene baṅkanre hõ Abraham ṭhen khon gel hạṭiń reakʼ mitʼ hạṭińe hataoetʼkan tahẽkana ar Isor okoe ṭhene gokʼletʼ tahẽkan uni Abraham hõe bhorade tahẽkana.

⁷ Noare jãhãn digdhạ bạnukʼa je, bhor ataṅicʼ khon bhor emokʼicʼgeye maraṅa mente.

⁸ Nonḍema gujukʼ gobolren Lewikoge gel hạṭiń reakʼ mitʼ hạṭińko hataoetʼkan; menkhan, okoe do jiwetʼge menaea mente goha emakan uni, metakʼme Melkisedek do gel hạṭiń reakʼ mitʼ hạṭińe hataoakada.

^9-10 Onate nonka mendaṛekokʼa, Lewi bõsren okoe do gel hạṭiń reakʼ mitʼ hạṭińe hataoetʼkan uni hõ Abraham hotete gel hạṭiń reakʼ mitʼ hạṭiń do Melkisedeke emade tahẽkana. Ente Abraham sãote tinre Melkisedekakʼ ńapam hoylena unre nui Lewi do uniren hapṛam Abrahamakʼ ḍanḍareye tahẽkana.

Jisu do Melkisedek lekan naeke kanae

¹¹ Okoe naeke reakʼko kạmikan tahẽkan onko Lewi bõsrenkoakʼ kạmi cetanrege Isor do Israelko acʼakʼ ạn-ạriye ematʼko tahẽkana. Ar Lewi bõsren naekekoakʼ kạmi hotete sạbit utạrlen khan, enḍekhan pạhil Lewi naeke Aron bodolte Melkisedek leka eṭakʼ ar mitʼṭen naeke hijukʼ reakʼ cetʼ jạruṛ tahẽkana?

¹² Ar naeke giri pherao hoylen khan ạn-ạri hõ pherao reakʼ jạruṛ hoyokʼa.

¹³ Okoe reaṅ noako kathań roṛetʼkan Lewi bõs khon uni Jisu do bae hecʼlena, bickom eṭakʼ mitʼ bõs khone hecʼlena. Ona bõsren okoege tishõ naeke lekate pinḍre janwar dãṛẽ do bako samaṅ akatʼko tahẽkana.

¹⁴ Noa do pusṭạugea je, aboren Probhu Isor do Jihudạ bõs khone hecʼlena. Ar noa bõs khon jãhãe mitʼ hoṛ naekeye hoyokʼa ona katha Mose do tishõ bae menletʼ tahẽkana.

¹⁵ Enḍekhan Melkisedek leka ar mitʼṭen naekeye teṅgo akanre abo oka bon menakatʼ ona do arhõ pusṭạute bujhạukʼ kana.

¹⁶ Uniyakʼ naeke hoyokʼ babotre bõs reaṅ do jãhãn ạnre baṅ ṭẽhaḍokʼ kana, ona do uniyakʼ baṅ maraokʼ jion reakʼ daṛe cetanrege ṭehãḍokʼkana.

¹⁷ Sonot sostorre noa gohae emeda, Am do jaejug hạbicʼ Melkisedek leka naeke kanam.

^18-19 Moseyakʼ ạn-ạri do okaṭakʼge bae sạbit oco daṛeakada, onate pạhil teakʼ naeke kạmi reakʼ oka ạn tahẽkan ona do nijor ar bin porho iạteye bạtil akada. Ar ńitokʼ do ona jaegare uni khon maraṅ mitʼṭecʼ as emakana. Ona as hotete abo do Isor ṭhen bon sen seṭer daṛeakʼa.

Jisuge Isorren gokʼicʼ maraṅ naeke

²⁰ Jisuakʼ naeke hudạ do Isor kiriạkateye ṭhik dohoakatʼ tahẽkana. Lewi bõsrenko naeke hoyokʼ oktere Isor do jãhãnakʼ bae kiriạlena,

²¹ menkhan Jisuye maraṅ naekeye jokhecʼ doe kiriạlena. Sonot sostorre noa reaṅ ol akana, Probhu Isor doe kiriạyena, “Am do jaejug hạbicʼ naeke kanam.” Noa babotre uni do acʼakʼ mon bae pheraotaea.

²² Noa khon bon bujhạu daṛeakʼ kana je, Jisu do arhõ maraṅ mitʼṭecʼ bondobosren jạmine hoyakana.

²³ Lewiko modren ḍherkoge naekeko hoylena, ente gujukʼteko akoṭente okoe hõ jaejug hạbicʼ naeke giri do bako kạmi idi daṛeada.

²⁴ Menkhan Jisu do jaejug jiwetʼ menaete uniyakʼ naeke giri do tishõ baṅ pheraokʼtaea.

²⁵ Onate okoe uni hotete Isor ṭhenko hijukʼkan onko do purạteye bańcao daṛeakoa, ente onko iạte nẽhorokʼ lạgitʼ uni do jaoge jiwetʼ menaea.

²⁶ Nonkan mitʼṭen sonoticʼ, bin dusiyicʼ ar niphuṭ utạricʼ maraṅ naekege jạruṛ tahẽkan tabona. Uni do kại hoṛko khone begargea ar Isor do serma khon hõ bạ̃ṛti usule rakapʼ akadea.

²⁷ Eṭakʼ maraṅ naekeko cetʼleka pạhilte apnar lạgitʼ ar tayomte eṭakʼkoakʼ kại lạgitʼ janwar dãṛẽko samaṅetʼkan tahẽkan, onka do nui naekeakʼ jạruṛ do baṅ tahẽkana, ente uni do jaejug lạgitʼ mitʼ dhaoge acʼakʼ jiwiye emketʼte ona kạmiye purạukeda.

²⁸ Ạn-ạri do nijor monan hoṛkoge maraṅ naeke hudạreye ojokʼetʼkoa; menkhan ạn-ạri tayom okaṭakʼ kiriạ hoylen ona do Isorren Hopone bahalkedea, one uni do jaejug hạbicʼe sạbit utạrakan.