Ibriko 6 - সান্তালী বাইবেল

¹ Noa iạte etohopʼre Mạsi reaṅ oka cecetʼakʼ bon ńamakatʼ, ona bon parom idite sạbitokʼ secʼ bon laha idikʼma. Bin joanakʼ kạmiko khon mon ạcurkate, Isorre pạtiạukʼte,

² eṭakʼakʼ bạptisma reaṅ cecetʼakʼ, capo reakʼ, gocʼko jiwetʼ beredokʼ ar jaejug reakʼ sạjại; noako etohopʼ reakʼ kathate arhõ nãwãte jemon rehetʼ alo bon bạisạu.

³ Menkhan Isore aṛakʼabo khan bon sạbit utạrokʼa;

⁴ ente mitʼ dhao marsal ńelakatʼko do, serma dan reakʼ sebel ar sonot Jiuakʼ elaṅko ńamakada,

⁵ Isorakʼ mońj katha reakʼ sebelko ńamakada ar darakan jug reaṅ daṛe reakʼko baḍae akatʼa,

⁶ inạ tayom Mạsi ṭhen khon pạc ruạṛ akanko arhõ nãwãte mon ạcurtako do beleṭecʼakʼ kangea. Noa do baṅ hoedaṛeakʼa, ente onko do Isorren Hopon arhõko kurusede kana ar jotoko samaṅreko henostawae kana.

⁷ Okaṭakʼ ot do ạḍi dhao jạṛi dakʼ ańjetʼkate cacasko lạgitʼ jạruṛakʼ aṛakʼ sakamkoe omon ocoyetʼ ona ot do Isorakʼ bhore ńameda.

⁸ Menkhan okaṭakʼ ot do jạnum ar rạṅgạinikoe omon ocoyetʼ ona ot do okoḍagea ar onare sarapokʼ reakʼ botor tahena. Ar mucạtʼre hoṛ do onako atar giḍikakʼa.

⁹ Dulạṛiạ gateko, ale do noako kathale menetʼre hõ enhõle pạtiạukʼ kana, apeakʼ dosa do onka baṅkana; kại khon bańcaokʼ reakʼ jo apeakʼ jionre ńelokʼ kangea.

¹⁰ Isor doe hok bicạricʼ kana; onate apeakʼ kạmi ar uniren hoṛko sapʼ sohotʼakote okaṭakʼ dulạṛpe udukʼ akawade arpe udukʼetʼkan, ona do bae hiṛińa.

¹¹ Alele khojkana, ape mimitʼko jemon mucạtʼ hạbicʼ inạ jidge tahentape. Onate purạtepe khạṭi joṅa je, apeakʼ as do purạukʼtapea.

¹² Kuṛhiạpe tahen do bale khojkana; alele khojkana, okoe pạtiạu ar soborite Isorakʼ gokʼakʼ reakʼ bhorko ạidạri joṅkan, ape hõ onko leka hoyokʼpe.

Isorakʼ gokʼakʼ reakʼ khạṭitetʼ

¹³ Isor do Abrahame gokʼade tahẽkanre acʼakʼ ńutumteye kiriạlena, ente acʼ khon maraṅ okoe hõ bạnukʼkoa one uni ńutumteye kiriạ daṛekokʼ.

¹⁴ Uni do noa menteye kiriạlena, “Iń do khạṭigeń bhorama ar amakʼ bõsrenkoń saṅge ocokoa.”

¹⁵ Noa iạte Abraham doe sombhuriketʼ khan Isor oka emae lạgitʼe gokʼade tahẽkan onae ńamkeda.

¹⁶ Manwa do acʼ khon okoeye maraṅa uni ńutumtegeye kiriạkʼ kana. Onate ona kiriạ do noa khạṭitetʼe kajakaea, oka roṛakan ona do sạrigea mente, ar nonkate joto gulmal do cabakʼa.

¹⁷ Isor oka emokʼ lạgitʼe gokʼletʼ, ar okoe onako ńam, onko do noa kiriạ hotete ạḍi pusṭạute udukʼakoe menleda je, uni okaṭakʼe ṭhik akatʼ ona do ar baṅ bodolokʼa. Onate uni do kiriạ hoteteye sạbudkeda okae ṭhik dohoakatʼ ona do hoyokʼgea mente.

¹⁸ Isorakʼ gokʼakʼ ar kiriạ do tishõ baṅ bodolokʼa. Okoe secʼ hõ Isor do eṛe bae roṛa, uni do noa gokʼakʼreye kiriạ akana, jemon abo samaṅre oka as menakʼ ona kajakte sapʼ dohoy lạgitʼ bạ̃ṛti udgạu bon ńam.

¹⁹ Noa as do aboakʼ jionre loṅgor leka khạṭi ar kajakgea, ar ona do sonot jaega reakʼ orwal tayomre, metakʼme Isor samaṅre seṭerokʼa.

²⁰ Jisuge abo hũyạte abon lahate ona jaegateye calao akana. Uni do jaejug hạbicʼ Melkisedek leka maraṅ naekeye hoyakana.